އެމްއެސް ވައިކިންގ ސްކައި: މިއީ މިއަހަރު ރާއްޖެ އައި 6 ވަނަ ކްރޫޒްލައިނަރ

އެމްއެސް ވައިކިންގ ސްކައި، ނަމަކަށް ކިޔާ ކްރޫޒްލައިނަރ އެއް ރާއްޖެ އަތުވެއްޖެއެވެ. މިއީ، މިއަަހަރުގެ ތެރޭގައި ރާއްޖެ އައި 6 ވަނަ ކްރޫޒްލައިނަރއެވެ.

މޯލްޑިވްސް އިމިގްރޭޝަނުން ވިދާޅުވީ، މި ކްރޫޒްލައިނަރ ރާއްޖެ އައިސްފައިވަނީ، މި ހިނގާ މާރިޗު މަހުގެ 9 ވަނަ ދުވަހު ކަމަށެވެ. އަދި މި ކްރޫޒްލައިނަރގައި  ރާއްޖެއަށް ޖުމްލަ 1234 މީހުން ވަނީ އައިސްފައެވެ.

މޯލްޑިވްސް އިމިގްރޭޝަނުން ވިދާޅުވީ، މި ކްރޫޒްލައިނަރގައި ރާއްޖެއަށް 765 ފަތުރުވެރިން ޒިޔާރަތްކޮށްފައިވާ ކަމަށެވެ. މީގެ އިތުރުން ކްރޫޒްލައިނަރގައި 469 ފަޅުވެރިން ތިބިކަމަށް އިމިގްރޭޝަނުން މަޢުލޫމާތުދެއެވެ. އަދި މި އެންމެނަށް ވެސް މިހާރު އިމިގްރެޝަނުން ވަނީ ކްލިއަރެންސް ދީފައިކަމަށް އެ އިދާރާއިން ވިދާޅުވެއެވެ. 

އެމްއެސް ވައިކިންގ ސްކައި ރާއްޖެ އައިސްފައިވާއިރު، މިއީ މި މަހުގެ ތެރޭގައި ރާއްޖެ އައި 3 ވަނަ ކްރޫޒްލައިނަރއެވެ. މި މަހުގެ ތެރޭގައި، ސީޝެލްސްއިން ވެސް ވަނީ ރާއްޖެއަށް ކްރޫޒްލައިނަރއެއް އައިސްފައެވެ. އެ ކްރޫޒްލައިނުން ރާއްޖެއަށް ޖުމްލަ 576 ފަތުރުވެރިން ވަނީ ޒިޔާރަތްކޮށްފައެވެ. މީގެ އިތުރުން، ސްރީލަންކާ މަގުން "އެމްއެސް ޒުއިޑަޑަމް" ކިޔާ ކްރޫޒްލައިނަރ އެއް ވެސް ވަނީ މިމަހުގެ ތެރޭގައި ރާއްޖެ އައިސްފައެވެ. އަދި މި ކްރޫޒްލައިނަރގައި 1274 ފަތުރުވެރިންނާއި 751 ކްރޫއިން ތިބިކަމަށް އިމިގްރޭޝަނުން ވަނީ ހާމަކޮށްފައެވެ.

ރާއްޖެއަކީ ކްރޫޒްލައިނަރތަކުގެ މެދުގައި މަޤްބޫލް މަންޒިލަކަށް ވެފައިވާއިރު، ސަރުކާރުން މަސައްކަތް ކުރަނީ ރާއްޖޭގެ ތިން ސަރަހައްދެއްގައި ކުރޫޒް ލައިނާތަކަށް ހާއްސަ ޖެޓީތަކެއް ތަރައްޤީކުރުމަށެވެ. އެގޮތުން، މި ދާއިރާއިން ގިނަ މަސައްކަތްތަކެއް ކުރައްވަމުން ގެންދަވާކަމަށް ސަރުކާރުން ވަނީ މީގެ ކުރިން ވެސް ހާމަކޮށްފައެވެ.

ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށް 5 ލައްކައަށްވުރެ ގިނަ ފަތުރުވެރިން ވަނީ އައިސްފައެވެ.