އިންޑިއާއާއި ރާއްޖެއާ ދެމެދު ކުރެވޭ ވިޔަފާރީގައި ދެ ގައުމުގެ ފައިސާ ބޭނުންކުރެވޭގޮތް ހަދައިފި

އިންޑީއާ އާއި ދިވެހިރާއްޖެއާ ދެމެދު ހިންގޭ ވިޔަފާރީގެ މުޢާމަލާތްތަކުގައި ދިވެހި ރުފިޔާ ބޭނުންކުރުމުގެ ޙުއްދަ ދެއްވައިފިއެވެ. 

ރިޒާރވް ބޭންކް އޮފް އިންޑިއާ ކަމަށްވާ އިންޑިއާގެ މަރުކަޒީ ބޭންކުން ވަނީ، އިއްޔެ ނެރުނު ސެކިއުލާރއެއްގައި އިންޑިއާއާއި ދިވެހިރާއްޖެއާ ދެމެދު ހިންގޭ ދ‌ޭދޭ ޤައުމުތަކުގެ މާލީ މުޢާމަލާތްތަކުގައި އޭސިއަން ކްލިއަރިންގ ޔޫނިއަން (އޭސީޔޫ) މެކޭނިޒަމްގެ އިތުރުން ދިވެހި ރުފިޔާ އަދި އިންޑިއަން ރުޕީ ބޭނުންކުރެވޭނެކަމަށް އަންގަވާފައެވެ.

އޭސީޔޫ މެކޭނިޒަމަކީ ސަރަޙައްދީ ޤައުމުތަކުގެ މަރުކަޒީ ބޭންކުތަކުގެ ތެރެއިން އޭސީޔޫގައި ބައިވެރިވާ ޤައުމުތަކުން މާލީ މުޢާމަލާތްތައް ހިންގާ ނިޒާމެކެވެ. އޭސީޔޫގައި ދިވެހިރާއްޖޭގެ އިތުރުން ބަންގްލަދޭޝް، ބެލަރޫސް، ބޫޓާން، އިންޑިއާ، އީރާން، މިޔަންމާ، ނޭޕާލް، ޕާކިސްތާން އަދި ސްރީލަންކާ ހިމެނެއެވެ.

މި ނިންމުމަކީ، މިދިޔަ އަހަރު ނޮވެމްބަރު މަހު ދެ ޤައުމުގެ ދެމެދު ސޮއިކުރެވުނު ފަހުމުނާމާއަކާ ގުޅިގެން އައި ބަދަލެކެވެ. އިންޑިއާގެ މަރުކަޒީ ބޭންކުން މަޢުލޫމާތުދެއްވާފައިވާ ގޮތުގައި މި ނިންމުމަށް ވަގުތުން ޢަމަލުކުރަން ފެށޭނެއެވެ. ހަމައެހެންމެ، މި ނިންމުން ނިންމާފާއި ވަނީ، އިންޑިއާއަކީ ދިވެހިރާއްޖެއަށް ކާޑުގެ ބާވަތްތައް އެކްސްޕޯޓުކުރާ މައި ޤައުމަށްވެފައި، މިގޮތަށް މި ނިންމުން ނިންމައިފިނަމަ، ފައިސާދެއްކުމުގެ ކަންކަން އިތުރަށް ލުއިފަސޭހަވެ، ވިޔަފާރީގެހަރުދަނާކަން އިތުރުވާނެކަމަށް ބެލެވޭތީއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވެވި މަޝްވަރާ ބައްދަލުވުންތަކަށްފަހު، ދެ ޤައުމުގެ ދެމެދު އެއްބަސްވުންތައް ބަދަލުކުރުމަށް ބޭއްވި ރަސްމިއްޔާތުގައި ދިވެހިރާއްޖޭގައި އިންޑިއާގެ ރުޕޭ ކާޑު ބޭނުންކުރެވޭނެ ގޮތްވެސް ވަނީ ހަމަޖައްސާފައެވެ.