ރަސްމީ ދަތުރުފުޅެއްގައި ޚާރިޖީ ވަޒީރު އިންޑިއާއަށް ވަޑައިގެންފި

ރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ރަސްމީ ދަތުރުފުޅެއްގައި އިންޑިއާއަށް ވަޑައިގެންފިއެވެ.

މިއީ ޚާރިޖީ ވަޒީރު ޑރ. އަބްދުﷲ ޚަލީލް މި މަޤާމާއި ހަވާލުވެވަޑައިގަތުމަށްފަހު، އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. 

ވަޒީރު އެކްސްގައި ކުރެއްވެވި ޕޯސްޓެއްގައި ވިދާޅުވީ، މި ދަތުރުފުޅަކީ އިންޑިއާގެ "ރައިސީނާ ޑައިލޮގު" ގެ 10 ވަނަ ބައްދަލުވުމުގައި ބައިވެރިވެވަޑައިގަތުމަށް ކުރައްވާ ދަތުރުފުޅެއް ކަމަށެވެ. އަދި މި ބައްދަލުވުމުގައި، މަތީ ފަންތީގެ ބޭފުޅުންނާއިއެކު ޕެނަލް ޑިސްކަޝަންތަކުގައި އެކި ދާއިރާތަކުން މަޝްވަރާ ކުރައްވާނެ ކަމަށް ވަޒީރު ވަނީ ވިދާޅުވެފައެވެ. އެގޮތުން، މަޝްވަރާކުރެއްވުމަށް ހަމަޖެހިފައިވާ ކަންތައްތަކުގެ ތެރޭގައި މޫސުމީ ބަދަލުތައް ހިމެނޭކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޑރ. އަބްދުﷲ ޚަލީލް ޚާރިޖީ ވަޒީރަކަށް އައްޔަނުކުރައްވާފައިވަނީ، ނިމިދިޔަ އަހަރުގެ ސެޕްޓެމްބަރު މަހުގެ 30 ވަނަ ދުވަހުގައެވެ. މި މަޤާމާއި ހަވާލުވެވަޑައިގަތުމަށްފަހު ވަޒީރު އެންމެ ފުރަތަމަ ބައްދަލުކުރައްވާފައިވަނީ އިންޑިއާ ސަފީރާއެވެ.