އިންޑިއާއާއެކު ކުޅޭ އެކުވެރިކަމުގެ މެޗަށް ރާއްޖެ ޓީމު ޝިލޮންގަށް ގޮސްފި

އޭޝިއަން ކަޕް ކޮލިފައިން މެޗުގެ ކުރިން އިންޑިއާއެކު ކުޅުމަށް ނިންމާފައިވާ އެކުވެރިކަމުގެ މެޗަށް، ރާއްޖޭގެ ޓީމު އިންޑިއާގެ ޝިލޮންގަށް ގޮސްފިއެވެ. 

މާދަމާ ކުޅުމަށް ހަމަޖެހިފައިވާ މި މެޗަށް އިންޑިއާގެ ޓީމު ވެސް މިހާރު ވަނީ ޝިލޮންގަށް ގޮސްފައެވެ. މި މެޗު ކުޅުމަށް ހަމަޖެހިފައިވަނީ ޝިލޮންގްގެ ޖަވާހިރްލާލް ނެހުރޫ ސްޓޭޑިއަމުގައެވެ.

މީޑިއާ ރިޕޯޓުތައް ބުނާ ގޮތުން، މިއީ ފީފާ މިންގަނޑަށް ފެތިގެން ޝިލޮންގްގައި ކުޅޭ ފުރަތަމަ މެޗެވެ. އަދި ރާއްޖެއާ ކުޅޭ އެކުވެރިކަމުގެ މެޗަށްފަހު ދެން މި ދަނޑުގައި ކުޅޭނީ އޭޝިއަން ކަޕް ކޮލިފައިންގައި އިންޑިޔާ އާއި ބަނގްލަދޭޝް ބައްދަލުކުރާ މެޗެވެ.

އިންޑިއާ ޓީމުގެ ތަޖުރިބާކާރު ޑިފެންޑަރު އުމުރުން 31 އަހަރުގެ ސަންޑޭޝް ޖިންގަން ބުނީ، އެ ޓީމުގެ އަމާޒަކީ ކޮޅަށް ގޯލެއް ނުވަދެ އެކުވެރިކަމުގެ މެޗުން ރާއްޖެ ބަލިކޮށް، އޭޝިއަން ކަޕް ކޮލިފައިންގައި ބަނގުލަދޭޝްއާ ދެކޮޅަށް އެކަން ތަކުރާރު ކުރުމެވެ.

އަހަރުމެންގެ މައިގަނޑު އަމާޒަކީ ބަނގްލަދޭޝް މެޗު ކާމިޔާބު ކުރުން. އެއީ އޭޝިއަން ކަޕް ކޮލިފައިންގެ ފެށުން ރަނގަޅު ކުރުމަށްޓަކައި. އަހަރެންނަށް ހީވަނީ އަހަރުމެން ކުރިއަށް ގެންދިޔަ 10 ދުވަހުގެ ތަމްރީނަކީ ރާއްޖެ އާއި ބަނގްލަދޭޝް ބަލިކުރަން ވެސް އެހީތެރިވެދޭނެ ކަމެއްހެން. އަހަރުމެންގެ އަމާޒަކީ މި ދެ މެޗުގައި ވެސް ގޯލެއް ވަނަ ނުދީ މޮޅުވުން. ރާއްޖެ މެޗަކީ ބަނގްލަދޭޝްއާ ދެކޮޅަށް ކުޅެން ތައްޔާރުވާން ލިބޭ ވަރަށް ބޯޑު އެހީއަކަށްވާނެ.

އިންޑިޔާގެ ފުޓްބޯޅަ ފެޑަރޭޝަނުން ނެރުނު ރަސްމީ އިންޓަވިއުއެއްގައި ޖިންގަން ބުންޏެވެ.

ރާއްޖެއާ ދެކޮޅަށް ކުޅޭ މެޗުގައި، އިންޑިއާގެ ކުރީގެ ކެޕްޓަން ސުނިލް ޗެތުރީގެ ރިޓަޔާމެންޓު އުވާލުމަށްފަހު އަލުން އަނބުރާ އިންޑިއާގެ ގައުމީ ޓީމުގެ ޖާޒޒީ ލުމަށް ވެސް ވަނީ ނިންމާފައެވެ. ސާކް ސަރަހައްދުގެ އެންމެ މޮޅު ކުޅުންތެރިޔާ އުމުރުން 40 އަހަރުގައި އަލުން ކުޅެން ނުކުތީ ކުލަބު ލެވެލްގައި އޭނާ ދައްކާ ކުޅުން ރަނގަޅުވުމުން އިންޑިޔާ ކޯޗާއި ފެޑަރޭޝަނުގެ އެދުމުގެ މަތީންނެވެ. 

އިންޑިޔާ މެޗަށް ފަހު ރާއްޖެ ވާދަކުރާނީ މި މަހުގެ 25 ވަނަ ދުވަހު އޭޝިއަން ކަޕް ކޮލިފައިންގައި ފިލިޕީންސާ އެވެ. މި މެޗު ކުޅޭނީ ފިލިޕީންސްގަ އެވެ. މި މެޗަށް ރާއްޖެ ދަތުރު ކުރާނީ ޝިލޮންގުން އެނބުރި ރާއްޖެ އައުމަށްފަހު އެވެ. ރާއްޖެ ކުރިން މަސައްކަތް ކުރީ އިންޑިޔާއިން ސީދާ ފިލިޕީންސަށް ދިއުމަށެވެ. ޝިލޮންގެ ދަތުރު ފަތުރުގެ ކަންކަން ދަތިކަމުން ފިލިޕީންސަށް ދިއުން ފަސޭހަ ކުރުމަށް އިންޑިޔާގެ އެހެން ސިޓީއެއްގައި މެޗު ކުޅެން ވެސް ރާއްޖެ ހުށަހެޅި އެވެ. ނަމަވެސް އިންޑިޔާއިން ބަނގްލަދޭޝްއާ ދެކޮޅަށް ކުޅެން ޖެހެނީ ޝިލޮންގައި ކަމަށްވުމުން އެ ގައުމުން ޝެޑިއުލް ބަދަލު ކުރަން ބޭނުންނުވީއެވެ.