ގެސްޓް ހައުސްއެއްގައި މީހަކަށް އަނިޔާކުރި މައްސަލައިގައި ހައްޔަރުކުރި ދެމީހުން ތަހުޤީޤަށްފަހު ދޫކޮށްލައިފި

ގެސްޓު ހައުސްއެއްގައި މީހަކަށް އަނިޔާކުރި މައްސަލައިގައި ހައްޔަރުކުރި ދެމީހުން މައްސަލައިގެ ތަހުޤީޤަށްފަހު ދޫކޮށްލައިފިއެވެ. 

މިމައްސަލައަކީ ހެންވޭރު ގެސްޓް ހައުސްއެއްގެ ކޮޓަރިއެއްގެ ތެރޭގައި އުޅޭ 27 އަހަރުގެ ދިވެހި ފިރިހެނެއް ބޮޑެތި ޒަހަމްތަކާއެކު އޮއްވާ ފެނުނު މައްސަލައެވެ. އެމީހާ ޒަހަމްތަކާއި އެކު ފެނިފައިވަނީ މިދިޔަ އަހަރުގެ ސެޕްޓެމްބަރު 9 ވަނަ ދުވަހުއެވެ.

މިކަމާއި ގުޅިގެން ފުލުހުން އޭރު ބުނެފައިވަނީ އޭނާގެ ހަބަރެއް ނުވާ ކަމަށް މަޢުލޫމާތު ލިބިގެން ފުލުހުން އެތަނަށް ގޮސް ބެލިއިރު އޭނާ ފެނިފައިވަނީ ޒަހަމްތަކަކާ އެކު އޮއްވާ ކަމަށެވެ.

އެ މީހާ ގެސްޓްހައުސް އިން ނެރެގެން ގެންދާ މަންޒަރުގެ ވީޑިއޯއިން ފެނުނު ގޮތުން އޭނާގެ މޫނުއޮތީ އަނިޔާގެ ސަބަބުން ދުޅަވެފައެވެ.

އެ މައްސަލައާއި ގުޅިގެން ހައްޔަރުކޮށްފައިވަނީ ކ. ތުލުސްދޫ، ޕެރިސް، ފައުޒާން ޒަރީރު (23އ) އާއި މާލެ، މއ. ވޮށްކޮޅުގެ، އަހުމަދު މާޒިން އިބްރާހިމް (23އ) ކަމަށެވެ.

އަދި މައްސަލައާ ގުޅިގެން ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވާ ކަމަށް ވެސް ފުލުހުން އޭރު ބުނެފައިވެއެވެ.

ތަހުޤީޤު ނިންމައި މިހާރު އެދެމީހުން ވަނީ ދޫކޮށްލައިފައެވެ.