ސިޔާސީ ފައިދާއަށް ކުޑަކުދިންގެ ޙައްޤުތަކަށް އަރައިގަތުން: ހުއްޓާލަންޖެހޭ ނާތަހުޒީބު ދަށުދަރަޖައިގެ ޢަމަލެއް!

ސިޔާސީ ބޭނުންތަކަށް ކުޑަކުދިންގެ ޙައްޤުތަކަށް އަރައިގަތުމަކީ، ރާއްޖޭގައި ކޮންމެ ބޭފުޅަކު ވެރިކަމަށް އެރި ކަމުގައިވިޔަސް ތަކުރާރުވަމުން އަންނަ ނާތަހުޒީބު ޢަމަލެކެވެ. ސަރުކާރުގެ މަތީ މަޤާމުތަކުގައި ތިބޭ ބޭފުޅުންގެ ދަރިންނަށް ނުވަތަ ޢާއިލާއަށް ނިސްބަތްވާ ކޮންމެވެސް މީހަކަށް ރައްދުވާގޮތަށް، އެ ފަރާތްތަކުގެ އަބުރުކަތިލުމަށް ފަތުރާ ވާހަކަތަކީ މިހާރުގެ ސިޔާސީ މަޝްރަހުގައި "ޓްރެންޑް" އަކަށް ވެފައި އޮންނަ ކަމެކެވެ. 

ނަމަވެސް، އަޖައިބުވަނީ ދިވެހިރާއްޖެފަދަ ކުޑަކުދިންގެ ޙައްޤުތަކަށް ފުޅާ ދާއިރާއެއްގައި ވަކާލާތުކުރާ ޤައުމަކުން މިފަދަ ދަށުދަރަޖައިގެ ޢަމަލުތައް ފެންނާތީއެވެ. ދިވެހިރާއްޖެފަދަ އިސްލާމީ ޤައުމެއްގައި މިފަދަ ޢަމަލުތައް ތަކުރާރުވަމުން ދާތީއެވެ. ހަމަ އެހެންމެ، ރާއްޖޭގެ ޤާނޫނުތަކުގައިވެސް ކުޑަ ކުދިންގެ ޙައްގުތަކާއި ރައްކާތެރިކަން ކަށަވަރުކުރުމާއި ގުޅޭ އެތައް ހަރުކަށި ނުކުތާއެއް ލިޔެ ޢާންމުކޮށްފައި ވާތީއެވެ. އަދި ކުޑަކުދިންގެ ޙައްޤުތަކަށް ރައްކާތެރިވުމަށް އެތަކެއް ހޭލުންތެރިކުރުމުގެ ޕްރޮގްރާމްތަކެއް ހިންގާ، އެއާއި ދިމާ އިދިކޮޅަށް ދިވެހިންގެ ޢަމަލުތައް ފެންނާތީއެވެ. 

ސިޔާސީ ފައިދާއަށް ކުޑަކުދިންގެ ޙައްޤުތަކަށް އަރައިގަތުމުން، މީސްމީޑިއާގައި އެކި މަންސަތަކުގައި ކޮންމެ ބައެއްވެސް ކަންބޮޑުވުން ފާޅުކުރަމުން ދެއެވެ. އެއްބަޔަކަށް މި ޢަމަލުތައް މަޖާވެ، މިކަމާއި ދޭތެރޭގައި ހަޖޫޖަހާ އެ މަލާމާތްތަކާއި ފުރައްސާރާގައި ބައިވެރިވެއެވެ. ނަމަވެސް، ދެން ތިބޭ ފަރާތްތަކުން މިކަމާ ކަންބޮޑުވެ، ކުޑަކުދިންގެ ޙައްޤުތަކާއި ބެހޭގޮތުން ޤާނޫނުގައި ބަޔާންކޮށްފައިވާ ނުކުތާތައް ސޯޝަލް މީޑިއާގެ ތެރެއަށް ދޫކޮށްލައެވެ. އަދި މި ކަންކަމާއި ގުޅޭ ގޮތުން ކަމާ ބެހޭ ފަރާތްތަކުން ޖަވާބުދާރީވެ، ހަރުކަށި ފިޔަވަޅުތައް އެޅުމަށް ގޮވާލައެވެ. 

މިފަހަރު ވެސް މިވަނީ މިފަދަ މައްސަލައެއް ފެންމަތިވެފައެވެ. އެމްޑީޕީ ފަދަ އިންސާނީ ޙައްޤުތަކަށް ވަކާލާތުކުރާ ޕާޓީއަކުން ކުރިއަށް ގެންދިޔަ މުޒާހަރާއެއްގައި ކުޑަކުއްޖެއްގެ ކަރާމާތަށް އުނިކަން އަންނަ ފަދަ ވާހަކަތަކެއް ދެއްކީއެވެ. ކުޑަކުއްޖެއްގެ އަބުރާއި ޢިއްޒަތް ނަގައިލާ، އެންމެންގެ ބަދުބަސްތައް ރައްދުވާ އަމާޒަކަށް އެކުއްޖާ ވެގެން ދިޔައީއެވެ. އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަރިކަލުންނާއި ގުޅޭގޮތުން ގަލޮޅު ދެކުނު ދާއިރާގެ މެމްބަރު މީކާއިލް މުހައްމަދު ނަސީމްގެ މަންމާފުޅު، އަދި އެމްޑީޕީގެ އިސް އެކްޓިވިސްޓެއްކަމަށްވާ މަރިޔަމް ޒުބައިރު، މަންދީ ދެއްކި ޙަޤީޤަތާއި ޚިލާފު ވާހަކަތައް މިވަނީ މުޅި ސިޔާސީ ދާއިރާއާއި އާންމުންގެ ވެސް ލޭ ކައްކުވާލި ފަދަ ވާހަކަތަކަކަށް ވެފައެވެ.

