ޕާކިސްތާނުގައި ހައިޖެކްކުރި ރޭލަކުން 346 މީހުން ސަލާމަތްކޮށްފި

ޕާކިސްތާނުގެ ބަލޫޗިސްތާން ޕްރޮވިންސްގައި ހަނގުރާމަވެރިން ހައިޖެކްކުރި ރޭލަކުން 346 ފަސިންޖަރުން ސަލާމަތްކޮށްފައިވާކަމަށް ޕާކިސްތާނުގެ އަސްކަރިއްޔާއިން ބުނެފިއެވެ.

މި ރޭލު ހައިޖެކްކޮށްފައިވަނީ، ބަލޫޗިސްތާން ލިބަރޭޝަން އާމީ، ބީއެލްއޭއަށް ނިސްބަތްވާ ހަނގުރާމަވެރިންގެ ޖަމާޢަތުންކަމަށް އެ ޤައުމުގެ އަސްކަރިއްޔާއިން ވަނީ މަޢުލޫމާތުދެއްވާފައެވެ.

މި ޖަމާޢަތުން ހައިޖެކްކުރި ރޭލަކީ، ޕާކިސްތާނުގެ ބަލޫޗިސްތާނު ޕްރޮވިންސްގެ ވެރިރަށް ކުއެޓާއިން ހުޅަނގު އުތުރުގައި އޮންނަ ޚައިބަރު ޕަޚްތޫންޚުވާ ޕްރޮވިންސްގެ ވެރިރަށް ޕިޝާވާރަށް ދަތުރުކުރަމުން ދިޔަ ޖަފަރު އެކްސްޕްރެސްްގެ ރޭލެކެވެ. ޕާކިސްތާނުގެ އަސްކަރިއްޔާއިން ވިދާޅުވީ، މި ރޭލުގައި ގާތްގަނޑަކަށް 400 ފަސިންޖަރުން ދަތުރުކުރަމުންދިޔަ ކަމަށެވެ. އަދި މި ރޭލަށް އެ ޖަމާޢަތުން ޙަމަލާ އަމާޒުކޮށްފައިވަނީ، ކުއެޓާއާ ގާތްގަނޑަކަށް 160 ކިލޯމީޓަރު ދުރުގައި އޮންނަ ސިބީ ސިޓީ ކައިރީގައި ހުރި ޓަނަލްތަކުން ދަތުރު ކުރަމުން ދަނިކޮށް ކަމަށް އެ ޤައުމުގެ ނޫސްތަކުން ވަނީ ރިޕޯޓުކޮށްފައެވެ.

ޕާކިސްތާނުގެ އަސްކަރިއްޔާގެ ތަރުޖަމާނު ވިދާޅުވީ، މި ޙަމަލާއާއި ގުޅިގެން ރޭލުގައި ދަތުރުކުރަމުންދިޔަ މީހުން ސަލާމަތްކުރުމުގެ މަސައްކަތް ނިމިފައިވާ ކަމަށެވެ. އަދި މި ޙާދިސާގައި ހަމަލާދިން 33 މީހުންވެސް މަރުވެފައިވާކަމަށް އެ ޤައުމުގެ އަސްކަރިއްޔާއިން ވަނީ މަޢުލޫމާތުދެއްވާފައެވެ. މީގެ އިތުރުން، އެ ޙަމަލާގައި ރަހީނުކުރި މީހުންގެ ތެރެއިން 27 މީހަކާއި ޕެރަމިލިޓަރީ ސިފައިންގެ އެކަކު މަރުވެފައިވާކަމަށް ސަލާމަތީ ބާރުތަކުން ވަނީ މަޢުލޫމާތުދީފައެވެ.

މި ރޭލު ހައިޖެކްކޮށްފައިވާ ސަރަޙައްދަކީ، ބަލޫޗިސްތާން ލިބަރޭޝަން އާމީ، ބީއެލްއޭގެ އިތުރުން ހަތިޔާރު އެޅި ގިނަ ޖަމާޢަތްތަކެއް ދިރިއުޅޭ ސަރަޙައްދެކެވެ. ނަމަވެސް، މި ސަރަޙައްދުގެ ސަލާމަތީ ކަންކަން ބެލެހެއްޓުމުގައި އަދިވެސް ބޮޑެތި ދަތިތަކެއް ކުރިމަތިވަމުންދާކަމަށް އެ ޤައުމުގެ އަސްކަރިއްޔާއިން ވިދާޅުވެއެވެ.