ވައިގެ މަގުން ރާއްޖެއަށް އެތެރެކުރަން އުޅުނު 1 ކިލޯގެ މަސްތުވާތަކެތި އަތުލައިގެންފި

ވައިގެމަގުން ރާއްޖެއަށް އެތެރެކުރަން އުޅުނު އެއް ކިލޯގެ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.

މޯލްޑިވްސް ކަސްޓަމްސް ސަރވިސް އިން ވިދާޅުވީ، މި މަސްތުވާތަކެތި އަތުލައިގަނެފައިވަނީ، ރޭ ދަންވަރު ރާއްޖެ އައި "ޖެނެރަލް ގުޑްސް ސިޕްމެންޓް" އެއް ގައި މަސްތުވާތަކެތި ހުރިކަމަށް ޝައްކުކުރެވިގެން އިތުރަށް ބަލައި ފާސްކުރުމުގެ ތެރޭގައި ކަަމަށެވެ. އަދި މި ތަކެތި ރާއްޖެ ގެނެސްފައިވަނީ ވައިގެމަގުން ތައިލެންޑުން ރާއްޖެއަށްކަމަށް ކަސްޓަމްސްއިން ވިދާޅުވެއެވެ.  

ކަސްޓަމްސްއިން ވިދާޅުވީ، މި މަސްތުވާތަކެތި ވިހި ޕެކެޓެއްގައި ފޮރުވާފައިހުރި ކަމަށެވެ. އަދި މިތަކެތި  ފުރަތަމަ މަރުޙަލާގައި ޓެސްޓުކުރިއިރު، ކެނެބިސް އަށް ފައްސިވެވެފައިވާ ކަމަށް ކަސްޓަމްސް އިން މަޢުލޫމާތުދެއެވެ. މީގެ އިތުރުން ކަސްޓަމްސް އިން ވިދާޅުވީ، މި ތަކެތީގެ ބަރުދަނުގައި ޕެކިންއާއެކު ޖުމްލަ 1097 ގްރާމް ހުރި ކަމަށެވެ. އަދި މިތަކެތީގެ މަގުމަތީ އަގު ޖުމްލަ 8 ލައްކަ ދިވެހި ރުފިޔާ އަށް އަރާކަމަށް ކަސްޓަމްސް އިން މަޢުލޫމާތުދެއެވެ.

ކަސްޓަމްސް އިން ވިދާޅުވީ، މިތަކެތި އަތުލައިގަނެފައިވަނީ ވެލާނާ އިންޓަރނޭޝަނަލް އެއަރޕޯޓުން ކަމަށެވެ. އަދި މި މައްސަލަ އިތުރަށް ތަޙުޤީޤު ކުރުމަށް، އަތުލައިގަނެވުނު މަސްތުވާތަކެތި މިހާރު ފުލުހުންނާއި ހަވާލުކޮށްފައިވާ ކަމަށް ކަސްޓަމްސް އިން މަޢުލޫމާތުދެއްވައެވެ.