ޚަބަރު
މާލޭގެ ގެއެއްގައި ރޭގަނޑު ކާބޯތަކެތި ތައްޔާރުކޮށް ވިއްކަމުންދިޔަ 3 ބިދޭސީއަކު އިމިގްރޭޝަންގެ ބެލުމުގެ ދަށަށް
އިމިގްރޭޝަނުން މ. ހަރމަނީ ގެ ބަލާ ފާސްކުރުމުގެ ތެރެއިން/ފޮޓޯ: އިމިގްރޭޝަން
މާލޭގެ ގެއެއްގެ ތެރޭގައި ރޭގަނޑު ކާބޯތަކެތި ތައްޔާރުކޮށް ވިއްކަމުންދިޔަ 3 ބިދޭސީއަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން ވިދާޅުވީ، މި ގެ ބަލައި ފާސްކޮށްފައިވަނީ މި މަހުގެ 5 ވަނަ ދުވަހު އިމިގްރޭޝަން "ވޮޗް" އަށް ހުށައަޅާފައިވާ ރިޕޯޓަކާއި ގުޅިގެން ކަމަށެވެ. މި ރިޕޯޓާއި ގުޅިގެން އިމިގްރޭޝަނުން ވަނީ، މާލޭގެ މާފަންނުގައި ހުންނަ މ. ހަރމަނީ ނަމަކަށް ކިޔާ ގެއެއް ބަލާ ފާސްކޮށްފައެވެ.
އިމިގްރޭޝަނުން މި ގޭގެ ފުރަތަމަ ފަންގިފިލާ ބަލާ ފާސްކުރިއިރު، ރޭގަނޑު 9 އިން ފެށިގެން މެންދަމު 2 އާއި ހަމައަށް ކާބޯތަކެތި ތައްޔާރުކޮށް، މިތަކެތި ޑެލިވަރީކުރުމުގެ އޮންލައިން ވިޔަފާރިއެއް ހިންގަމުންދިޔަކަން އެނގިފައިވާ ކަމަށް އެ އިދާރާއިން މަޢުލޫމާތުދެއެވެ. އަދި މިތަނުގައި މަސައްކަތް ކުރަމުންދިޔަ 3 ބިދޭސީން ވެސް މަސައްކަތް ކުރަމުން ދިޔައީ އެމީހުންނަށް ދޫކޮށްފައިވާ ހުއްދައިގެ ބޭރުން، ޤަވާއިދާއި ޚިލާފަށް ކަމަށްވާތީ، އެ މީހުން މިހާރު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި ކަމަށް އިމިގްރޭޝަނުން މަޢުލޫމާތުދެއެވެ.
ރާއްޖޭގައި ޤަވާއިދާ ޚިލާފަށް މަސައްކަތް ކުރަމުންދާ ބިދޭސީން ހޯދައި، އެމީހުންނާއި މެދު އަޅަންޖެހޭ އެކަށީގެންވާ ފިޔަވަޅުތައް އެޅުމަށް އިމިގްރޭޝަނުން ވަނީ ރާއްޖޭގެ އެކި ކަންކޮޅުތަކުގައި އޮޕަރޭޝަންތަކެއް ފަށައިފައެވެ. އަދި މި އޮޕަރޭޝަންތަކުގެ ދަށުން މިހާރު ވަނީ ގިނަ ޢަދަދެއްގެ ބިސޭސީންނެއް އަތުލައިގަނެފައެވެ.
