ކުޅިވަރު
ފޮރެސްޓުން ތިންވަނައިގައި އަތްގަދަކުރިއިރު، ސިޓީ ޗެމްޕިއަންސް ލީގާ ފެޔަށް

މަރްމޯޝްގެ ގޯލަށްފަހު އުފާފާޅުކުރަނީ، ފޮޓޯ: މެންޗެސްޓަރ ސިޓީ
ހުލާސާ
މެންޗެސްޓަރ ސިޓީ އާއި ލީގުގެ އެއްވަނައިގައި އޮތް ލިވަޕޫލްއާ ދެމެދު 22 ޕޮއިންޓުގެ ފަރަގެއް.
އިންގްލިޝް ޕްރިމިއަރ ލީގުގައި ރޭ ނޮޓިންހަމް ފޮރެސްޓް 4-2 އިން އިޕްސްވިޗް ޓައުން ބަލިކޮށް ލީގުގެ ތިންވަނައިގައި އަތްގަދަކުރިއިރު، ބްރައިޓަން އެންޑް ހޯވް އެލްބިއޯންއާ ބައްދަލުކުރި މެޗު 2-2 އިން އެއްވަރުވެ، ޗެމްޕިއަން މެންޗެސްޓަރ ސިޓީއިން ޗެމްޕިއަންސް ލީގުގެ ޖާގައެއް ހޯދުމަށް ކުރާ މަސައްކަތުގައި އިތުރު މާޔޫސްކަމެއް ލިބިއްޖެއެވެ.
އެންމެ ފަހުން ކުޅުނު ދެ ސީޒަނުގައި ވެސް ރެލިގޭޝަން ޒޯނުގައި އުޅުނު ފޮރެސްޓުން ވަނީ ރޭގެ މެޗުގައި 7 މިނެޓު ތެރޭގައި އިޕްސްވިޗްކޮޅަށް 3 ގޯލު ޖަހާފައެވެ. ފުރަތަމަ ހާފު ނިމެން 10 މިނެޓަށްވެފައި ވަނިކޮށް ފަހަތަށް ކުޅޭ ނިކޮލާ މިލެންކޮވިޗް އެ ޓީމަށް ލީޑު ނަގައިދިންއިރު، އެ ހާފު ނިމުމުގެ ކުރިން އެންތޮނީ އެލާންގާ ވަނީ 2 ގޯލު ކާމިޔާބުކޮށްފައެވެ.
އިޕްސްވިޗުގެ ޖެންސް-ލީސް ކައުސްޓް މެޗު ނިމެން ކައިރިވެފައި ވަނިކޮށް އެ ޓީމަށް ގޯލެއް ކާމިޔާބުކުރި ނަމަވެސް، މެޗުގެ ފުރިހަމަ ވަގުތު ހަމަވުމުގެކުރިން ފޮރެސްޓުގެ ފޯވާޑް، ޖޯޓާ ސިލްވާ ވަނީ އިތުރު ގޯލެއް ކާމިޔާބުކޮށްފައެވެ. އަދި ނަތީޖާއަށް މާބޮޑު ބަދަލެއް ނުގެނެވުނު ނަމަވެސް، އިޕްސްވިޗުން މެޗު ނިންމާލީ އިތުރު ވަގުތު ޖޯޖް ހާރސްޓް ކާމިޔާބުކުރި ގޯލާއެކު 4-2 އިންނެވެ.
މި ނަތީޖާއާއެކު ފޮރެސްޓު ލީގުގެ ތިންވަނައިގައި އޮތީ 54 ޕޮއިންޓާއެކުއެވެ. އެގޮތުން ހަތަރުވަނައިގައި އޮތް ޗެލްސީއާ 5 ޕޮއިންޓުގެ ފަރަގެއް އޮތްއިރު، ދެވަނައިގައި އޮތް އާސެނަލްއާ އޮތީ އެންމެ ޕޮއިންޓެއްގެ ފަރަގެކެވެ. ނަމަވެސް ޗެލްސީއާ އާސެނަލް މިރޭ ބައްދަލުކުރާއިރު، މި މެޗަކީ މި ދެ ޓީމަށް އޮތް އެޑްވާންޓޭޖެކެވެ.
ސިޓީ އާއި ބްރައިޓަން ބައްދަލުކުރި މެޗުގައި ފުރަތަމަ ލީޑު ނެގީ ސިޓީއިންނެވެ. އެ ޓީމުގެ އުމަރު މަރްމޯޝްއަށް ބްރައިޓަންގެ ޕެނަލްޓީ އޭރިއާ ތެރެއިންކުރި ފައުލަކަށް ލިބުނު ޕެނަލްޓީ ކާމިޔާބުކުރީ އާރލިން ހާލަންޑެވެ. ނަމަވެސް އޭގެ 11 މިނެޓުފަހުން، ސިޓީގެ ޕެނަލްޓީ އޭރިއާގެ ބޭރުން ލިބުނު ހިލޭޖެހުމެއްގައި އެ ޓީމަށް މެޗުގެ ނަތީޖާ ހަމަހަމަކޮށްދިނީ އެސްޓުޕިނާއެވެ.
ސިޓީއިން ފުރަތަމަ ހާފު ނިމުމުގެ ކުރިން މަރްމޯޝްގެ ގޯލަކުން އަލުން ލީޑު ނެގިނަމަވެސް، ދެވަނަ ހާފުގެ ކުރީކޮޅު ސިޓީގެ ޑިފެންޑަރ، އަބްދުލްކާދިރު ޚުސަނޯވް އަތުން ބައިކޮޅަށް ވަތް ގޯލާއެކު، މެޗު ނިމުނީ ދެ ޓީމު އެއްވަރުވެގެނެވެ.
މި ނަތީޖާއާއެކު އެއްވަނައިގައި އޮތް ލިވަޕޫލްއާ ސިޓީއާ ދެމެދު 22 ޕޮއިންޓުގެ ފަރަގެއް މިހާރު އެބައޮތެވެ.