ރޭގަނޑު ފީނަން ގޮސް އުޅެނިކޮށް ފަރުތޮޅިއެއް ހަމަލާދިން މީހެއްގެ އެއްފަޅި ވާގިނެތިއްޖެ

ރޭގަނޑު ފީނަން ގޮސް އުޅުނު އުމުރުން 32 އަހަރުގެ ދިވެއްސަކަށް ފަރުތޮޅިއެއް ހަމަލާދިނުމާ ގުޅިގެން، އިންޑިއާގެ ކޮޗިންގައި ހުންނަ އަމްރިތާ ހޮސްޕިޓަލުގައި އޭނާއަށް ފަރުވާދެމުން އަންނަކަމަށް އެ ހޮސްޕިޓަލުން ހާމަކޮށްފިއެވެ.

އޭނާއަށް ފަރުތޮޅި ހަމަލާދީފައިވަނީ ލަނޑާ ނެގުމަށް ފީނަން އުޅެނިކޮށެވެ. މި ހަމަލާގެ ސަބަބުން އޭނާގެ މައިބަދައާއި ކަރަށް ބޮޑެތި ގެއްލުންތައް ވަނީ ލިބިފައެވެ. 

މި ހަމަލާއާ ގުޅިގެން އެންމެ ފުރަތަމަ އޭނާއަށް ރާއްޖެއިން ފަރުވާ ހޯދައިދިނުމަށް މަސައްކަތްކުރިކަމަށާއި، ނަމަވެސް ލިބިފައިހުރި އަނިޔާތަކުގެ ބޮޑުކަމުން، އިތުރު ފަރުވާއަށް އަމްރިތާ ހޮސްޕިޓަލަށް ގެންދިޔައީކަމަށް އެ ހޮސްޕިޓަލުން ވަނީ ހާމަކޮށްފައެވެ.

އަމްރިތާ ހޮސްޕިޓަލުން އޭނާއަށްވެފައިހުރި އަނިޔާ ދެނެގަތްއިރު، ފަރުތޮޅީގެ ތޫނު ދަތްތައް އޭނާގެ މައިބަދައަށް ވަދެފައި ހުރިކަން އެނގުނެވެ. އަދި އޭނާގެ ވާތްފަޅި ވާގިނެތުނީ އެކަމުގެ ސަބަބުންކަމަށް އެ ހޮސްޕިޓަލުން ހާމަކޮށްފައިވެއެވެ. 

އަމްރިތާ ހޮސްޕިޓަލުން ކުރި އޮޕަރޭޝަނުގައި ފަރުތޮޅީގެ ދަތުގެ ގިނަ ބައިތަކެއް އޭނާގެ މައިބަދައިން ނަގާފައިވެއެވެ. މި އޮޕަރޭޝަން ކުރިޔަށް ގެންދިޔަ ޑޮކްޓަރުން ސިފަކުރީ، އެއީ ވަރަށް އުނދަގޫ އޮޕަރޭޝަނެއްގެ ގޮތުގައެވެ.

ނަމަވެސް ކާމިޔާބު އޮޕަރޭޝަނަކަށްފަހު މިހާރު އޭނާ ރަގަޅުވަމުން އަންނަކަމަށް ހޮސްޕިޓަލުން ހާމަކޮށްފައިވެއެވެ.

ފަރުތޮޅިއަކީ ބާރު ދުވެލީގައި އައިސް ކުއްލިއަކަށް ހަމަލާދޭ މަހެކެވެ. ފީނާ މީހުންގެ ފަހަތުގައި ވަރަށް ގިނަ ފަހަރު ފަރުތޮޅި އުޅޭ ނަމަވެސް ފަރުތޮޅިއަކީ ގަސްދުގައި އިންސާނުންނަށް ހަމަލާދޭ މަހެއް ނޫނެވެ.