ދީން
އެންމެ ފުރަތަމަ ނަރަކައަށް ވެެއްދޭނެ ތިން ބާވަތުގެ މީހުން

އެންމެ ފުރަތަމަ ނަރަކައަށް ވެެއްދޭނެ ތިން ބާވަތުގެ މީހުން
ދުނިޔޭގެ ދިރިއުޅުމަކީ ވަގުތީ ތަނެއްކަން ގާތްގާތުން މިފެންނަ މަރުތަކުން އަހަރެމެން އެންމެންނަށްވެސް އިހުސާސްވާނެއެވެ. ޅަ ޒުވާނުންގެ ކުއްލި މަރުތަކެވެ. ދުވަސްވީ މީހުންގެ މަރުތަކެވެ. އިހަށްދުވަހު އުފަންވި ތުއްތު ކުދިންގެ މަރެވެ.
ކޮންމެ ގޮތެއްވިޔަސް އަހަރެމެންނަށް އޮތީ މަރަށް ތައްޔާރުވެ ޤިޔާމަތްދުވަހު ނަރަކައިން މިންޖުވެ ސުވަރުގެއަށް ވަދެވޭނެ ހެން ޢަމަލުތައް ސީދާކުރުމެވެ.
ސުވަރުގެއަށް ވެއްދޭނެ މީހުންނާއި ނަރަކައިން އެބައިމީހުންގެ ޖާގަ ކަށަވަރުކުރާ މީހުން ގިނައެވެ. މީގެ ތެރެއިން ނަރަކައަށް އެންމެ ފުރަތަމަ ވެއްދޭނެ ތިން ބާވަތެއްގެ ބަޔަކު ވާކަމަށް ރަސޫލާ ޞައްލަﷲ ޢަަލައިހި ވަސައްލަމްގެ ޙަދީޘް ބަސްފުޅުން އެނގެން އެބައޮތެވެ.
މި ޙަދީޘްފުޅަކީ އަބޫ ހުރައިރާ ރަޟިޔަﷲ ޢަންހާ ގެ އަރިހުން ރިވާވެގެން އައިސްފައިވާ ޤުދުސީ ޙަދީޘްއެކެވެ.
އެގޮތުން ރަސޫލާ ޞައްލަﷲ ޢަލައިހި ވަސައްލަމް ޙަދީޘް ކުރައްވާތީ އަޑުއެއްސެވިކަމަށް އަބޫ ހުރައިރާ ރަޟިޔައްﷲ ޢަންހާ ވިދާޅުވެފައިވެއެވެ. ޤިޔާމަތްދުވަހު ނަރަކައަށް ވެއްދުމަށް އަމުރުކުރެވޭ މީހުންގެ ތެރެއިން އެންމެ ފުރަތަމަ ވާނީ ޝަހީދެކެވެ. ފަހެ އޭނާ ގެނެވޭނެތެވެ. އަދި އޭނާއަށް އޭނާއަށްހުރި ނިޢުމަތްތަކުގެ ވާހަކައިން ޚަބަރު ދެވޭނެއެވެ. އަދި އޭނާއާއި ސުވާލު ކުރެވޭނެއެވެ. ތިބާ ކުރީ ކޮން ކަމެއްހެއްޔެވެ. އެހިނދު އޭނާ ޖަވާބުދާރީ ވާނެތެވެ. ތިމަންނާއީ އިބަ އިލާހުގެ މަގުގައި ޖިހާދުކޮށް ޝަހީދުވި ޝަހީދަކީމެވެ.
އެހިނދު ބުނެވޭނެތެވެ. ތިބާ ދޮގު ހަދައިފިއެވެ. އަދި ކިއެއްތަ ތިބާ ޖިހާދުކޮށް ޝަހީދުވީ ތިބާގެ ހެޔޮ ކަމުގެ ވާހަކައާއި ހިތްވަރުގަދަ ކަމުގެ ވާހަކަ އެހެން މީހުންގެ އަނގައިން ދެކެވުމަށްޓަކައެވެ. އެބަހީ އޭނާގެ ނިޔަތުގައި ވަނީ ދެއްކުންތެރިކަމެވެ. އަދި އެހިނދު އޭނާ ދަމައިފައި ނަރަކައަށް ގެންދިޔުމަށް އަމުރު ކުރެވޭނެއެވެ.
