2029 ގައި އިންސާނުން މާސްއަށް ފޮނުވިދާނެ: އިލޮން މަސްކް

މިދިޔަ ހޮނިހިރު ދުވަހު ސްޕޭސްއެކްސްގެ ބާނީ އިލޮން މަސްކް ވިދާޅުވެފައިވަނީ، 2026 ވަނަ އަހަރުގެ ފަހުކޮޅު މާސްއަށް ސްޓާޝިޕް ރޮކެޓް ފުރުވާލާނެ ކަމަށެވެ. އަދި މި ދަތުރުގައި ޓެސްލާގެ އޮޕްޓިމަސް ހިއުމަނޮއިޑް ރޮބޮޓް ވެސް ގެންދާނެ ކަމަށް އޭނާ ވިދާޅުވިއެވެ. މީގެ އިތުރުން، މާސްއަށް އިންސާނުން ފޮނުވުމުގެ މަސައްކަތް 2029 ވަނަ އަހަރު ފެށިދާނެ ކަމަށް އޭނާ ވިދާޅުވިއެވެ.

އިލޮން މަސްކްގެ އެކްސް ސޯޝަލް ނެޓްވޯކްގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ، 

އަންނަ އަހަރުގެ ފަހުކޮޅު ސްޓާޝިޕް މާސްއަށް ފުރާނެ، އަދި އޮޕްޓިމަސް ވެސް ގެންދާނެ. އެ ދަތުރުތައް ރަނގަޅަށް ގޮސްފިނަމަ، 2029 ގައި އިންސާނުން ފޮނުވަން ފެށިދާނެ. އެހެންނަމަވެސް 2031 ގައި ފެށުން ގާތް
ދުނިޔޭގެ އެންމެ ބޮޑު އަދި އެންމެ ބާރުގަދަ ރޮކެޓް ކަމަށްވާ ސްޓާޝިޕަކީ މާސް އާބާދުކުރުމުގެ އިލޮން މަސްކްގެ ދުރު ރާސްތާގެ ވިޝަންގެ މައިގަނޑު ބައެކެވެ. މީގެ އިތުރުން، ނާސާގެ އާޓެމިސް ޕްރޮގްރާމްގެ ދަށުން ހަނދަށް އަލުން އިންސާނުން ފޮނުވުމަށް ބޭނުންވާ ލޫނަރ ލޭންޑަރެއްގެ ގޮތުގައި ވެސް ސްޓާޝިޕްގެ ބަދަލުކުރެވިފައިވާ ވަރޝަނެއް ބޭނުންކުރުމަށް ވަނީ ހަމަޖެހިފައެވެ.

ނަމަވެސް، މި މިޝަންތައް ކުރިއަށް ގެންދިއުމުގެ ކުރިން، ސްޓާޝިޕްގެ އިތުބާރު ކަށަވަރުކުރުމާއި، ފަޅުވެރިންނަށް ރައްކާތެރި ކަމާއި، އުދުހުމުގައި ތެޔޮ އަލުން އެޅުމުގެ ޤާބިލުކަން ސާބިތުކޮށްދޭން ޖެހެއެވެ. މިއީ ދުރު މަންޒިލްތަކަށް ދަތުރުކުރުމަށް ވަރަށް މުހިންމު ކަމެކެވެ.

މި މަހު ކުރިއަށް ގެންދިޔަ ސްޓާޝިޕްގެ އެންމެ ފަހުގެ ޓެސްޓް ފްލައިޓް ނިމިގެން ދިޔައީ ހުޅުގަނޑަކާ އެކު ގޮއްވާލައިގެންނެވެ. މިއީ ކުރިން ކުރި މަސައްކަތާ ވަރަށް އެއްގޮތް ނަތީޖާއެކެވެ. މި ހާދިސާއާ ގުޅިގެން ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ބުނެފައިވަނީ، އަލުން ޓެސްޓް ފްލައިޓެއް ކުރުމުގެ ކުރިން ސްޕޭސްއެކްސްއިން ތަޙްޤީޤެއް ހަދަންޖެހޭނެ ކަމަށެވެ.