ޑައިމޯފިން ޓްރެފިކް ކުރުމުގެ ކުށުގައި މީހަކަށް އުމުރުދުވަހުގެ ޖަލު ޙުކުމެއް އިއްވައިފި!

ޑައިމޯފިން ޓްރެފިކް ކުރުމުގެ ކުށުގައި ދިވެހި ފިރިހެނަކަށް އުމުރުދުވަހުގެ ޖަލު ޙުކުމެއް އިއްވައިފިއެވެ. 

ކްރިމިނަލް ކޯޓުން މި ޙުކުމް އިއްވައިފައިވަނީ ޢަބްދުލްވާޙިދު ޙާމިދުގެ މައްޗަށެވެ. އޭނާގެ މައްޗަށް މި ޙުކުމް ކޮށްފައިވަނީ 2019 ވަނަ އަހަރުގެ ޖަނަވަރީ މަހު ހުޅުމާލެއިން މާލެއަށް ދަތުރުކުރަމުންދަނިކޮށް، ފުލުހުން އޭނާ ހުއްޓުވައި ބަލައި ފާސްކުރުމުން 100 ގްރާމްގެ ޑައިމޯފިން ފެނުނު މައްސަލާގައެވެ. 

ކްރިމިނަލް ކޯޓުން މިމައްްސަލާގައި ނިންމާފައިވަނީ ޢަބްދުލްވާޙިދުގެ މައްޗަށް އޭނާ އުމުރުދުވަހަށް ޖަލަށް ލުމަށާއި، އެއްލައްކަ ރުފިޔާއިން ޖޫރިމަނާކުރުމަށެވެ. 

ޢަބްދުލްވާޙިދުގެ ފަރާތުން ހުށަހެޅި ހެކިވެރިޔާ ބުނެފައިވަނީ އޭނާ އަށް ދިނީ ދިވެހި ބޭހެއް ކަމަށެވެ. ނަމަވެސް ޝަރީޢަތުން ފާހަގަކޮށްފައިވަނީ ހެކިވެރިޔާގެ ވާހަކަތަކުގައި ހަމަނުޖެހޭ ކަންތައްތަކެއް ހުރިަކަމަށެވެ. އަދި ދިފާއީ ހެކިވެރިޔާ ދިން ތަކެތި ކަމަށް ބުނާ އެއްޗަކީ ޢަބްދުލްވާޙިދުގެ ޖީބުން ފެނުނު އެއްޗެއްކަން ކަށަވަރުކޮށްދެވިފައެއް ނުވާކަމަށެވެ.

ދައުލަތުން ހުށަހެޅި ހެކިތަކަށް ބަލާއިރު، ވާޙިދުގެ މައްޗަށް ކުރެވުނު ދައުވާ އެކަށީގެންވާ ޝައްކެއްނެތް މިންވަރަށް ސާބިތުވާކަމަށް ކޯޓުން ނިންމިއެވެ. އޭނާ ކުރިން 14 ދުވަސް ބަންދުގައި ހޭދަކޮށްފައިވާތީ، މިހާރު ތަންފީޒުކުރަންޖެހޭ އަދަބަކީ 24 އަހަރާއި 11 މަހާއި 16 ދުވަހެވެ. ޖޫރިމަނާ ދެއްކުމަށް 12 މަސްދުވަހުގެ މުއްދަތެއް ދީފައިވާއިރު، މި ޙުކުމް އިސްތިއުނާފު ކުރުމުގެ ފުރުސަތު ޢަބްދުލްވާޙިދަށް އޮތްކަން ފާހަގަކުރެވެއެވެ.