ފިޠުރު ޢީދާ ދިމާކޮށް މޯލްޑިވިއަންގެ ސީޕްލޭން ދަތުރުތައް ބ. ފުޅަދޫއަށް ފަށަން ނިންމައިފި

ފިޠުރު ޢީދާ ދިމާކޮށް ރާއްޖޭގެ ޤައުމީ އެއަރލައިން، މޯލްޑިވިއަންގެ ސީ ޕްލޭން ދަތުރުތައް ބ. ފުޅަދޫއަށް ފަށަން ނިންމައިފިއެވެ.

މޯލްޑިވިއަނުން ވިދާޅުވީ، މި ދަތުރުތައް ފެށުމަށް ހަމަޖެހިފައިވަނީ މި ހިނގާ މާރިޗު މަހުގެ 31 ވަނަ ދުވަހުން ފެށިގެން ކަމަށެވެ. ނަމަވެސް، މި ދަތުރުތަކުގެ ޓިކެޓް ވިއްކުމަށް މިހާރު ފަށާފައިވާކަމަށް މޯލްޑިވިއަނުން މަޢުލޫމާތުދެއެވެ. އެގޮތުން، ޓިކެޓް ގަތުމަށް ބޭނުންވާ ފަރާތްތަކުން، މޯލްޑިވިއަންގެ ވެބްސައިޓުން ނުވަތަ 24 ގަޑިއިރު ޚިދުމަތްދޭ ކޯލް ސެންޓަރުގެ ނަންބަރު 1671 އަށް ގުޅުމުން ލިބޭނެ ކަމަށް މޯލްޑިވިއަނުން ވަނީ ވިދާޅުވެފައެވެ.

މޯލްޑިވިއަނުން ވިދާޅުވީ، މި ދަތުރުތައް އިތުރުކުރުމާއެކު އެ އެއަރލައިނުން ބ. އަތޮޅަށް ކުރާ ދަތުރުތައް ފުޅާވެގެންދާނެ ކަމަށެވެ. އެގޮތުން، މި ދަތުރުތަކުގެ ސަބަބުން ބ. ފުޅަދޫއާއި ކައިރީގައި އޮންނަ ބ. ފެހެންދޫ އަދި ބ. ގޮއިދޫއަށްވެސް ދަތުރުކުރަން ބޭނުން ފަރާތްތަކަށް އެ ފުރުޞަތު ފަސޭހަވެގެންދާނެކަމަށް މޯލްޑިވިއަނުން ވަނީ ވިދާޅުވެފައެވެ. މީގެ އިތުރުން އެ އެއަރލައިނުން ވިދާޅުުވީ، ސީޕްލޭންގައި ދަތުރުކުރުމަކީ ރާއްޖޭގެ ރީތިކަން މަތިން ބަލާލުމަށް ލިބޭ ރަނުގެ ފުރުޞަތެއް ކަމަށެވެ. އަދި މާލެއިން ފުޅަދޫއަށް ކުރާ ސީޕްލޭން ދަތުރުތަކުގެ ދިގުމިނަކީ، 25 މިނެޓުކަމަށް ވެސް މޯލްޑިވިއަނުން ވަނީ ވިދާޅުވެފައެވެ.

ކޮންމެ އަހަރެއްގެ ވެސް ޢީދާ ދިމާކޮށް އަތޮޅުތެރެއަށް ދަތުރުކުރާ މީހުންގެ ޢަދަދު އިތުރުވެއެވެ. އަދި މިއާއެކު މޯލްޑިވިއަންގެ ފްލައިޓްތަކަށާއި، ސީޕްލޭންތަކަށް ވަރަށް ބޮޑަށް ޑިމާންްޑް އިތުރުވެގެންދެއެވެ. އެހެންކަމުން، ޑިމާންޑް އިތުރުވުމާއި ގުޅިގެން މީގެ ކުރިންވެސް މޯލްޑިވިއަނުން ވަނީ ބ. ފުޅަދޫއަށް ސީޕްލޭންގެ ދަތުރުތަކެއް ބާއްވާފައެވެ.