ޚަބަރު
ރައީސް މުޢިއްޒު އަށް މަރުގެ ހަމަލާއެއް ދިނުމަށް ދިން އިންޒާރު ޕީއެންސީއިން ކުށްވެރިކޮށްފި!
ރައީސް ޑރ މުޙައްމަދު މުޢިއްޒު. ފޮޓޯ:ރައީސް އޮފީސް
ރައީސުލްޖުމްހޫރިއްޔާ އަށް މަރުގެ ހަމަލާއެއް ދިނުމަށް ދިން އިންޒާރު ވެރިކަންކުރާ ޕީއެންސީއިން ކުށްވެރިކޮށްފިއެވެ.
ޕީއެންސީއިން ބުނީ ސޯޝަލްމީޑިއާގައި ރައީސް ޑރ މުޢިއްޒު އަވަހާރަކޮށްލާނެ ކަމަށްބުނެ ދީފައިވާ އިންޒާރު ކުށްވެރިކުރާކަމަށެވެ. އަދި އެމަނިކުފާނުގެ ފުރާނަފުޅަށް ގެއްލުވާނެ ޢަމަލެއް ހިންގާނެކަމަށް ބުނެ ދިން އިންޒާރު އެޕާޓީއިން ކުށްވެރިކުރާ ކަމަށެވެ.
އަދި އެހާފާޅުކަން ބޮޑު ގޮތެއްގައި ރައީސް ޑރ މުޢިއްޒުގެ ފުރާނަފުޅަށް ނުރައެްކާ ވާނެ ފަދަ ޢަމަލެއް ހިންގާނެ ކަމަށް ބުނެފައިވާ މައްސަލަ ދައުލަތުގެ ތަޙުޤީޤީ އިދާރާތަކުން އިސްކަމެއް ދީގެން ބަލަންޖެހޭ ކަމަށް އެޕާޓީއިން ދެކޭކަމަށް ބުނެފައިވެއެވެ.
އަދި މިމައްސަލަ ސީރިއަސް މައްސަލައެއްގެ ގޮތުގައި ބަލައި، އެމައްސަލާގައި އެކަށީގެންވާ ހަލުއި ތަޙުޤީޤެއް ހިންގެވުމަށް ޤާނޫނު ތަންފީޒުކުރާ ފަރާތްތަކަށް އެޕާޓީއިން ވަނީ ގޮވައިލައިފައެވެ.
މީގެއިތުރުން ރައީސް ޑރ މުޢިއްޒުގެ ސަލާމަތާއި ރައްކާތެރިކަން ކަށަވަރުކުރުމުގެ ޒިންމާ އޮތް ދައުލަތުގެ އިދާރާތަކުން އެމަސައްކަތް އެންމެ އެކަށީގެންވާ ގޮތަށް ކުރިއަށްގެންދާނެ ކަމަށް އެޕާޓީ އިން ޝައްކުނުކުރާނެ ކަމަށް ޔަޤީންކުރާ ކަމަށްވެސް އެޕާޓީއިން ބުނެފައިވެއެވެ.
