ހޭދަކުރުމަކީ ސުވަރުގެ ހާސިލްކުރުމަށް އޮތް މަގެއް

ޝައްކެއް ނެތް ގޮތުގައި ދުނިޔެމަތީގައި އަހަރެމެންނަށް އޮތް އެންމެ ބޮޑު މަސައްކަތަކީ އާޚިރަތުގައި ސުވަރުގެ ހޯދުމަށް މަސައްކަތްކުރުމެވެ. މިކަން ހާސިލްކުރެވޭނީ ﷲގެ މަގުގައި ސާބިތުވެ ހުރެގެނެވެ. 

އެގޮތުން ހޭދަކުރުމަކީ ވެސް އެކަމުގެ ސަބަބުން ސުވަރުގެ ހާސިލްކުރެވޭނެ ކަމެކެވެ. އެހެންކަމުން ތިމާއަށް ލިބޭ މިންވަރަކުން، ބޭނުން ޖެހިފައިވާމީހާއަށް ހޭދަކުރުމަކީ ތިމާ ލޯބިކުރާ ކަމަކަށް ހެދުމަކީ މާތް ސިފައެކެވެ.

ހޭދަކުރުމަކީ ﷲގެ ހަޟްރަތުގައި މާތް ޢަމަލަކަށްވީ ހިނދު، ބައެއް ހޭދައިގެ ސަބަބުން އެ މީހަކު މަރުވުމަށްފަހު ވެސް އެކަމުގެ ސަބަބުން އެމީހަކަށް ޘަވާބާއި ދަރުމާ ލިބޭނެ ޢަމަލުތައް ވެއެވެ.

ރަސޫލާ صـلّى الله علـيـه وسـلّم ގެ ހަދީޘް ބަސްފުޅެއްގައިވާ ގޮތުން، މާތް ﷲއަށްޓަކައި ދުނިޔެމަތީގައި މިސްކިތެއް ބިނާކޮށްފިމީހާއަށް، އާޚިރަތްދުވަހު ސުވަރުގޭގައި އެމީހަކަށް ގެއެއް ބިނާކޮށްދެއްވާނެއެވެ. 

އެހެންކަމުން މިއީ އެފަދަ ޢަމަލެކެވެ. މިފަދަ ހެޔޮ ޢަމަލުތަކަކީ ދެމިގެންދާ ޞަދަޤާތުގެ ތެރޭގައި ހިމެނޭ ކަންކަމެވެ. އެއީ އެ ޢަމަލުގެ ސަބަބުން އެމީހާ ދުނިޔެއިން ވަކިވެގެން ދިއުމަށްފަހު ވެސް، އެމީހަކަށް ޘަވާބު ލިބިލިބި ހުންނާނެ ފަދަ މާތް މަތިވެރި ޢަމަލެކެވެ.

މަސްދަރު:

1446 ވަނަ އަހަރުގެ ރަމަޟާން މަހަށް ޙާއްސަކޮށް ފަރުދުން މީޑިއާއިން ގެނަސްދިން "ބަރަކާތް" ޕްރޮގްރާމް.

އެޕިސޯޑުގެ ޕްރެޒެންޓަރ: އައްޝައިޙާ އަރޫޝާ މާޙިރު