އިސްލާމީ ދާއިރާގެ މުހިންމު 14 މަޝްރޫޢެއްގައި މިއަދު ސޮއިކޮށްފި

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އިސްލާމީ ދާއިރާގެ ވަޢުދުތަކުގެ ތެރޭގައި ހިމެނޭ 14 މަޝްރޫޢުގެ ޢަމަލީ މަސައްކަތް ފެށުމަށް ކުންފުނިތަކާއި އިސްލާމީ ކަންތައްތަކާއި ބެހޭ ވުޒާރާ އާއި އެކު ސޮއިކޮށްފިއެވެ.

މިއަދު އިސްލާމީ މަރުކަޒު ހޯލުގައި ކުރިއަށް ދިޔަ ރަސްމިއްޔާތުގައި ޤުރުއާނާބެހޭ މަރުކަޒުގެ 2 ގޮފި އިމާރާތްކުރުމަށް އެއްބަސްވުމުގައި ސޮއި ކޮށްފައިވެއެވެ. ޤުރުއާނާ ބެހޭ މަރުކަޒުގެ ދެ ގޮފި ގާއިމް ކުރުމަށް ހަމަޖެހިފައިވަނީ ލ މަބައިދޫ އަދި ޅ އޮޅުވެލިފުށީގައެވެ.

މީގެ އިތުރުން އިސްލާމީ މަރުކަޒެއް އިމާރާތްކުރުމަށް އެއްބަސްވުމުގައި ސޮއި ކޮށްފައިވެއެވެ. އިސްލާމީ މަރުކަޒު ގާއިމް ކުރުމަށް ހަމަޖެހިފައިވަނީ ށ.ފޯކައިދޫގައެވެ.

ހަމަމިއާއިއެކު 11 މިސްކިތެއް އިމާރާތްކުރުމަށް އެއްބަސްވުމުގައި ސޮއި ކޮށްފައިވެއެވެ. މި މަޝްރޫޢުތަކުގެ ތެރެއިން 11 މަޝްރޫޢުއެއް ހަވާލު ކުރެވުނީ ފެނެކަ ކޯޕަރޭޝަންއަށެވެ. މީގެއިތުރުން 3 މަޝްރޫޢުއެއް ހަވާލުކޮށްފައިވަނީ އެމްޓީސީސީއަށެވެ.

އެކި ރަށްރަށުގައި އެޅުމަށް ހަމަޖެހިފައިވާ މިމިސްކިތްތަަކަކީ ސަރުކާރުގެ ޚަރަދުގައި އަޅާ މިސްކިތްތަކެކެވެ.

މިމަޝްރޫޢުތަކުގެ ދަށުން ގާއިމްކުރަ ޤުރުއާނާ ބެހޭ މަރުކަޒުތަކުގައި 3 ކުލާސް ރޫމާއި ލައިބްރަރީ އަދި ހޯލު ހިމެނޭނެ ކަމަށާއި، ށ. ފޯކައިދޫގައި ގާއިމްކުރާ އިސްލާމީ މަރުކަޒުގައި ނަމާދު ކުރާ ބައިގެ އިތުރުން ޖަލްސާކުރާ ހޯލާއި ލައިބްރަރީ، ކުލާސް ރޫމް ހިމެނޭނެ ކަމަށް އިސްލާމީ ވުޒާރާއިން ބުނެއެވެ.

އަދި ގާއިމް ކުރާ މިސްކިތްތަކުގައި ސޯލާ އާއި އޭސީ ހަރުކޮށް ވިނައިލް ފްލޯރިންގ އަޅާނެ ކަމަށާއި، އަދި ޤުރުއާން ކިޔަވައިދޭ ކުލާހެއް މިސްކިތުގައި ހެދޭނެ ކަަމަށްވެސް އެވުޒާރާއިން ބުނެއެވެ.

އިސްލާމީ ކަންތައްތަކާ ބެހޭ ވުޒާރާގެ ފަރާތުން އެއްބަސްވުންތަކުގައި ސޮއި ކުރެއްވީ އިސްލާމީ ކަންތައްތަކާބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދެވެ.

ފެނަކަ ކޯޕަރޭޝަން ލިމިޓެޑްގެ ފަރާތުން ސޮއި ކުރެއްވީ އެކުންފުނީގެ މެނޭޖިންގ ޑިރެކްޓަރ މޭޖަރ (ރޓޑ) މުހައްމަދު ނަޖާހެވެ. އަދި އެމްޓީސީސީގެ ފަރާތުން ސޮއި ކުރެއްވީ އެކުންފުނީގެ މެނޭޖިންގ ޑިރެކްޓަރ ޑީސީޕީ (ރޓޑ) އަޙުމަދު ސައުދީ އެވެ.