ވިޔަފާރި / ޚަބަރު
ދެކުނު އެފްރިކާއިން އަންނަ ފަތުރުވެރިން އިތުރުކުރުމަށް މޯލްޑިވިއަނުން ތައްޔާރުވަނީ

ސައުތުއެފްރިކާގެ ޖޮހަނަސްބާގް، ފޮޓޯ: އެއާބީއެންބީ
ދެކުނު އެފްރިކާއިން އަންނަ ފަތުރުވެރިން އިތުރުކުރުމުގެ ވިސްނުމުގައި މޯލްޑިވިއަންގެ ވައިޑް-ބޮޑީ އެއަރކްރާފްޓުގެ ދަތުރުތަށް މި އަހަރުގެ ތެރޭގައި އެ ޤައުމަށް ފަށާނެކަމަށް އެ އެއާރލައިނުން ބުނެފިއެވެ.
މޯލްޑިވިއަން އެއާރލައިން އޮޕަރޭޓް ކުރަމުން އަންނަ އައިލެންޑް އޭވިއޭޝަން ކުންފުނީގެ މެނޭޖިން ޑިރެކްޓަރ އިބްރާޙިމް އިލްޔާސް ދީފައިވާ އިންޓަވިއުއެއްގައި ބުނީ، އާ ބޯޓާއެކު ދެން އެންމެ އަވަހަށް ދަތުރުތައް ފަށާނީ ދެކުނު އެފްރިކާގެ ޖޮހަނަސްބާގަށް ކަމަށެވެ.
އިލްޔާސް ވިދާޅުވީ، ސައުތު އެފްރިކާގެ ދަތުރުތައް މި އަހަރުގެ މެދުތެރޭގައި ފެށުމަށް މަސައްކަތް ކުރަމުން އަންނަ ކަމަށާއި، ދަތުރު ފަށާއިރު ފުރަތަމަ ސައުތު އެފްރިކާއަށް ދާނީ ހަފްތާއަކު އެއް ފަހަރު ކަމަށެވެ.
އަދި މިއީ، މޯލްޑިވިއަންގެ ދަތުރުތައް ދުނިޔޭގެ އެކިކަންކޮޅުތަކަށް ފުޅާ ކުރުމަށް ކުރާ މަސައްކަތުގެ ތެރޭގައި ހިމެނޭކަމެއްކަމަށް ވެސް އިލްޔާސް ވަނީ ހާމަކޮށްފައެވެ.
މި އަހަރުގެ ތެރޭގައި ޖަރުމަނުވިލާތައް ދަތުރުތައް ފަށާނެކަމަށް ވެސް މޯލްޑިވިއަނުން އިޢުލާންކޮށްފައިވެއެވެ.
އެ އެއާރލައިނުން މިހާރު ދަނީ ޗައިނާގެ ތިން ސިޓީއަކަށް ދަތުރުތައް ކުރަމުންނެވެ. އެއީ ބެއިޖިން، ޗެންޑޫ އަދި ޝަންހާއީއެވެ.
އެ އެއާލައިނުން ރާވާފައި ވަނީ މިއަހަރު ތެރޭ އޭ 330ގެ އިތުރު ބޯޓެއް ގެނެސް ޔޫރަޕްގެ ބައެއް މަންޒިލްތަކަށް ދަތުރުތައް ފެށުމަށެވެ.