ކުޑަކުއްޖެއްގެ ކަރާމާތަށް އުނިކަން އަންނަފަދަ ގޮތަކަށް މިފަދަ ޙަޤީޤަތެއް ނެތް ވާހަކަތައް ދެއްކިއިރު، މިއީ ކިހާ ދަށުދަރަޖައިގެ ޢަމަލެއްކަން އެފަދަ ފަރާތްތަކަށް ނުވިސްނުމަކީ ޙަޤީޤަތުގައި ވެސް މުޖްތަމަޢުން ކަންބޮޑުވުން ފާޅުކުރަންޖެހޭ ކަމެކެވެ. ހިތާމައަކީ، މި ވާހަކަތައް ހުއްޓުވައި، މިކަމާއި ދޭތެރޭގައި ފިޔަވަޅު އެޅުމުގެ ބަދަލުގައި ޕާޓީގެ ދެންތިބި މެންބަރުން ވެސް މިކަމަށް ތާޢީދުކޮށް ހިތްވަރު ދިނުމެވެ. މި ޢަމަލުތައް ކުށްވެރިކުރުމުގެ ބަދަލުގައި މަންދީގެ ޢަމަލުތައް ދިފާއުކުރީއެވެ. ސިޔާސީ ގޮތުން ޕާޓީއިން ބަލިވާ ކޮންމެ ފަހަރަކު ޕާޓީގެ މެންބަރުންގެ ވިހަގަދަ ބަސްތައް ކުޑަކުދިންނަށް އަމާޒުކުރުމުގެ ބަދަލުގައި ހަނުހުރުން ބުއްދިވެރިއެއް ނޫންހެއްޔެއެވެ. 

މިއީ ރަނގަޅު ގޮތް ނޫން ނަމަވެސް، ކޮންމެވެސް ބަޔަކު މިޢަމަލުތައް ކުރީތާއެވެ. ދެން އޮތީ މިކަމާއިމެދު، ފިޔަވަޅު އަޅާ ފަރާތްތަކެވެ. މި ޢަމަލުތައް ހުއްޓުވުމަށް ކަމާ ބެހޭ އިދާރާތަކަށް މައްސަލަ ހުށައަޅާ ފަރާތްތައް ގިނަ ބަޔަކަށް ގޯސްވާނެކަން ޔަޤީނެވެ. ރައީސުލްޖުމްހޫރިއްޔާގެ ޢާއިލާއިން މިކަމުގައި ކުށްވެރިވާ ފަރާތްތަކާއި މެދު މަދަނީ ދަޢުވާކުރަން ނިންމެވުން ވެސް ވެގެން މިދިޔައީ ނާތަހުޒީބު ވިސްނުމެއް ގެންގުޅުއްވާ ފަރާތްތަކުގެ ރުޅިގަނޑު ކައްކުވާލި ކަމަކަށެވެ. ނަމަވެސް ގިނަ ބަޔަކަށް ނުވިސްނޭ ކަމަކީ، އެކަމަނާ އަކީ ރާއްޖޭގެ ރައީސްގެ އަނބިކަނބަލުންގެ އިތުރުން ކުދި ދަރީންތަކެއްގެ މަންމައެއް ކަމެވެ. އެކަމަނާ މި ފިޔަވަޅުތައް އަޅުއްވަން ނިންމެވީ މަންމައެއްގެ ޙައިސިއްޔަތުން، ސަރުކާރުގެ އެއްވެސް ބައިވެރިވުމެއް އޮވެގެނެއް ނޫނެވެ.

އެހެންކަމުން، ރާއްޖޭގެ ޤާނޫނު އަސާސީގައި މިފަދަ ޚިޔާލުފާޅުކުރުން ބޮޑު ކުށެއްގެ ގޮތުގައި ބަޔާންކޮށްފައި ވާއިރު މިފަދަ ޢަމަލުތައް ހުއްޓާލާނީ ކޮން ދުވަހުކުން ބާއެވެ. ސިޔާސީ ޕާޓީތަކުން ކުރިއަށް ގެންދާ އެކިއެކި ޙަރަކާތްތަކުގައި މިފަދަ ޢަމަލުތައް ތަކުރާރުވަމުން އަންނައިރު، މިކަމާއި މެދު ހަރުކަށި ފިޔަވަޅެއް އަޅާނީ ކޮން އިރަކުން ބާއެވެ. މުޖްތަމަޢުގެ ތެރޭގައި ފިތުނަފަސާދަ އުފެދޭ ގޮތަށް މިފަދަ ޙަޤީޤަތާއި ޚިލާފު ސާބިތުނުހިފޭ ވާހަކަތައް ދެއްކުމާއި ދެކޮޅަށް ނިކުތުމަށް ދިވެހީންގެ ސިކުނޑިތައް ތަހުޒީބުވާނެ ބާއެވެ؟