ސްކޭމް މައްސަލަތައް އިތުރުވަމުންދިއުމާ ގުޅިގެން އެކަމަށް ޙާއްސަ މަރުކަޒު އޮޕަރޭޝަނަށް ގެނަސްފި

ދިވެހިރާއްޖޭގައި ސްކޭމް މައްސަލަތައް އިތުރުވަމުންދިއުމާ ގުޅިގެން، އެ މައްސަލައަށް ޙައްލެއް ހޯދުމުގެ މަޤުސަދުގައި ދިވެހި ފުލުހުންގެ ޚިދުމަތުން އެކަމަށް ޙާއްސަކޮށް ޤާއިމްކޮށްފައިވާ މަރުކަޒު އޮޕަރޭޝަނަށް ގެނަސްފިއެވެ.

މިކަމާ ގުޅިގެން ފުލުހުން ނެރުނު ބަޔާނެއްގައި ބުނީ، އެ އިދާރާގެ ސްޓްރެޓީޖިކް ޕްލޭން 2024-2028 ގެ ދަށުން 2024ވަނަ އަހަރުގެ ޖޫން މަހު ވަނީ އެންޓި ސްކޭމް ސެންޓަރުގެ ނަމުގައި ސެންޓަރެއް ޤާއިމްކޮށްފައިވާ ކަމަށެވެ. އަދި އިއްޔެއިން ފެށިން ރާއްޖޭގެ ހުރިހާ ސަރަޙައްދެއްގައި ހިނގާ ސްކޭމްގެ މައްސަލަތަކާ ގުޅިގެން ފިޔަވަޅު އެޅުމާއި، ކުރަންޖެހޭ އެހެނިހެން ކަންކަން ކުރިޔަށް ގެންދާނީ އެ ސެންޓަރުގެ ބެލުމުގެ ދަށުން ކަމުގައި ކޮމިޝަނަރ އޮފް ޕޮލިސް ނިންމާފައިކަމަށް އެ ބަޔާނުގައި ވަނީ ބުނެފައެވެ.

މިއާއެކު، ސްކޭމް މައްސަލަތަކަށް ޙާއްސަ ކޯލް ސެންޓަރެއް ވެސް ވަނީ ޤާއިމްކޮށްފައެވެ. މިކޯލް ސެންޓަރަށް މައްސަލައެއް ރިޕޯޓްކުރާ ހިސާބުން ފެށިގެން މާލީ އިދާރާތަކާ ގުޅިގެން އަޅަންޖެހޭ ފިޔަވަޅުތައް އެޅުމާއި އެއިދާރާތަކުން ލިބެންޖެހޭ މަޢުލޫމާތު ހޯދުމުގެ މަސައްކަތް ކުރިއަށް ގެންދާނީ އެންޓި ސްކޭމް ސެންޓަރުންނެވެ.

އަދި އިއްޔެއިން ފެށިގެން ނޭޝަނަލް އިމަރޖެންސީ ނަމްބަރު 911 އާއި އެންޓި ސްކޭމް ހޮޓްލައިން 125 (އެކްސްޓެންޝަން 2020) އަދި އެންޓި ސްކޭމް ސެންޓަރުގެ އީމެއިލް [email protected] މެދުވެރިކޮށް ރާއްޖެއާއި ރާއްޖެއިން ބޭރުންވެސް ސްކޭމްއާ ގުޅުންހުރި މައްސަލަތައް ރިޕޯޓްކުރުމުގެ އިންތިޒާމް ހަމަޖެހިފައިވާކަމަށް ފުލުހުންގެ ޚިދުމަތުން ވިދާޅުވެއެވެ. އަދި މިހާރެކޭވެސް އެއްގޮތަށް މާލެއާއި އަތޮޅުތަކުގައި ޤާއިމްކޮށްފައިވާ ސެންޓަރުތަކަށް ވެސް މިފަދަ މައްސަލަތައް ހުށަހެޅޭނެކަމަށް ފުލުހުން ވިދާޅުވެއެވެ. 

ފުލުހުންގެ ޚިދުމަތުންވަނީ ކުރިއަށް އޮތް ދުވަސްތަކުގައިވެސް ސްކޭމް މައްސަލަތައް ހުއްޓުވުމަށް އެފަދަ މައްސަލަތައް ވީ އެންމެއަވަހަކަށް އެންޓި ސްކޭމް ސެންޓަރަށް ރިޕޯޓްކުރުމަށް އެދިވަޑައިގެންފައެވެ.
އަދި ސްކޭމް މައްސަލަތައް ހައްލުކުރުމަށް ފުލުހުންގެ ޚިދުމަތާއި މާލީ އިދާރާތަކުން ކުރަމުން އަންނަ މަސައްކަތަށް ރައްޔިތުންގެ ފަރާތުން ލިބޭ އެއްބާރުލުމަށް ފުލުހުންވަނީ ޝުކުރުއަދާކުރައްވާފައެވެ.