ސިޔާސީ ބޭނުމެއްގައި ކުޑަކުއްޖެއްގެ ކަރާމާތަށް ގެއްލުންދިނުމުގެ ދައުވާ، މަންދީގެ މައްޗަށް ކުރުމަށް ގޮވާލައިފި

ޗައިލްޑް އެބިއުސް ޕްރިވެންޝަން ސޮސައިޓީން ކުށެއްނެތް މައުސޫމު ކުއްޖެއްގެ އަބުރު ކަތިލާ ކަރާމާތް ނަގާލިކަމުގެ ކުށުގެ ދައުވާއިން މަންދި ޒުބައިރުގެ މައްޗަށް ދައުވާ އުފުލާ، މި މައްސަލަ ސީރިއަސް މައްސަލައެއް ގޮތުގައި ބެލުމަށް ގޮވައިލައިފިއެވެ.

މި ސޮސައިޓީއިން އިއްޔެ ނެރުނު ބަޔާނެއްގައި، މިފަދަ މައްސަލަތަކަކީ މާތްވެގެންވާ އިސްލާމް ދީނާވެސް ފުށުއަރާ ކަންކަމުގެ ގޮތުގައި ވަނީ ފާހަގަކުރައްވާފައެވެ. އިސްލާމް ދީނަކީ ކުޑަކުދިންނަށް ޚާއްސަ އޯގާތެރިކަމެއް ފޯރުކޮށްދޭ ދީނެއްކަން ފާހަގަކުރަށްވަމުން ޗައިލްޑް އެބިއުސް ޕްރިވެންޝަން ސޮސައިޓީން ބުނެފައި ވަނީ، ހަނގުރާމަތަކުގައި ވެސް ކުޑަކުދިން މަރާހެދުން ކުށެއްގެގޮތުގައި ކަނޑައަޅައިފައިވާ ވުމުންވެސް ކުދިންގެ ކަރާމާތް ރައްކާތެރިކުރުމަށް ދީން ބާރުއަޅާ މިންވަރު ހާމަވެގެންދާކަމަށެވެ. 

ނަމަވެސް މިހުރިހާ ކަމަކަށް ގޮންޖަހައި، ދާދިފަހުން އެމްޑީޕީން ބޭއްވި މުޒާހަރާގައި ކުޑަކުއްޖެއްގެ ކަރާމާތަށް އަރައިގަނެ އެކުއްޖާއާ ގުޅޭގޮތުން ހަޤީޤަތާއި ޚިލާފު ވާހަކަތަކެއް ޢާންމު ތަނެއްގައި ފެތުރި ފެތުރުން އެ ޖަމިއްޔާއިން އެންމެ ހަރުކަށި އިބާރާތުން ކުށްވެރިކުރާކަމަށް ބުނެފައިވެއެވެ. 

މި މައްސަލާގައި މި ޖަމިއްޔާއިން ބަޔާން ނެރުނީ ހަމައެކަނި ރައީސުލްޖުމްހޫރިއްޔާގެ ދަރިކަލުންނަށް އަމާޒުކޮށް ދެއްކި ވާހަކައަކަށް ވީތީއެއް ނޫން. އެހެން ނަމަވެސް އެބޭފުޅާއަކީ ވެސް ކުޑަކުއްޖެއް ކަމުގައިވެފައި އެބޭފުޅާގެ ވެސް ހައްޤަކާއި އަބުރަކާއި އިއްޒަތަކާއި އަދި ކަރާމާތެއް ވާނެތީ.

ބަޔާނުގައި ބުނެފައިވެއެވެ.

އެފަދަ ހަޤީޤަތެއް ނެތް ވާހަކަ ދެއްކުމުގެ ސަބަބުން ނަފްސާނީ ގޮތުން މި ހާދިސާ ރައްދުވާ ކުއްޖާއާއި އެކުއްޖާގެ އާއިލާއަށް ވަރަށް ބޮޑަށް އަސަރު ކުރާނެކަމަށް ވެސް ބުނެފައިވެއެވެ.

ސިޔާސީ ބޭނުމެއްގައި ކުށެއްނެތް މައުސޫމް ކުއްޖެއްގެ އަބުރު ކަތިލާ ކަރާމާތް ގެއްލުވާލިކަމުގެ ކުށުގެ ދައުވާ މަންދި ޒުބައިރުގެ މައްޗަށް އުފުލުމަށް ގޮވާލަމެވެ. މި މައްސަލަ ސީރިއަސް ކްރައިމްއެއްގެ ގޮތުގައި ބެލުމަށް ދިވެހި ފުލުހުންގެ ޚިދުމަތަށް ގޮވާލަމެވެ. އަދި ދައުވާ ކުރަންޖެހޭ ފަރާތްތަކަށް ދައުވާ ކުރެއްވުމަށް ފޮނުވަންޖެހޭ ފަރާތްތަކަށް ފޮނުއްވައި ދެއްވުން އަވަސްކޮށްދެއްވުމަށް ކޮމިޝަނަރ އަރިހުން އެދެމެވެ.

ބަޔާނުގައި ވެއެވެ.

މި މައްސަލައަށް ތަދައްޚުލުވާނެ ކަމަށާ އެކަމަށް މިހާރު ތައްޔާރުވަމުން އަންނަކަމަށް އެ ޖަމިއްޔާއިން ވިދާޅުވިއެވެ.