Ads by Exprox

ޚަބަރު

ދަރިވަރުންގެ އިޙްޔާ: މިރޭގެ ފޯރަމް ހުށައަޅައިދޭނީ އަޙްމަދިއްޔާ އިންޓަނޭޝަނަލް ސްކޫލްއިން!

ދަރިވަރުންގެ އިޙްޔާ: މިރޭގެ ފޯރަމް ހުށައަޅައިދޭނީ އަޙްމަދިއްޔާ އިންޓަނޭޝަނަލް ސްކޫލްއިން!

އަޙްމަދިއްޔާ އިންޓަނޭޝަނަލް ސްކޫލްގެ ގޭޓް-1 ސަރަޙައްދު/ފޮޓޯ: ދައުރު

17 މާރިޗު 2025، 09:25

1446 ވަނަ އަހަރުގެ ރަމަޟާން މަހުގެ ރޭތައް އިޙްޔާ ކުރުމަށް ބާއްވާ ދަރިވަރުންގެ އިޙްޔާގެ ފަސްވަނަ ފޯރަމް މިރޭ ބޭއްވުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅެވެއްޖެ އެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ދަރިވަރުންގެ އިޙްޔާ ފޯރަމް ސިލްސިލާގެ ފަސްވަނަ ފޯރަމް އޮންނާނީ މިރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ކަމަށެވެ. 
 
މިރޭގެ ފޯރަމް ހުށައަޅައިދޭނީ އަޙްމަދިއްޔާ އިންޓަނޭޝަނަލް ސްކޫލްގެ ދަރިވަރުންނެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ފެށުމަށް ހަމަޖެހިފައިވަނީ މިރޭ 21:30 ގައި ކަމަށެވެ. އަދި މި ފޯރަމް އިސްލާމީ ކަންތައްތަކާ ބެހޭ ވުޒާރާގެ ފޭސްބުކް ޕޭޖް މެދުވެރިކޮށް ލައިވް ކުރުމަށް ވަނީ ހަމަޖެހިފައެވެ.

 މިރޭގެ ފޯރަމްގައި ދަރިވަރުން އަލިއަޅުއްވާލާނީ، "ދެމެހެއްޓެނިވި ތަރައްޤީއަށް އިސްލާމިކް ފައިނޭންސިންގގެ ދައުރު" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ދަރިވަރުންގެ އިޙްޔާ ފޯރަމަކީ އެ ވުޒާރާއިން ދީނީ ހޭލުންތެރިކަން އިތުރުކުރުމުގެ މަޤްޞަދުގައި މާލެ ސަރަޙައްދުގެ މަތީޘާނަވީ ސްކޫލްތަކުގެ ދަރިވަރުންނާއެކު، އެދަރިވަރުން ހުށަހަޅައިދޭ ގޮތަށް ބާއްވާ ފޯރަމެއްކަމަށެވެ. މިޕްރޮގުރާމް ކުރިއަށް ގެންދަން ހަމަޖެހިފައިވަނީ މަތީޘާނަވީ ސްކޫލްތަކުގެ ދަރިވަރުން މައުޟޫޢުތަކަށް ތައްޔާރުވެ، ހުށަހަޅާ ޕްރޮގުރާމެއްގެ ގޮތުގައެވެ.

މިއަހަރުގެ ދަރިވަރުންގެ އިޙްޔާ ފޯރަމްގައި 6 ސްކޫލަކުން ހުށައަޅައިދިނުމަށް ވަނީ ހަމަޖެހިފައެވެ. އެގޮތުން، ދަރިވަރުންގެ އިޙްޔާ ފޯރަމް ހުށައަޅައިދޭނީ، އަޙްމަދިއްޔާ އިންޓަރނޭޝަނަލް ސްކޫލް، މަދްރަސަތުލް ޢަރަބިއްޔަތުލް އިސްލާމިއްޔާ، ވިލާ އިންޓަރނޭޝަނަލް ހައި ސްކޫލް، ސެންޓަރ ފޮރ ހަޔަރ ސެކަންޑަރި އެޑިޔުކޭޝަން (މާލެ) ، ސެންޓަރ ފޮރ ހަޔަރ ސެކަންޑަރި އެޑިޔުކޭޝަން (ހުޅުމާލެ) އަދި ބިލަބޮންގ ހައި އިންޓަނޭޝަނަލް ސްކޫލް އިންނެވެ.

ދަރިވަރުންގެ އިޙްޔާ ފޯރަމްތައް އޮންނާނީ ކޮންމެ ހަފްތާއެއްގެ ހޯމަ އަދި ބުދަ ދުވަހުގެ ރޭގައިކަމަށް އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތުދެއެވެ.

މި ލިޔުން ކިޔާލުމުން

Ads by MSS