ޚަބަރު
ފަޒީން ބްރޯޑްކޮމްއިން އިސްތިއުފާ ދެއްވައިފި

މުޙައްމަދު ފަޒީން
ޖިންސީ ފުރައްސާރައިގެ ތުހުމަތުތަކާއިއެކު ބްރޯޑްކޮމްއިން ވަކިކުރުމަށް ނިންމައިފައިވަނިކޮށް އެ ކޮމިޝަންގެ ނައިބު ރައީސްގެ މަޤާމުގައި ހުންނެވި މުޙައްމަދު ފަޒީން އިސްތިއުފާ ދެއްވައިފިއެވެ.
މަޤާމުން އިސްތިއުފާ ދެއްވައި ފަޒީން ސޯޝަލް މީޑީއާގައި އާންމުކޮށްފައިވާ ސިޓީއެއްގައި ބުނެފައިވަނީ، މިނިވަންކަމާއެކު ކޮމިޝަންގެ މެމްބަރެއްގެ ޒިންމާތަކާއި މަސްއޫލިއްޔަތުތައް އަދާކުރުމަކީ މި ވަގުތަށް ވެވެން ނެތް ކަމަކަށް ވާތީ އިސްތިއުފާ ދެއްވީ ކަމަށެވެ.
ނަމަވެސް މިނިވަން ދިމިގްރާތީ މުޖުތަމައެއް ދެމެހެއްޓުމަށްޓަކައި ނޫސްވެރިކަމުގެ މިނިވަންކަމަށް ކެނޑިނޭޅި މަސައްކަތްކުރާ މީހެއްގެ ގޮތުގައި ދެމިހުންނާނެ ކަމުގެ ޔަޤީންކަން ފަޒީން ވަނީ ދެއްވައިފަައެވެ.
ކޮމިޝަންގެ މުވައްޒަފަކަށް ޖިންސީ ފުރައްސާރަކުރި މައްސަލައިގައި ފަޒީން ވަނީ މީގެ ކުރިން ވެސް ކޮމިޓީ އަށް ހާޒިރުކޮށްފައެވެ. ފަޒީން އިސްތިއުފާ ދެއްވީ އެ މައްސަލައިގައި އޭނާ ވަކިކުރުމާ މެދު މިއަދު ހެނދުނު 11 ޖަހާއިރު ކޮމިޓީން ވަކި ގޮތެއް ނިންމަން ފާސްކޮށްފައި އޮއްވައެވެ.
އޭނާގެ ޤާނޫނީ ވަކީލް ވިދާޅުވީ ޖިންސީ ފުރައްސާރަކުރި ކަމަށް ބުނާ މައްސަލަ ތަހުޤީޤުކުރުމުން ވެސް "ބުނި ބުނުން" ފިޔަވައި ގުޅުވާލެވޭނެ އިތުރު އެއްވެސް ހެއްކެއް އަދި ގަރީނާއެއް ވެސް ދެއްކިފައި ނުވާ ކަމަށެވެ.
މާޗު 7، 2021 ގައި މަގާމަށް އައްޔަންކުރި ހިސާބުން ފެށިގެން މިއަދު އިސްތިއުފާ ދެއްވުމާ ހަމައަށް ވެސް މަގާމުގެ މަސްއޫލިއްޔަތުތަކާއި ޒިންމާތައް އަދާކޮށްފައިވަނީ ވަކި ފަރާތަކަށް ނުޖެހި، ކޮމިޝަންގެ ގާނޫނުގައި ބަޔާންކުރާ މަގުސަދުތައް ހާސިލް ކޮށްދިނުމަށް ކަމަށް ވަކީލުގެ ސިޓީގައިވެއެވެ.
ނަމަވެސް، ދައުލަތުގެ އެތައް އިދާރާއަަކުން އެއްފަހަރާ އެ މައްސަލަ ތަހުގީގު ކުރަނީ ވަކި މަގުސަދެއް ހާސިލްކުރުމަށްޓަކައި އާދަޔާ ހިލާފު ނުފޫޒެއްގެ ބާރުގައި ކަމަށް ވެސް ވަކީލު ވިދާޅުވިއެވެ.
އެ ސަބަބުތަކާ ހެދި މިނިވަންކަމާއެކު މަސައްކަތް ކުރެވެން ނެތުމުން ފަޒީން އިސްތިއުފާ ދެއްވަން ނިންމެވީ ކަމަށް ވަކީލު ވިދާޅުވިއެވެ.