ސުޕްރީމް ކޯޓުގެ ފަނޑިޔާރުކަމަށް 3 ބޭފުޅުން ކުރިމަތިލައިފި

ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމަށް އިތުރު ފުރުސަތަކަށް ޖުޑިޝަލް ސާވިސް ކޮމިޝަނުން ހުޅުވާލުމުން 3 ބޭފުޅަކު ކުރިމަތިލައްވައިފިއެވެ.

ސުޕްރީމް ކޯޓުގެ ފަނޑިޔާރުކަމަށް ކުރިމަތިލުމަށް ޖުޑީޝަލް ސަރވިސް ކޮމިޝަނުން ހުޅުވާލި ފުރުސަތުގައި، ފުރަތަމަ ކުރި އިއުލާނާ ގުޅިގެން މަޤާމަށް ކުރިމަތިލައްވާފައި ވަނީ، ކުރީގެ ޑެޕިއުޓީ ޕްރޮސެކިއުޓަރ ޖެނެރަލް މަރިޔަމް ނިހާޔަތު އެކަންޏެވެ. ނަމަވެސް، ޖޭއެސްސީން ކުރި ދެވަނަ އިއުލާނާ ގުޅިގެން ހައިކޯޓުގެ އިސް ފަނޑިޔާރު ހުސައިން ޝަހީދު އަދި ޤާނޫނީ ވަކީލު ރުސްދުﷲ އިބްރާހީމް ވެސް މިހާރު ވަނީ ކުރިމަތިލައްވާފައެވެ.

ސުޕްރީމް ކޯޓުގެ ފަނޑިޔާރުކަމަށް ކުރިމަތިލެވޭނީ 30 އަހަރު ފުރި، އިސްލާމީ ޝަރީޢާ ނުވަތަ ޤާނޫނާއި އިސްލާމީ ޝަރީޢާގެ ރޮނގުން ފުރަތަމަ ޑިގްރީ ހާސިލުކޮށް، ފަނޑިޔާރުކަމުގައި ނުވަތަ ވަކީލުކަމުގައި މަދުވެގެން 7 އަހަރުގެ ތަޖުރިބާ ލިބިފައިވާ ފަރާތްތަކަށެވެ.

މި މަޤާމު ހުސްވެފައިވަނީ ފަނޑިޔާރު ހުސްނުއްސުޢޫދު އިސްތިއުފާ ދެއްވުމާ ގުޅިގެންނެވެ. އަދި މިވަގުތު ފަނޑިޔާރު ޑރ. އަޒްމިރާލްދާ ޒާހިރާއި، ފަނޑިޔާރު މަހާޒް އަލީ ޒާހިރު ވަނީ ސަސްޕެންޝަނުގައެވެ.