ޚަބަރު
ޅ. އަތޮޅުގައި އައިޑީކާޑު ޕްރިންޓް ކުރުމުގެ ޚިދުމަތް ފަށާފައިވާކަމަށް ޑީއެންއާރުން ވިދާޅުވެއްޖެ

ޅ. އަތޮޅުގައި އައިޑީކާޑު ޕްރިންޓް ކުރުމުގެ ޚިދުމަތް ފަށަން ފަހުމުނާމާއެއްގައި ސޮއިކުރުން/ފޮޓޯ: ޑީއެންއާރް
ޅ. އަތޮޅުގައި ދިވެހި ރައްޔިތެއްކަން އަންގައިދޭ ކާޑު ޕްރިންޓު ކުރުމުގެ ޚިދުމަތް ފަށާފައިވާކަމަށް ޑިޕާރޓްމެންޓް އޮފް ނޭޝަނަލް ރަޖިސްޓްރޭޝަން، ޑީއެންއާރް އިން ވިދާޅުވެއްޖެއެވެ.
ޑީއެންއާރުން ވިދާޅުވީ، އެ އަތޮޅުގައި އައިޑީކާޑު ޕްރިންޓު ކުރުމުގެ ޚިދުމަތް ދޭނީ ޅ. އަތޮޅު ކައުންސިލުން ކަމަށެވެ. އަދި މި ޚިދުމަތް އެ އަތޮޅުގައި ފެށުމާއި އެކު، މިއީ މާލެއިން ބޭރުން އަތޮޅުތަކުގައި މި ޚިދުމަތްދޭ 13 ވަނަ ސަރަޙައްދުކަމަށް ޑީއެންއާރުން ވަނީ ވިދާޅުވެފައެވެ.
ރާއްޖޭގައި މީހުން ދިިރއުޅޭ ކޮންމެ އަތޮޅެއްގައި ވެސް އައިޑީކާޑުގެ ޚިދުމަތް ފޯރުކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެކެވެ. އެހެންކަމުން، މި ވަޢުދުފުޅާއި އެއްގޮތަށް އައިޑީކާޑު ޕްރިންޓުުކުރުމުގެ ޚިދުމަތް ޅ. އަތޮޅުގައި ފެށުމަށް މިއަދު ވަނީ، ޅ. އަތޮޅު ކައުންސިލާއި ޑީއެންއާރާ ދެމެދު ފަހުމުނާމާއެއްގައި ސޮއިކޮށްފައެވެ. ޑީއެންއާރުން ވިދާޅުވީ، މި އެއްބަސްވުމާއި އެކު، ސަރުކާރުގެ ޚިދުމަތްތައް ރައްޔިތުންނަށް ފަސޭހަކަމާއެކު ފޯރުކޮށްދިނުމަށް ކުރާ މަސައްކަތްތަކަށް އިތުރު ކުރިއެރުމެއް ލިބިގެންދާނެ ކަމަށެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވީ، އައިޑީކާދުގެ ޚިދުމަތް ދިނުމަކީ ބޮޑު ހޭދައެއްވާ ކަމެއް ކަމަށެވެ. އެހެންކަމުން، މި ޚިދުމަތަށް ބޭނުންވާ މެޝިނަރީޒް ލިބެމުންދާ ވަރަކަށް އައިޑީކާޑުގެ ޚިދުމަތް ފުޅާވެގެންދާނެ ކަމަށް އެ ވުޒާރާއިން ވަނީ ވިދާޅުވެފައެވެ. ރާއްޖޭގެ އަތޮޅުތެރޭގެ ރަށެއްގައި އައިޑީކާޑު ޕްރިންޓްކުރުމުގެ ޚިދުމަތް ފުރަތަމަ ފަށާފައިވަނީ ގއ. ވިލިނގިލީގައެވެ.