ރައީސްގެ ދަރިކަލަކަށް ނިސްބަތްކޮށް އެމްޑީޕީގެ މުޒާހަރާގައި ދެއްކި ވާހަކަ އީސީން ކުށްވެރިކޮށްފި

އިދިކޮޅު އެމްޑީޕީން މިހާރު މާލޭގައި ކުރިޔަށް ގެންދާ ސިސްސިލާ މުޒާހަރާތަކުގެ ތެރެއިން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ދަރިކަލަކަށް ނިސްބަތްކޮށް ދެއްކި ވާހަކަތައް އިލެކްޝަންސް ކޮމިޝަން، އީސީން ކުށްވެރިކޮށްފިއެވެ.

އެމްޑީޕީގެ މުޒާހަރާގައި އެ ޕާޓީގެ އެކްޓިވިސްޓެއް ކަމުގައިވާ މަރިޔަމް ޒުބެއިރު (މަންދީ) ދެއްކި ވާހަކަތައް މިހާރު ވަނީ ސޯޝަލް މިޑިއާގައި ވެސް އާންމުވެފައެވެ.

އީސީން ނެރުނު ބަޔާނުގައި ބުނީ، ޙިޔާލުފާޅުކުރުމުގެ މިނިވަންކަން ބޭނުންކުރަން ވާނީ ގާނޫނުއަސާސީ އާއި ސިޔާސީ ޕާޓީގެ ގާނޫނައި ގަވާއިދާ ރާއްޖޭގައި އަމަލުކުރަމުންދާ އެހެނިހެން ގާނޫނުތަކާއި ގަވާއިދުތަކުގެ ހުދޫދުގެ ތެރެއިންކަން ހަނދާންކޮށްދޭ ކަމަށެވެ.

މީގެ އިތުރުން، އެމްޑީޕީން ސިޔާސީ ހަރަކާތްތައް ސިލްސިލާކޮށް ކުރިޔަށް ގެންދާއިރު، އެއްވެ އުޅުމުގެ ގާނޫނުގައި ބަޔާންކޮށްފައިވާ ގޮތުގެ މަތިން އަމަލުކުރުމަށް އިލްތިމާސްކުރާކަމަށް ވެސް އީސީން ބުނެފައިވެއެވެ.

އެ ކޮމިޝަނުން އިތުރަށް ބުނީ، ސިޔާސީ ހަރަކާތްތަކުގެ ތެރެއިން ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ބަޔާންކޮށްފައިވާ ގޮތުގެމަތިން ކުޑަކުދިންގެ ހައްގުތައް ގެއްލޭ ގޮތަށް ސާބިތު ނުހިފޭ ވާހަކަ ދެއްކުމާއި އެ ކުދިންގެ ކަރާމާތާއި ނަފްސާނީ ދުޅަހެޔޮކަމަށް އަސަރުކުރާ ފަދަ ވާހަކަތައް ދެއްކުން އެ ކޮމިޝަނުން ކުށްވެރިކުރާ ކަމަށެވެ. 

އަދި ހަމަ އެހެންމެ، ސިޔާސީ ޕާޓީތަކުން ކުރިއަށް ގެންދާ އެންމެހާ ސިޔާސީ ހަރަކާތްތައް ކުރިއަށް ގެންދާއިރު، ސިޔާސީ ޕާޓީގެ ގާނޫނުގެ 45 ވަނަ މާއްދާގައި ބަޔާންކޮށްފައިވާ ސުލޫކީ މިންގަނޑާ ހިލާފަށް، މުޖުތަމައުގައި ރުޅިވެރިކަމާއި ނަފުރަތު އުފެއްދުމާއި ޒާތީ ދިރިއުޅުމުގެ ކަންކަމަށް ފާޑުނުކިޔުމާއި ހަގީގަތާ ހިލާފަށް ސާބިތު ނުހިފޭ ވާހަކަތައް ނުދެއްކުމަށް އިލްތިމާސްކޮށް ނަސޭހަތްތެރިވަމެވެ.

އީސީގެ ނެރުނު ބަޔާނުގައި ވެއެވެ.

އެމްޑީޕީގެ މުޒާހަރާގައި މި ދެކެވުނު ވާހަކައާ ގުޅިގެން، ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމްއިން ވެސް ވަނީ ބަޔާނެއް ނެރެފައެވެ.  އެ ބަޔާނުގައި ވަނީ ކުއްޖެއްގެ ކަރާމާތާއި އަބުރަށް އުނިކަން ލިބޭ ގޮތަށް ވާހަކަ ދައްކާފައި ވުމަކީ ހިޔާލުފާޅުކުރުމުގެ ނަމުގައި އެއްވެސް ފަރާތަކުން ކޮށްގެން ވާނެ ކަމެއް ނޫންކަމަށެވެ.