ދުނިޔެ

ބްރެޒިލްގައި ސައިންޓިސްޓުން ކުރި ދިރާސާއަކުން އާ ވައްތަރެއްގެ ކޮރޯނާވައިރަސް އެއް ފެނިއްޖެ

ބްރެޒިލްގައި ސައިންޓިސްޓުން ކުރި ދިރާސާއަކުން އާ ވައްތަރެއްގެ ކޮރޯނާވައިރަސް އެއް ފެނިއްޖެ

ބްރެޒިލްގައި ސައިންޓިސްޓުން ކުރި ދިރާސާގެ ތެރެއިން/ފޮޓޯ: ޖާނަލް އޮފް މެޑިކަލް ވައިރޮލޮޖީ

17 މާރިޗު 2025، 11:10

ބްރެޒިލްގައި ސައިންޓިސްޓުން ކުރި ދިރާސާއަކުން އާ ވައްތަރެއްގެ ކޮރޯނާވައިރަސްއެއް ފެނިއްޖެއެވެ.

ބްރެޒިލްގެ ސައިންޓިސްޓުން ކުރި ދިރާސާއަކުން ހާމަވާގޮތުގައި، އެމީހުން ޓެސްޓުކުރި ވާލެއްގެ ގައިން ވަނީ އައު ކޮރޯނާވައިރަސްއެއް ފެނިފައެވެ. އަދި މި ވައިރަސްއަކީ، މިޑްލް އީސްޓް ރެސްޕިރޭޓަރީ ސިންޑްރޯމް، މާރސް ވައިރަސްއާ 72 އިންސައްތަ އެއްގޮތް ވައިރަސްއެއް ކަމަށް މި ދިރާސާއިން ވަނީ ދައްކާފައެވެ. މި ދިރާސާއަކީ، ސާއޯ ޕައުލޯ އަދި ސެއަރާގެ ތަޙުޤީޤުވެރިން ހޮންކޮން ޔުނިވަރސިޓީއާ ގުޅިގެން ކުރި ދިރާސާއެކެވެ. 

މި ދިރާސާގައި، 423 ބާވަތެއްގެ ވާލުގެ ގައިން ވަނީ ސާމްޕަލް ނަގައި ޓެސްޓުކޮށްފައެވެ. އަދި މި ދިރާސާގެ ނަތީޖާ ޖާނަލް އޮފް މެޑިކަލް ވައިރޮލޮޖީގައި ޝާއިޢުކޮށްފައިވާއިރު، މި ވައިރަސްގެ ސްޕައިކް ޕްރޮޓީނަކީ މާރސް ވައިރަސްގެ ސްޕައިކް ޕްރޮޓީނާ 71.74 އިންސައްތަ އެއްގޮތް އެއްޗެއްކަން ދިރާސާއިން ވަނީ ދައްކާފައެވެ. ނަމަވެސް، މި ވައިރަސްއަކީ އިންސާނުންނަށް ޖެހޭ ވައިރަސްއެއްތޯ އަދި ކަށަވަރުވެފައިނުވާ ކަމަށް އެ ދިރާސާގެ ނަތީޖާގައި ފާހަގަކޮށްފާވެއެވެ.

މި ދިރާސާގެ މައިގަނޑު ލިޔުންތެރިޔާ ބްރޫނާ ސްޓެފަނީ ސިލްވޭރިއޯ ބުނެފައިވާ ގޮތުގައި، މި ވައިރަސްގެ ސްޕައިކް ޕްރޮޓީނުން މާރސް ވައިރަސް އިންސާނުންގެ ގަޔަށް އަރާ ރިސެޕްޓަރާ ގުޅުމުގެ ފުރުސަތު އޮތްކަމަށް ފާހަގަކުރެވެއެވެ. ނަމަވެސް، އަދި މި ވައިރަސްއަކީ އިންސާނުންނަށް ޖެހޭ އެއްޗެއްކަން ޔަޤީންވެފައި ނުވާކަން އޭނާ ވަނީ ފާހަގަކުރައްވާފައެވެ. އެހެންކަމުން، މި ވައިރަސްއާއި ގުޅޭ އިތުރު ހޯދުންތައް ހޯދުމަށް ހޮންކޮންގުގެ ހައި-ބަޔޯސެކިއުރިޓީ ލެބޯޓްރީތަކުގައި ދިރާސާތައް ކުރިއަށް ގެންދިއުމަށް ވަނީ ހަމަޖެހިފައެވެ. އަދި މި ދިރާސާތަކުގައި އިންސާނުންނަށް މި ވައިރަސްއިން ކުރިމަތިވެދާނެ ނުރައްކާތަކާ ގުޅޭ ދިރާސާތައް ކުރެވޭނެއެވެ.

މި ދިރާސާގެ ދެވަނަ ލިޔުންތެރިޔާ ރިކާޑޯ ޑުރާއެސް-ކަރްވަލްހޯ ވަނީ ވާލަކީ ވައިރަސްތައް އުފެދޭ މުހިންމު އެއްޗަކަށްވާތީ، އެ ޖަނަވާރުތަކަށް އަބަދުވެސް އެޕިޑެމިއެމިއޮލޮޖިކަލް ސަރވެއިލަންސް ހަދަމުން ގެންދަންޖެހޭކަން ފާހަގަކޮށްފައެވެ. ހަމަ އެހެންމެ، މިފަދަ ދިރާސާތައް ފުޅާ ދާއިރެއްގައި ކުރަންޖެހޭ ކަމަށް އޭނާ ވަނީ ބުނެފައެވެ. އަދި މިކަމާއި ގުޅުން ހުރި އެންމެހާ ފަރާތްތަކުން ގުޅިގެން މި ދިރާސާ ކުރިއަށް ގެންދިޔުމަކީ މުހިންމުކަމެއް ކަމަށް އޭނާ ވަނީ ބުނެފައެވެ.

މި ވައިރަސް ފެނުމާއިއެކު ސައިންޓިސްޓުން ވަނީ މިކަމަށް ޚާއްޞަ ސަމާލުކަމެއްދީ، މި ވައިރަސްއާއި ގުޅުންހުރި އިތުރު ދިރާސާތައް ކުރުމަށް ތައްޔާރުވެފައެވެ. އަދި މިކަމުގެ ސަބަބުން އިންސާނުންގެ ޞިއްޙަތަށް ނުރައްކާވެދާނެ ކަމުގެ ބިރު އޮތްކަމަށް ސައިންޓިސްޓުން ވަނީ ބުނެފައެވެ.

މި ލިޔުން ކިޔާލުމުން

Ads by MSS