އެމެރިކާއަށް ނަގޫރޯޅިއެއް އަރައި މިހާތަނަށް 14 މީހުން މަރުވެއްޖެ

އެމެރިކާގެ މެދު ސަރަޙައްދަށް ކުއްލިއަކަށް އެރި ނަގޫރޯޅިއެއްގެ ސަބަބުން މިހާތަނަށް 14 މީހުން މަރުވެ، 100 އަށްވުރެ ގިނަ މީހުންނަށް އެކިވަރުގެ އަނިޔާވެއްޖެއެވެ.

މި ތޫފާނުގެ ސަބަބުން އެންމެ ބޮޑަށް ގެއްލުން ވެފައިވަނީ، އެ ޤައުމުގެ މިސޫރީ އަދި އަރްކަންސާސް ސްޓޭޓަށްކަމަށް މީޑިއާތަކުން ރިޕޯޓުކޮށްފައިވެއެވެ.

މިސޫރީގެ ސަލިވަން ކައުންޓީއަށް ނަގޫރޯޅި އަރާފައިވަނީ، މިދިޔަ ހުކުރު ދުވަހުގެ ރޭގައެވެ. އެރޭ އެކަނިވެސް 5 މީހުން ވަނީ މަރުވެފައެވެ. މީގެ އިތުރުން އަރްކަންސާސްގެ ވައިނު ސިޓީގެ ވަރނަރު ސާރާ ހަކަބީ ސަންޑަރްސް ވިދާޅުވީ، އެ ސްޓޭޓުގައި 3 މީހުން މަރުވެފައިވާ ކަމަށެވެ. އަދި އިންޑިއާނާ ސްޓޭޓްގައި 3 މީހުން މަރުވެ، އިލިނޮއިސް ސްޓޭޓްގައި އެކަކު ވަނީ މަރުވެފައެވެ. ހަމަ އެހެންމެ، އެހެން އަވަށްތަކުންވެސް މީހުން މަރުވެފައިވާ ކަމަށް ރިޕޯޓްތަކުން ބުނެއެވެ.

މި ނަގޫރޯޅީގެ ސަބަބުން އެ ސްޓޭޓުގެ ގޭގެއާއި އިމާރާތްތަކަށް ބޮޑެތި ގެއްލުންތައް ވަނީ ލިބިފައެވެ. އަދި ގިނަ އަދަދެއްގެ މީހުން ހާލުގައި ޖެހި، އެ ސަރަޙައްދުގެ 2300 އަށްވުރެ ގިނަ ވައިގެ ދަތުރުތައް ވެސް ވަނީ ކެންސަލްކޮށްފައެވެ. މީގެ އިތުރުން، 200،000 އަށްވުރެ ގިނަ ގޭބީސީއަށް ކަރަންޓު ކެނޑި، ފުރަތަމަ 24 ގަޑިއިރުގެ ތެރޭގައި 1000 އަށްވުރެ ގިނަ މީހުން ވަނީ ސަލާމަތްކޮށްފައެވެ. އަދި ގެއްލުން ލިބުނު ސަރަޙައްދުތަކުގައި ދިރިއުޅޭ ރައްޔިތުންނަށް ވަޤުތީ ބޯހިޔާވަހިކަން ފޯރުކޮށްދިނުމަށް އެމެރިކާ ސަރުކާރުން ވަނީ އެކި ޝެލްޓަރތައް ޤާއިމްކޮށްފައެވެ. ހަމަ އެހެންމެ، ކާބޯތަކެއްޗާއި ސާފު ބޯފެން ފޯރުކޮށްދިނުމުގެ މަސައްކަތް ވެސް ކުރިއަށްދާކަމަށް މަޢުލޫމާތުލިބެއެވެ.

މި ތޫފާނުގެ ސަބަބުން އެމެރިކާގެ އެކި ސްޓޭޓުތަކުގައިވަނީ، ކުއްލި ޙާލަތު އިޢުލާންކޮށްފައެވެ. އެގޮތުން، މިސޫރީ، އަރްކަންސާސް، އިލިނޮއިސް އަދި އިންޑިއާނާ ސްޓޭޓްތަކުގައި ވަނީ ކުއްލި ޙާލަތު އިޢުލާނުކޮށްފައެވެ. އަދި އިތުރު އެހީގެ ވަޞީލަތްތައް ވަނީ އެ ސަރަޙައްދަށް ފޮނުވައިފައެވެ. މީގެ އިތުރުން، މިކަމާއި ގުޅިގެން ފެޑެރަލް އިމަރޖެންސީ މެނޭޖްމަންޓް އޭޖެންސީ، ފެމާ އިން ވެސް އެހީތެރިކަން ފޯރުކޮށްދިނުމަށް ނިންމަވާފައިވާކަމަށް އެ ޤައުމުގެ ނޫސްތަކުން ވަނީ ރިޕޯޓުކޮށްފައެވެ.

މި ޙާދިސާއާއި ގުޅިގެން ލިބުނު ގެއްލުންތަކުގެ ސަބަބުން އެ ސަރަޙައްދުތަކުގެ އިޤްތިޞާދަށް ވެސް ބޮޑެތި އަސަރުތަކެއް ކުރާނެ ކަމަށް އިޤްތިޞާދީ މާހިރުން ވަނީ ލަފާކޮށްފައެވެ.