ސުޕްރީމް ކޯޓުގެ ފަނޑިޔާރަކަށް ޝަހީދު އައްޔަނުކުރަން ޖޭއެސްސީއިން ރައީސަށް ލަފާއަރުވަނީ

ހުސްވެފައިވާ ސުޕްރީމް ކޯޓުގެ ފަނޑިޔާރަކަށް ހައި ކޯޓުގެ އިސްފަނޑިޔާރު، ހުސެއިން ޝަހީދު އައްޔަނުކުރުމަށް ރައީސް ޑރ މުޙައްމަދު މުއިއްޒަށް ލަފާއެރުވުމަށް ޖުޑިޝަލް ސާވިސް ކޮމިޝަންއިން ނިންމައިފިއެވެ.

ސުޕްރީމް ކޯޓުގެ ފަނޑިޔާރު ހުސްނުއްސުޢޫދު އިސްތިއުފާ ދެއްވުމުން އެ މަޤާމަށް ފަނޑިޔާރަކު ހޯދަން ޖޭއެސްސީން ދެ ބުރަށް އިއުލާން ކުރުމުން ނަން ހުށަހެޅުއްވީ ޝަހީދުގެ އިތުރުން ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު އަދި ޤާނޫނީ ވަކީލެއް ކަމަށްވާ ރުސްދުﷲ އިބްރާހީމެވެ.

އެ ތިން ބޭފުޅުންނާ އިންޓަވިއު ކުރުމަށް ފަހު، ޖޭއެސްސީން ރޭ ނިންމެވީ ސުޕްރީމް ކޯޓުގެ ފަނޑިޔާރަކަށް ޝަހީދު އައްޔަންކުރަން ފެންނަކަމަށް ރައީސަށް ލަފާއަރުވާށެވެ.

އެގޮތަށް ރައީސް މުޢިއްޒަށް ލަފާ ލިބިވަޑައިގަތުމުން ޝަހީދުގެ ނަން ފޮނުއްވާނީ ރައްޔިތުންގެ މަޖިލިހުގެ ރުހުން ހޯދުމަށެވެ. މަޖިލިހުގެ ރުހުން ލިބުމުން ދެން އޮންނާނީ ރާއްޖޭގެ އެންމެ މަތީ ކޯޓުގެ ފަނޑިޔާރަކަށް އައްޑޫ ފޭދުއަށް އުފަން ޝަހީދު އައްޔަން ކުރެއްވުމެވެ.

ހައި ކޯޓުގެ ފަނޑިޔާރުކަމަށް ޝަހީދު އައްޔަންކުރީ ޖުލައި 24، 2018 ގަ އެވެ. އަދި އޭނާ އެ ކޯޓުގެ އިސް ފަނޑިޔާރަކަށް އައްޔަންކޮށްފައިވަނީ އޮކްޓޫބަރު 26، 2023 ގަ އެވެ. ފަނޑިޔާރު ޝަހީދު ވަނީ ކްރިމިނަލް ކޯޓުގެ ލީގަލް އޮފިސަރުކަމާއި ފޭދޫ މެޖިސްޓްރޭޓްކަމާއި ކްރިމިނަލް ކޯޓުގެ ގާޒީކަން ވެސް ކުރިން ކުރައްވައިފައެވެ.