މިރޭގެ އިޙްޔާ ފޯރަމް ތ. ގުރާދޫގައި: ތަޤުރީރު ކުރައްވާނީ އައްޝައިޚް އިމްޠިޠާޢު އައްބާސް

1446 ވަނަ އަހަރުގެ ރަމަޟާން މަހުގެ ރޭތައް އިޙްޔާކުރުމަށް ބާއްވާ އިޙްޔާ ފޯރަމް ސިލްސިލާގެ ތެރެއިން އަތޮޅުތެރޭގައި ބާއްވާ ފޯރަމެއް މިރޭ ތ. ގުރައިދޫގައި ބޭއްވުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅުވެއްޖެއެވެ.    
 
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިރޭގެ އިޙްޔާ ފޯރަމަކީ އެ ވުޒާރާއާއި ތ. ގުރައިދޫ ކައުންސިލާއި ގުޅިގެން ކުރިއަށް ގެންދާ ފޯރަމެއް ކަމަށެވެ. އަދި މި ފޯރަމް، އެ ވުޒާރާގެ ފޭސްބުކް ޕޭޖުންނާއި މުންނާރު ޓީވީން ލައިވްކުރާ ގޮތަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ވިދާޅުވެފައެވެ. މިރޭގެ ފޯރަމް ފެށުމަށް ހަމަޖެހިފައިވަނީ 21:30 ގައެވެ.
 
މިރޭގެ ފޯރަމްގައި ތަޤުރީރު ކުރައްވާނީ އިސްލާމީ ކަންތައްތަކާ ބެހޭ ވަޒީރުގެ ނައިބު އައްޝައިޚް އިމްޠިޠާޢު އައްބާސްއެވެ. މިރޭގެ އިިޙްޔާ ފޯރަމްގައި ވަޒީރުގެ ނައިބު ތަޤުރީރު ކުރައްވާނީ، "އިސްލާމީ ހަޟާރަތު އަލުން ދިރުވުން" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ.

ފާއިތުވި އަހަރުތަކެކޭ އެއްގޮތަށް މިއަހަރު ވެސް  އިޙްޔާ ފޯރަމްއަށް ވަޑައިގަންނަވާ ބޭފުޅުންގެ ތެރެއިން ގުރުއަތުން ހޮވޭ ބޭފުޅުންނަށް ހާއްސަ އިނާމުތަކެއް ދިނުމަށް ވަނީ ހަމަޖެހިފައެވެ. އެގޮތުން 1 ވަނައަށްދާ ފަރާތަކަށް ބީއެމްއެލް އިސްލާމިކްއިން ވަނީ 1,500 ރުފިޔާގެ ގިފްޓު ކާޑެއް ހުށައަޅައިފައެވެ. އަދި ދެވަނައަށްދާ ފަރާތަކަށް ބީއެމްއެލް އިސްލާމިކް އިން 1,000 ރުފިޔާގެ ގިފްޓު ކާޑެއް ދިނުމަށް ހަމަޖެހިފައިވާއިރު، ތިންވަނައަށް ދާ ފަރާތަކަށް ހުށައަޅާފައިވަނީ 700 ރުފިޔާގެ ގިފްޓު ކާޑެކެވެ. އަދި 4 ވަނައަށް ދާ ފަރާތަކަށް ވަނީ 500 ރުފިޔާގެ ގިފްޓު ކާޑެއް ހުށައަޅައިފައެވެ. މީގެ އިތުރުން، އިސްލާމީ ކަންތައްތަކާ ބެހޭ ވުޒާރާއިން ވަނީ އިނާމެއްގެ ގޮތުގައި ރިޔާޟުއްޞާލިޙީން އަދި ފިޤުޙުއްސުންނާ ދިނުމަށް ހަމަޖެހިފައެވެ.

މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް ބޭއްވުމަށް ވަނީ ހަމަޖެހިފައެވެ. މީގެ އިތުރުން، އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިޔުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ނިންމަވާފައެވެ. އަދި 6 ސްކޫލަކާއި އެކު ދަރިވަރުންގެ އިޙްޔާ ފޯރަމެއް ވެސް މި ރަމަޟާން މަހު އޮންނާނެ ކަމަށް އެ ވުޒާރާއިން ވިދާޅުވެއެވެ.