މަންދީ ގަޔަށް ކަޅުތެޔޮ ޖެހުން މެޑަމް ސާޖިދާ ކުށްވެރިކުރައްވައިފި

އެމްޑީޕީގެ އެކްޓިވިސްޓު މަރިޔަމް ޒުބެއިރް(މަންދީ) ގަޔަށް މަގުމަތިން ބަޔަކު ކަޅުތެޔޮ ޖެހި ޖެހުން މެޑަމް ސާޖިދާ މުޙައްމަދު ކުށްވެރިކުރައްވައިފިއެވެ. 

ރޭގައި ބަޔަކު ހިންގި މި ޢަމަލު ކުށްވެރި ކުރައްވައި މެޑަމް ސާޖިދާ އެކްސްގައި ކުރައްވާފައިވާ ޕޯސްޓެއްގައި ވިދާޅުވެފައިވަނީ، އެމްޑީޕީގެ އެކްޓިވިސްޓު މަންދީގެ ގަޔަށް ކަޅުތެޔޮ ޖެހުން އެކަމަނާ ކުށްވެރިކުރައްވާކަމަށެވެ.

މީގެއިތުރުން ސާޖިދާ ވިދާޅުވެފައިވަނީ އެފަދަ ހަމަލާތަކާއި ފުރައްސާރަ ކުރުމަކީ ބަލައިގަނެވޭނެ ކަމެއް ނޫން ކަަމަށެވެ.  އަދި އެއްވެސް މީހަކަށް ހަމަލާދީ އުނދަގޫ ކުރުމަކީ ބަލައިގަނެވޭ ކަމެއް ނޫން ކަމަށްވެސް އެކަމަނާ ވަނީ ވިދާޅުވެފައެވެ. މީގެއިތުރުން މިވަގުތު ކަންކަން ހަލަބޮލި ނުކޮށް އިންސާފު ޤާއިމްކުރުމަށް ޖާގަދިނުމަށް އެކަމަނާ ވަނީ އިލްތިމާސް ކުރައްވައިފައެވެ. 

I strongly condemn the act of splashing black oil on MDP activist Mariyam Zubair last night. Such attacks and harassment are completely unacceptable. I call on everyone to avoid escalating tension at a time like this and allow for the process of justice to be facilitated.

— First Lady Sajidha Mohamed (@sajidhaamohamed) March 17, 2025

މަންދީގެ ގަޔަށް ކަޅުތެޔޮ ޖަހަައިފައިވަނީ ރޭގެ ވަގުތެއްގައި އެމްޑީޕީއިން ބޭއްވި މަގުމަތީ ހަރަކާތެއް ނިންމައިފައި ދަނިކޮށް މަގުމަތިން ހެލްމެޓް އަޅައިގެން ތިބި ބައެކެެވެ.

މަންދީގެ ގަޔަށް ކަޅުތެޔޮ ޖަހައިފައި މިވަނީ ރައީސް ޑރ މުޙައްމަދު މުޢިއްޒު އާއި އެމަނިކުފާނުގެ ދޮށީ ދަރިކަލުންނަށް ނިސްބަތްކޮށް ދެއްކި ވާހަކަތަކަކާއި ގުޅިގެން މަންދީގެ މައްޗަށް ދައުވާކުރުމަށް ރައީސްގެ އާއިލާގެ ފަރާތުން ނިންމަައިފައިވަނިކޮށެވެ.

މި މައްސަލައަކީ ރާއްޖޭގައި ވޭޕް މަނާކުރި މައްސަލަ ރައީސް މުއިއްޒާއި އެމަނިކުފާނުގެ ދޮށީ ދަރިކަލުންނާއި ގުޅުވައިގެން އެމްޑީޕީ މަގުމަތީ ހަރަކާތެއްގައި މަންދީ ދެއްކި ވާހަކަތަކަކާއި ގުޅޭ މައްސަލައެކެވެ.