ހުޅުމާލެ ފުރަތަމަ ފިޔަވަހިން 6 ކެފޭއެއް ބަލައި ފާސްކޮށް 16 ބިދޭސީއަކު ހައްޔަރުކޮށްފި!

ހުޅުމާލެ ދެވަނަ ފިޔަވަހީގައި ހިންގާ 6 ކެފޭ ހޮޓަލެއް ބަލައި ފާސްކޮށް 16 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އިމިގްރޭޝަންއިން ބުނެފިއެވެ. 

އިމިގްރޭޝަނުން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ މި މަހުގެ 24 އަދި 25 ވަނަ ދުވަހު އިމިގްރޭޝަންގެ ޓާސްކު ފޯސް އިން ވަނީ ހުޅުމާލޭގެ ފޭސް 01ގައި ހިންގަމުންދާ 06 ކެފޭ/ހޮޓާ ބަލައި ފާސްކޮށްފައިކަމަށެވެ.

އަދި މިތަންތަނުގައި ޤަވާއިދާ ޚިލާފަށް ތިބި 16 ބިދޭސީއަކު އިމިގްރޭޝަން ބެލުމުގެ ދަށަށް ގެނެވިފައި ކަމަށްވެސް އިމިގްރޭޝަނުން ވަނީ ބުނެފައެވެ.

އަދި މީގެތެރެއިން ނަގަންޖެހޭ ބައެއް ހުއްދަތައް ނުނަގާ ހިންގަމުންދިއަ 03 ކެފޭއަކަށް ކަމާގުޅުންހުރި އިދާރާތަކުން ނޯޓިސް ދީފައިވާކަމަށްވެސް ވަނީ ބުނެފައެވެ.

މި ރެއިޑުތަކުގައި އާންމުންގެ ފަރާތުން ދެއްވި އެއްބާރުލުމަށް ޝުކުރު ދަންނަވާކަމަށްވެސް އިމިގްރޭޝަނުން ބުނެއެވެ.

https://twitter.com/ImmigrationMV/status/1839275910958297284

އިމިގްރޭޝަނުން ޤަވާއިދާ ޚިލާފަށް އުޅޭ ބިދޭސީން ހޯދުމަށް ކުރަމުންދާ މަސައްކަތުގެ ތެރެއިން ޤަވާއިދާ ޚިލާފަށް އުޅެމުންދާ އެތައް ބިދޭސީއަކު އިމިގްރޭޝަނުން ދަނީ ބަންދުކޮށް ޑީޕޯޓްކުރަމުންނެވެ. އަދި ޤަވާއިދާ ޚިލާފަށް ހިންގާ އެތައް ވިޔަފާރިއެއް ވަނީ ހުއްޓުވައިފައެވެ.