ޕާކިސްތާނުގެ އަސްކަރީ އުޅަނދަކަށް އަމާޒުކޮށް ދިން ބޮމުގެ ހަމަލާއެއްގައި 5 މީހަކު މަރުވެއްޖެ

ޕާކިސްތާނުގެ އަސްކަރީ އުޅަނދަކަށް އަމާޒުކޮށް ދިން ބޮމުގެ ހަމަލާއެއްގައި ފަސް މީހަކު މަރާލައިފިއެވެ. މި ޙަމަލާދީފައިވަނީ ޕާކިސްތާނުގެ ހުޅަނގު ދެކުނު ސަރަޙައްދުގައެވެ.

ޕާކިސްތާނުގެ ނޫސްތަކުން ރިޕޯޓުކުރާ ގޮތުގައި، މި ޙަމަލާ ދީފައިވަނީ، ބޮމާއެކު ދުއްވާފައި ދިޔަ އުޅަނދެއް، ޕެރަމިލިޓަރީ ގާފިލާއެއްގެ ތެރެއަށް ވަދެ ގޮއްވާލައިގެންނެވެ. މިކަމާއި ގުޅިގެން ޙަމަލާތައް ރައްދުވި ޑިސްޓްރިކްޓްގެ ސީނިއަރ ސުޕްރިންޓެންޑެންޓް އޮފް ޕޮލިސް ހާޝިމް މޯމަންދު ވިދާޅުވީ، ޕެރަމިލިޓަރީ ފޯސްގެ 30 އަށް ވުރެ ގިނަ މީހުންނަށް އެކިވަރުގެ ޒަޚަމްތައްވެފައިވާއިރު، 5 މީހަކު މަރުވެފައިވާ ކަމަށެވެ.

މި ޙަމަލާއާއި ގުޅިގެން ޕާކިސްތާނުގެ ބޮޑުވަޒީރު ޝަހްބާޒް ޝަރީފް ނެރުއްވި ބަޔާނެއްގައި އޭނާ ވަނީ މިކަން ހަރުކަށި އިބާރާތުން ކުށްވެރިކުރައްވާފައެވެ. އަދި މި ޙަމަލާއަކީ އަފްޣާނިސްތާނާ ގުޅިފައިވާ އެ ޤައުމުގެ ސަރަޙައްދުތަކުގައި ސަލާމަތީ ގޮތުން ކުރިމަތިވަމުންދާ ނުތަނަވަސްކަމާއި ކުރިމަތިލާން ޖެހިފައިވާ ދަނޑިވަޅެއްގައި ހިނގާފައިވާ ކަމެއްކަމަށް އޭނާ ވަނީ ފާހަގަކުރައްވާފައެވެ. މީގެ އިތުރުން، ޚައިބަރު ޕަޚްތޫންޚުވާ ޕްރޮވިންސްގެ ޗީފް މިނިސްޓަރު އަލީ އަމީން ގަންޑަޕޫރު ވަނީ އެ ޕްރޮވިންސްގެ އެކި ހިސާބުތަކުގައި ފުލުހުންނަށް އަމާޒުކޮށް ދިން ސިލްސިލާ ހަމަލާތައް ކުށްވެރިކުރައްވާފައެވެ.

ޕާކިސްތާނުގެ ނުސްތަކުން ރިޕޯޓުކޮށްފައިވާ ގޮތުގައި، މި ޙަމަލާގެ ޒިންމާ އުފުލާފައިވަނީ ބަލޫޗް ލިބަރޭޝަން ޖަމާއާތުންނެވެ. މި ޖަމާޢާތަކީ، މިދިޔަ ހަފްތާގައި އެ ޤައުމުގެ ރޭލެއް ހައިޖެކްކޮށް، އޭގައި ތިބި ފަސިންޖަރުން ރަހީނުކޮށްގެން ބޭތިއްބުމުގެ ޢަމަލު ވެސް ހިންގާފައިވާ ބައެކެވެ. މީގެ އިތުރުން ބަލޫޗް ލިބަރޭޝަން ޖަމާއާތުން ވަނީ މިދިޔަ އަންގާރަ ދުވަހު ބަލޫޗިސްތާން ޕްރޮވިންސްގެ ރަށްބޭރުގައި ހުންނަ ފަރުބަދައެއްގެ ތެރޭގައި ހަމަލާއެއް ދީ، 31 ސިފައިންނާއި އާންމުން މަރާލާ، ރޭލު ޓްރެކްތައް ގޮއްވާލާފައި ކަމަށް އެ ޤައުމުގެ އަސްކައިއްޔާއިން މަޢުލޫމާތުދެއެވެ.

ބަލޫޗް ލިބަރޭޝަން، ބީއެލްއޭ ޖަމާޢަތުން ވަނީ ގާތްގާތުގައި އެ ޖަމާޢަތުން ހިންގާފައިވާ މި ހުރިހާ ޙަމަލާތަކެއްގެ ވެސް ޒިންމާ އުފުލާފައެވެ.