ދެވަނަ މީހާއީ ކީރިތި ޤުރުއާނުގެ ޢިލްމު އުނގެނި އެ ޢިލްމު އުނގަންނައިދިން މީހެކެވެ. އަދި ކީރިތި ޤުރުއާން ކިޔަވާ މީހެކެވެ.
އޭނާ ﷲގެ ހަޞްރަތަށް ހާޒިރު ކުރެވޭނެތެވެ. އަދި އޭނާއަށް ހުރި ނިޢުމަތްތަކުން އޭނާއަށް ޚަބަރު ދެވޭނެތެވެ. އެހިނދު އޭނާއާއި ސުވާލު ވެވޭނެތެވެ. ފަހެ ތިބާ ކުރި ޢަމަލަކީ ކޮބައިހެއްޔެވެ.
އެހިނދު އޭނާ ބުނާނެތެވެ. ތިމަން އިބަ އިލާހުގެ މަގުގައި އިބަ އިލާހުގެ ފޮތުގެ ޢިލްމު އުގެނި އެ ޢިލްމު މީހުންނަށް އުނގަންނައި ދިނީމެވެ. އަދި ޤުރުއާން ކިޔަވާ މީހެއްގެ ގޮތުގައި ވީމެވެ.
އެހިނދު އޭނާއަށް ބުނެވޭނެތެވެ. ތިބާ ދޮގު ހަދައިފިއެވެ. ތިބާ ޢިލްމު އުނގެނި އެ ޢިލްމު އުނގަންނައިދީ ކީރިތި ޤުރުއާން ކިޔަވައިހެދީ ތިބާގެ މޮޅުވާހަކަ މީހުންގެ ދޫތަކުން ދެއްކުމަށް ޓަކައެވެ. ފަހެ ތިބާއަށް އެކަން ހާސިލް ވެއްޖެއެވެ.
އަދި އެހިނދު އޭނާ ދަމައިފައި ގެންގޮސް އަނގަވަތަށް ނަރަކައަށް އެއްލާލުމަށް އަމުރުކުރެވޭނެތެެވެ.
ތިންވަނަ މީހަކު ގެނެވޭނެތެވެ. އެމީހާއިން ޞަދަޤާތްދީ އޭނާގެ މުދަލުން ހޭދަކުރި މުއްސަނދިމީހާއެވެ. އޭނާއަށްވެސް އޭނާއަށް ހުރި ނިޢުމަތްތަކުން ޚަބަރު ދެވޭނެތެވެ.
އަދި ސުވާލު ކުރެވޭނެތެވެ. ތިބާ ކުރީ ކޮންކަމެއް ހެއްޔެވެ. އެހިނދު އޭނާ ބުނާނެތެވެ. ތިމަން ތިމަންގެ މުދަލުން އިބަ އިލާހުގެ މަގުގައި ހޭދަކުރީމެވެ. އަދި އެހިނދު އޭނާއަށްވެސް ބުނެވޭނެތެވެ. ތިބާ ދޮގު ހަދައިފިއެވެ. ތިބާގެ މުދަލުން ތިބާ ހޭދަކުރީ ތިބާއީ ދީލަތި މީހެކޭ މީސްތަކުންގެ ދުލުން ކިޔުއްވުމަށެވެ. އެހިނދު އޭނާވެސް އަނގަވަތަށް ނަރަކައަށް ވައްޓާލުމަށް އަމުރުކުރެވޭނެތެވެ.
އަހަރެމެން މުސްލިމުންގެ ހައިސިއްޔަތުން ހެެޔޮ ޢަމަލުތައް ކުރުމުގައިވެސް ދެެއްކުންތެރިކަމުން ރައްކާތެރިވާން ޖެހެއެވެ. ކުރާ ހެޔޮ ޢަމަލުތަކުގައި އިޚްލާސްތެރިކަން އިސްކުރަން ޖެހެއެވެ. ދެއްކުން ތެރިކަމުގެ ނުބައި ސިފައިން ދުރުހެލިވެ ނިޔަތް އިޚްލާސްތެރި ކުރަންޖެހެއެވެ.