ޚަބަރު
މާލޭގައި ހުންނަ ކުޑަ މާރުކޭޓެއްގައި ޤަވާއިދާ ޚިލާފަށް މަސައްކަތް ކުރަމުންދިޔަ ބިދޭސީއެއް އިމިގްރޭޝަންގެ ބެލުމުގެ ދަށަށް

ރާއްޖޭގައި ޤަވާއިދާ ޚިލާފަށް ވިޔަފާރި ކުރަމުން ދިޔަ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންދިތުން/ފޮޓޯ: އިމިގްރޭޝަން
ރާއްޖޭގައި ޤަވާއިދާ ޚިލާފަށް ވިޔަފާރި ކުރަމުން ދިޔަ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ވިދާޅުވީ، ޤަވާއިދާ ޚިލާފަށް ރާއްޖޭގައި ވިޔަފާރިކުރަމުންދާ ބިދޭސީން ހޯދައި، އެފަރާތްތަކާއި މެދު އަޅަންޖެހޭ އެކަށީގެންވާ ފިޔަވަޅުތައް އެޅުމުގެ މަސައްކަތްތައް މި ރަމަޟާން މަހުގައިވެސް ހުއްޓުމެއްނެތި ކުރިއަށް ދާނެ ކަމަށެވެ.
މޯލްޑިވްސް އިމިގްރޭޝަނުން ވިދާޅުވީ، ޤަވާއިދާ ޚިލާފަށް ވިޔަފާރިކޮށް ރާއްޖޭގައި އުޅެމުންދާ ބިދޭސީން ބަލައި ފާސްކުރުމަށް ހުއްޓުމެއްނެތި ކުރިއަށްދާ އޮޕަރޭޝަންތަކުގެ ތެރެއިން އިއްޔެ މާލޭގައި ހިންގަމުންދިއަ ކުޑަ މާރުކޭޓެއް ބަލައި ފާސްކޮށްފައިވާ ކަމަށެވެ. އަދި އެތަނުގައި ޤަވާއިދާ ޚިލާފަށް މަސައްކަތް ކުރަމުންދިއަ ބިދޭސީއެއް އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށް އެ އިދާރާއިން ވަނީ ވިދާޅުވެފަ އެވެ.
މީގެ އިތުރުން އިމިގްރޭޝަނުން ވިދާޅުވީ، ކުރިއެކޭ ވެސް އެއްގޮތަށް މިހާރު ވެސް އިމިގްރޭޝަންގެ ރެއިޑް އޮޕަރޭޝަންތައް ކުރިއަށްދާނެ ކަމަށެވެ. އަދި ރަމަޟާން މަހުގައި ވެސް އެ އިދާރާގެ މަސައްކަތްތަކަށް ހުއްޓުމެއް ނާންނާނެ ކަމަށް އިމިގްރޭޝަނުން ވިދާޅުވިއެވެ. އިމިގްރޭޝަނުން ވަނީ މިއަހަރުގެ ތެރޭގައި ވެސް ގިނަ ރެއިޑް އޮޕަރޭޝަންތަކެއް ހިންގާ، 100 އަށް ވުރެ ގިނަ ބިދޭސީން އެ އިދާރާގެ ބެލުމުގެ ދަށަށް ގެންގޮސްފައެވެ. އަދި އެ އިދާރާގެ ޑީޕޯޓޭޝަން ސެންޓަރުގައި ބަންދުކުރެވޭ ފަރާތްތައް އެމީހުންގެ ގައުމުތަކަށް ފޮނުވުމުގެ މަސައްކަތް ވެސް ކުރަމުންދާކަމަށް އިމިގްރޭޝަނުން މަޢުލޫމާތުދެއެވެ.
އިމިގްރޭޝަންގެ ޚާއްޞަ އެކި ހަރަކާތްތަކާއި، ރެއިޑް އޮޕަރޭޝަންތަކަކީ ރާއްޖޭގެ އެކި ކަންކޮޅުތަކުގައި ކުރިއަށްދާ މަސައްކަތެކެވެ.