ކުޅިވަރު
ފަސް ކްލަބަކުން ބޮއިކޮޓްކުރިނަމަވެސް، ކޮންގްރެސް ދިޔައީ ރަގަޅަށްކަމަށް އެފްއޭއެމްއިން ބުނެފި

އެފްއޭއެމްގެ އެކްސްޓްރާ އޯޑިނަރީ ކޮންގްރެސް---
ފުރަތަމަ ޑިވިޝަނުގެ ފަސް ކްލަބަކުން ފުޓުބޯޅަ އެސޯސިއޭޝަން އޮފް ދަ މޯލްޑިވްސް، ރޭ ބޭއްވި އެފްއޭއެމްގެ އެކްސްޓްރާ އޯޑިނަރީ ކޮންގްރެސް ދިޔައީ ވަރަށް ރަގަޅަށްކަމަށް، އެ އެސޯސިއޭޝަނުގެ ވަގުތީ ޖެނެރަލް ސެކްރެޓަރީ މުޙައްމަދު ޝުޖާއު ވިދާޅުވެއްޖެއެވެ.
މީރުމާ ހޮޓެލްގައި ބޭއްވި މި ކޮންގްރެސްއަށްފަހު ވާހަކަ ދައްކަވަމުން ޝުޖާޢު ވިދާޅުވީ، ކުދިކުދި މައްސަލަތަކައް ކުރިމަތިވި ނަމަވެސް އެކަން ފީފާ އާއި އޭއެފްސީގެ ވަފުދުން ހައްލުކޮށްދެއްވައި، ކޮންގްރެސް ކުރިއަށް ގެންދެވުނުކަމަށާއި، ކޮންގްރެސްގައި ބައިވެރިވި ކްލަބުތަކުން ރަގަޅު ޚިޔާލުތައް ލިބުނުކަމަށެވެ.
މި ކޮންގްރެސްގައި ބައިވެރިވެފައިވަނީ މާޒިޔާ ސްޕޯޓްސް އެންޑް ރެކްރިއޭޝަނާއި، ކުލަބު ވެލެންސިއާ އަދި ޓީސީ ސްޕޯޓްސް ކުލަބެވެ. އަދި ބޮއިކޮޓްކުރިކަން އިޢުލާންކުރުމަށްފަހު ކޮންގްރެެސްއަށް ހާޒިރުވެފައި ނުވަނީ ކުލަބު ގްރީން ސްޓްރީޓްސް، ސުޕަ ޔުނައިޓެޑް ސްޕޯޓްސް (ސަސް)، ޔުނައިޑެޓް ވިކްޓަރީ (ޔޫވީ) އަދި ކުލަބު އީގަލްސްއެވެ.
ޝުޖާއު ވިދާޅުވީ މި ކޮންގްރެސްގައި ޑިސިޕްލިން ކޮމިޓީ އާއި އެތިކްސް ކޮމިޓީ އަދި އެޕީލް ކޮމިޓީވެސް ކަނޑައަޅާފައިވާ ކަމަށެވެ. އަދި އެފްއޭއެމްގެ ފާއިތުވި ދެ އަހަރުގެ މުއާމަލާތްތައް އޮޑިޓުކުރުމަށް ކޮންގްރެސްއިން ކަނޑައަޅާފައިވާ އޮޑިޓް ފާމަކީ "ޕްރުޓަންޑް ޗާޓެޑް އެލްއެލްޕީ" ކަމަށްވެސް ވިދާޅުވިއެވެ.