ކުޅިވަރު
އަނިޔާގެ ސަބަބުން ލީގު ކަޕް ފައިނަލުގައި އާނޯލްޑަށް ނުކުޅެވޭނެ

އާނޯލްޑަށް އަނިޔާވުމުން ދަނޑުމަތީގައި އޭނާއަށް ފަރުވާދެނީ، ފޮޓޯ: ގެޓީއިމޭޖަސް
ޗެމްޕިއަންސް ލީގުގެ ގަދަ-16ގެ ދެވަނަ ލެގުގައި އަންގާރަ ދުވަހުގެރޭ ޕެރިސް ސެއިންޓް-ޖަމެއިން މެޗުގައި ލިވަޕޫލްގެ ކަނާތްފަރާތުން ފަހަތަށް ކުޅޭ އެލެކްސެންޑަރ އާނޯލްޑަށް ލިބުނު އަނިޔާއާ ގުޅިގެން، އާދިއްތަ ދުވަހު ކުޅޭ ލީގު ކަޕް ފައިނަލުގައި އޭނާއަށް ނުކުޅެވޭނެކަން ކަށަވަރުވެއްޖެއެވެ.
އިނގިރޭސި ލީގު ކަޕް ނުވަތަ ކަރަބޯ ކަޕް ފައިނަލުގައި ލިވަޕޫލް ބައްދަލުކުރާނީ ނިއުކާސްލް ޔުނައިޓެޑާއެވެ.
އުމުރުން 26 އަހަރުގެ އާނޯލްޑަށް ފައިނަލުގައި ނުކުޅެވުމަކީ އެ ޓީމުގެ ކޯޗު، އާރނޭ ސްލޮޓަށް އޮތް ބޮޑު ކަންބޮޑުވުމެކެވެ. ސަބަބަކީ އެ މަޤާމަށް ދެން ކުޅޭ ޒުވާން ކުޅުންތެރިޔާ ކޮނޯރ ބްރެޑްލީ އާއި ތަޖުރިބާކާރު ޑިފެންޑަރު، ޖޯ ގޮމޭޒް ވެސް އަނިޔާގެ ސަބަބުން ކުޅުމާއި ދުރުގައި ތިބުމެވެ.
އެހެންކަމުން މި މަޤާމަށް ދެން ކުޅޭނީ ކޮން ކުޅުންތެރިއެއްކަމެއް އަދި ހާމަކޮށްފައެއް ނުވެއެވެ.
ލިވަޕޫލްއާއެކު އާނޯލްޑް ހަދާފައިވާ އެއްބަސްވުން މި ސީޒަންގެ ނިޔަލަށް ހަމަވާނެއެވެ. އެހެންކަމުން، މި ސީޒަނަށްފަހު އޭނާ ރެއާލް މެޑްރިޑަށް ބަދަލުވާން އުޅޭކަމުގެ އަޑުތައް ވަނީ ގަދަވެފައެވެ.
އާނޯލްޑުގެ އިތުރުން، މުޙައްމަދު ސަލާޙްގެ އެގްރީމެންޓު ވެސް މި ސީޒަނުގެ ނިޔަލަށް ހަމަވާނެއެވެ. ނަމަވެސް އެގްރީމެންޓުގެ މުއްދަތު އިތުރުކުރުމަށް އަދި ދެފަރާތުން އެއްބަސްވެފައެއް ނުވެއެވެ.