ފީ ނުދޭ ފަތުރުވެރިން ދިގުރަށުން ބޭރުކުރި މައްސަލަ ބަލަނީ

ފީ ނުދޭ ފަތުރުވެރިން އދ. ދިގުރަށުން ބޭރުކުރާ މައްސަލަ ބެލުމަށް ނިންމަވާފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ދިގުރަށުގެ ބަނދަރު ނޫން އެހެން ސަރަޙައްދުތަކަށް ފަތުރުވެރިން ގޮސް މަޑުކުރާނަމަ، ފީ ދައްކަން ޖެހޭ ކަމަށްބުނެ، ފަތުރުވެރިން އެ ރަށުން ބޭލުމުގައި ކައުންސިލްގެ ރައީސް އިބްރާހިމް އުސްމާން އުޅުއްވާ ވީޑިއޯތަކެއް ދައުުރުވުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.

މި މައްސަލައާއި ގުޅިގެން ވަޒީރު ވިދާޅުވީ، މިއީ ކަންބޮޑުވާންޖެހޭ ވަރުގެ ހިތާމަވެރި ހާދިސާއެއް ކަމަށެވެ. އަދި މިކަމުގައި ކަން ހިނގާދިޔަ އޮޅުންފިލުވުމަށް ޚާއްޞަ އިންކުއަރީއެއް ހިންގާނެ ކަމަށް ވަޒީރު ވަނީ ވިދާޅުވެފައެވެ. މީގެ އިތުރުން ވަޒީރުު ވިދާޅުވީ، ކޮންމެ ރަށެއްގައި ވެސް ފަތުރުވެރިން އުޅުމަށް ކަނޑައަޅުއްވާފައިވާ މިންގަނޑުތަކަށް އިޙްތިރާމް ކުރައްވާ ކަމަށެވެ. ނަމަވެސް، ކަނޑައެޅިފައި އޮންނަ އުޞޫލުތަކުގެ ތެރެއިން ފަތުރުވެރިންނަށް މަރުޙަބާ ކިޔުމަށް އެ ވުޒާރާއިން އަބަދުވެސް ރައްޔިތުންނަށް ހިތްވަރު ދެއްވާނެކަމަށް ވަޒީރު ވަނީ ވިދާޅުވެފައެވެ. 

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ، ދިގުރަށުގެ ކައުންސިލް ރައީސް އިބްރާހިމް އުސްމާން ގޮނޑުދޮށަށް ވަޑައިގެން ފަތުރުވެރިންނަށް އެއްވެސް އިހްތިރާމެއް ކުރެއްވުމެއް ނެތި އެމީހުން ރަށުން ބޭރު ކުރަން އުޅުއްވާ މަންޒަރެވެ. އަދި ގޮޑުދޮށުގައި ތިބި ބައެއް ފަތުރުވެރިންނާއި ވާހަކަދައްކަވާ މަންޒަރު ވެސް ވީޑިއޯއިން ސާފުކޮށް ފެނެއެވެ.

މިކަމާއި ގުޅިގެން ވަޒީރު އާދަމް ޝަރީފް ޢުމަރު ވިދާޅުވީ، ފަތުރުވެރިކަމުގެ ސިނާޢަތުގެ މިންގަނޑުތަކާއި އެއްގޮތަށް، އެ ސިނާޢަތް ހަރުދަނާކުރެއްވުމަށް ކަމާ ބެހޭ ފަރާތްތަކާއި ގުޅިގެން މަސައްކަތް ކުރައްވާނެ ކަމަށެވެ.