މިއަހަރު ހައްޖާއި އުމްރާގެ އަޅުކަން އަދާކުރަން ދިއުމުގެ ފުރުސަތު ލިބޭ މުވައްޒަފުން ސްޓެލްކޯއިން ހޮވައިފި

ސްޓެލްކޯގެ ފަރާތުން މި ހިޖުރީ އަހަރު، ހައްޖާއި އުމްރާވުމުގެ ފުރުސަތު ލިބޭ ފަރާތްތައް އިޢުލާންކޮށްފިއެވެ. މި މުވައްޒަފުން ގުރުއަތުން ހޮވައި، އެ ފުރުސަތު އެފަރާތްތަކަށް ފޯރުކޮށްދެއްވާފައި ވަނީ އެކަމަށްޓަކައި މިދިޔަ ބުދަދުވަހު ބޭއްވި ރަސްމިއްޔާތެއްގައެވެ. 

މި އަހަރު ހައްޖުގެ މަތިވެރި އަޅުކަން އަދާކުރުމަށް ހުޅުވާލި ފުރުސަތަށް އިޖާބަދީ، މި ފުރުސަތު ހޯދުމަށް އެދި ފޯމު ހުށައަޅާފައި ވަނީ ޖުމުލަ 102 މުވައްޒަފުންނެވެ. މި މުވައްޒަފުންގެ ތެރެއިން 84 މުވައްޒަފުންގެ ޝަރުތު ހަމަވެފައިވާއިރު، އުމަރާގެ އަޅުކަން އަދާކުރުމަށް ކުރިމަތިލި 218 ފަރާތުގެ ތެރެއިން މި ފުރުސަތައް ޝަރުތު ހަމަވެފައި ވަނީ 215 މުވައްޒަފުންނެވެ. 

މިކުންފުނީގެ މުވައްޒަފުންނަށް ހުޅުވާލި ހައްޖާއި ޢުމްރާގެ މަތިވެރި އަޅުކަން އަދާކުރުމުގެ ފުރުޞަތަށް އެދި ހުށަހެޅި މުވައްޒަފުންގެ ތެރެއިން ޝަރުތު ހަމަވާ މުވައްޒަފުންގެ މެދުގައި ގުރުއަތުލުން ވަނީ ކުރިއަށް ގެންގޮސްފައި. މިގޮތުން، މި އަހަރުވެސް ހައްޖުގެ އަޅުކަމަށް ދެ ފިރިހެން… pic.twitter.com/jPU6eNoMWY

— STELCO (@STELCOMALDIVES) March 13, 2025

ސްޓެލްކޯގެ މުވައްޒަފުނަނަށް އެ ކުންފުނިން ދެއްވާ ހައްޖާއި އުމްރާގެ ފުރުސަތު 2023 ވަނަ އަހަރާ ހަމައަށް ދެއްވާފައި ވަނީ ގުރުއަތުން ހޮވޭ އެއް އަންހެން މުވައްޒަފަކަށާއި އެއް ފިރިހެން މުވައްޒަފަކަށެވެ. ނަމަވެސް، މި ޕޮލިސީ ބަދަލުކުރަށްވާ، މިދިޔަ އަހަރު އެ ކުންފުނީގެ ދެ އަންހެން މުވައްޒަފުންނާއި ދެ ފިރިހެން މުވައްޒަފުންނަށް މި ފުރުސަތު ދެއްވާފައިވެއެވެ. 

މި ހިޖުރި އަހަރު އެ ކުންފުނިން ހައްޖުގެ އަޅުކަން އަދާކުރުމަށް ގުރުއަތުން ހޮވިފައިވާ ފަރާތްތައް: 

• އަހުމަދު ވަހީދު – ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓް
• ހަސަން ޒަރީރު – ކ. ކާށިދޫ އިންޖީނުގެ
• އާމިނަތު ޖަލީލާ – ޕްރޮކިއުމަންޓް ޑިޕާޓްމަންޓް

އުމްރާގެ އަޅުކަން އަދާކުރުމަށް ގުރުއަތުން ހޮވިފައިވާ ފަރާތައް: 

• ބުންޔާމީން މުހައްމަދު ނަސީރު – ވިލިނގިލި އަވަށު އިންޖީނުގެ
• އަހުމަދު މުސްތަފާ – ވިލިނގިލި އަވަށު އިންޖީނުގެ
• ޝިފްރާ އިލްހާމް – ހިއުމަން ރިސޯސަސް އެންޑް ޓްރެއިނިންގ ޑިޕާޓްމަންޓް

ސްޓެލްކޯއިން ދެމުން ގެންދާ ހައްޖުގެ އަޅުކަމުގެ ފުރުސަތު ދެނީ ކުންފުންޏަށް 15 އަހަރަށްވުރެ ގިނަ ދުވަހު ޚިދުމަތް ކުރުމުގައި ދެމިތިބޭ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ. އަދި އުމްރާގެ އަޅުކަމުގެ ފުރުސަތު ދެނީ ފަސް އަހަރަށްވުރެ ގިނަ ދުވަހު ޚިދުމަތްކޮށްދީފައިވާ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ.