ޚަބަރު
މިނިސްޓަރު ފެންވަރުގައި ޔޫތު މިނިސްޓަރުގެ އެޑްވައިޒަރަކަށް ނަރީޝް އައްޔަންކުރައްވައިފި

އެޑްވައިޒާ ޓު ދަ މިނިސްޓާ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސްގެ މަގާމަށް އައްޔަންކުރެއްވި ނަރީޝް، ފޮޓޯ: މާލޭ ސިޓީ ކައުންސިލް
މާލޭގެ ޑެޕިއުޓީ މޭޔަރަކަށް ކުރިން ހުންނެވި އަހުމަދު ނަރީޝް މިނިސްޓަރު ފެންވަރުގައި ޔޫތު މިނިސްޓްރީއަށް އައްޔަނުކުރައްވައިފިއެވެ.
އެޑްވައިޒާ ޓު ދަ މިނިސްޓާ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސްގެ މަގާމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނަރީޝް އައްޔަންކުރައްވާފައިވަނީ މިދިޔަ ބުރާސްފަތި ދުވަހެވެ.
މާލޭ ސިޓީ ކައުންސިލްގެ ޑެޕިއުޓީ މޭޔަރަކަށް ހުންނެވުމަށްފަހު ނަރީޝް އެ މަޤާމުން އިސްތިއުފާ ދެއްވާފައިވަނީ މިދިޔަ ބުދަ ދުވަހެވެ.
އެ މަޤާމުން އިސްތިއުފާ ދެއްވަމުން ނަރީޝް ވިދާޅުވީ، އިސްތިއުފާ ދެއްވީ ގައުމާއި ރައްޔިތުންނަށް އެހެން ހައިސިއްޔަތަކުން ހިދުމަތްކުރަން ފުރުސަތު ލިބުމާ ގުޅިގެން ކަމަށެވެ.
ޔޫތު މިނިސްޓަރީއަށް އައްޔަންކޮށްފައިވީނަމަވެސް، އޭނާ މިވަގުތު ހުންނެވީ މާލެއިން ބޭރުގައިކަމުން އަދި ވަޒީފާއަށް ނިކުންނަވަން ނުފައްޓަވާކަމަށް، ނަރީޝްވަނީ ވިދާޅުވެފައެވެ.
ނަރީޝް ކުރިން ހުންނެނި މާލޭ ސިޓީ ކައުންސިލްގެ ޑެޕިއުޓީ މޭޔަރަކަށް މިއަދު ވަނީ މާލޭ ސިޓީ ކައުންސިލްގައި ޕީއެންސީއަށް ނިސްބަތްވެވަޑައިގަންނަވާ ކައުންސިލަރު، މުހައްމަދު އަރީޝް އިންތިހާބުކޮށްފައެވެ.