ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ 3 އަންހެނަކު އިމިގްރޭޝަނުން އަތުލައިގެންފި

ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ ދިޔަ 3 އަންހެނަކު އިމިގްރޭޝަނުން އަތުލައިގެންފިއެވެ.

މޯލްޑިވްސް އިިމިގްރޭޝަނުން ވިދާޅުވީ، ރާއްޖޭގައި ވޯރކް ވިސާގައި އުޅެމުންދިޔަ 3 ބިދޭސީ އަންހެނަކު ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދާ މައްސަލައަކާއި ގުޅިގެން ޚާއްޞަ އޮޕަރޭޝަނެއް ހިންގާފައިވާ ކަމަށެވެ. އެގޮތުން، އިމިގްރޭޝަނާއި ފުލުހުން ހިންގި މި އޮޕަރޭޝަނުގެ ދަށުން މި 3 މީހުން ވެސް ވަނީ އެއިދާރާގެ ބެލުމުގެ ދަށަށް ގެނެވިފައިކަމަށް އެ އިދާރައިން މަޢުލޫމާތުދެއެވެ. 

އިމިގްރޭޝަނުން ވިދާޅުވީ، ހަށިވިއްކުމުގެ ވިޔަފާރިއާ ގުޅިގެން ހައްޔަރުކޮށްފައިވަނީ ވިއެޓްނަމްއަށް ނިސްބަތްވާ ދެ އަންހުންނާއި ލާއޮސްއަށް ނިސްބަތްވާ އަންހެނެއް ކަމަށެވެ. މީގެ ތެރެއިން، ވިއެޓްނަމް އަށް ނިސްބަތްވާ ޢުމުރުން 44 އަހަރުގެ ތީ މިންހް ވޫ އާއި އުމުރުން 38 އަހަރުގެ ތީ ހަންގް ދާއޯ ވަނީ މިހާރު ޑީޕޯޓުކޮށްލާފައި ކަމަށް އިމިގްރޭޝަނުން ވިދާޅުވެއެވެ. މީގެ އިތުރުން ލާއޮސްއަށް ނިސްބަތްވާ އުމުރުން 37 އަހަރުގެ ސައުތިޑާ ފިއްމަސޯން ޑީޕޯޓުކުރުމުގެ މަސައްކަތް މިހާރު ކުރަމުން އަންނަ ކަމަށް އިމިގްރޭޝަނުން ވަނީ ވިދާޅުވެފައެވެ.

މޯލްޑިވްސް އިމިގްރޭޝަނުން ވަނީ މީގެ ކުރިން ވެސް ރާއްޖޭގައި ހަށިވިއްކުމުގެ ވިޔަފާރިކުރަމުންދާ މީހުން ހޯދުމަށް ޚާއްޞަ އޮޕަރޭޝަންތައް ހިންގައި، އެފަދަ މީހުން ރާއްޖެއިން ޑީޕޯޓުކޮށްލާފައެވެ.