އިޒްރާއިލުން ޣައްޒާއަށް އަނެއްކާވެސް ވަރުގަދަ ހަމަލާތަކެއް ދޭންފަށައިފި

އިޒްރާއިލުން ޣައްޒާއަށް އަނެެއްކާވެސް ވަރުގަދަ ހަމަލާތަކެއް ދޭންފަށައިފިއެވެ.

ޣައްޒާގައި މީހުން ދިރިއުޅެމުންދާ ސަރަހައްދުތަކަށް އިޒްރާއިލުން ވަރުގަދަ ހަމަލާތައް ދޭން ފަށައިފައިވަނީ އިންޒާރުދިނުމެއް ނެތި ކުއްލިއަކަށެވެ. މި ހަމަލާތަކުގެ ސަބަބުން ގިނަ ބަޔަކު ވަނީ ޝަހީދުވެގެން ގޮސްފައެވެ. 

އިޒްރާއިލުން ޣައްޒާއަށް ދިން މި ހަމަލާއަކީ ޣައްޒާއަށް ކާބޯތަކެއްޗާއި އެހެނިހެން އިންސާނީ އެހީގެ ތަކެތި ނުވެއްދޭނެހެން ބޯޑަރު ބަންދުކުރިތާ 16 ދުވަސްފަހުން ދިން ހަމަލާތަކެކެވެ.

އިޒްރާއިލްގެ ހަމަލާތައް ޣައްޒާގައި ހާލުގައި ޖެހިފައިތިބި މީހުން ވަގުތީ ހިޔާވަހިކަން ހޯދަމުންދާ ސްކޫލްތަކާއި މީހުން ދިރިއުޅޭ ސަރަހައްދުތަކަށް ވައިގެ މަގުން ޑްރޯން ހަމަލާތައް ދީފައިވާއިރު ޣައްޒާގެ ދެކުނަށް ހަނގުރާމަމަތީ ޓޭންކަރުތަކާއި އެކު އިޒްރާއިލް ސިފައިން ވަނީ ހަމަލާދީފައެވެ.

ޣައްޒާގެ ބިމުން ރިޕޯޓު ކުރަމުން އަލްޖަޒީރާގެ ނޫސްވެރިން އެންމެ ފަހުން ދީފައިވާ މައުލޫމާތުން އެނގޭ ގޮތުގައި، މި ހަމަލާތަކުގައި މިހާތަނަށް 300 މީހުން ޝަހީދުވިކަމަށް ވަނީ ދެނެގަނެވިފައެވެ. އަދި އޭގެތެރޭގައި ގިނަ ޢަދަދެއްގެ ކުޑަކުދިން ހިމެނެއެވެ. 

ހިންދް ޚައުދަރީ ބުނެފައިވަނީ މި ހަމަލާތަކުގެ ސަބަބުން ޣައްޒާގެ ރައްޔިތުން ތިބީ ސިހުންވެރިކަމެއްގެ ތެރޭގައި ކަމަށެވެ. މި ހަމަލާތައް ދިންއިރު ގިނަ ބަޔަކު ތިބީ ނިދާފައިކަމަށް ހިންދު ބުނެފައިވެއެވެ.

އިޒްރާއިލުން ޣައްޒާއަށް ވަރުގަދަ ހަމަލާތަކެއް ދޭން ފަށައިފައި މިވަނީ ސުލްޙައިގެ ވާހަކަތައް ވެސް ކުރިއަށްގެންގޮސްފައިވާ ދަނޑިވަޅެއްގައެެވެ. އިޒްރާއިލްގެ ބޮޑު ވަޒީރުގެ އޮފީހުން މި ހަމަލާތައް ދިން ސަބަބެއްކަމަށް ބުނެފައިވަނީ ހަމާސްއިން ރަހީނު ކޮށްފައި ތިބި އިޒްރާއިލްގެ ރަހީނުން އެއްފަހަރާ ދޫކޮށްނުލުމެވެ. 

އިޒްރާއިލުން މިހެން ބުނި ނަމަވެސް ޞުލްޙައިގެ ވާހަކަތަކުގެ ދެވަނަ ބުރުން އެމީހުން އަމިއްލައަށް ވަނީ ވަކިވެފައެވެ. އެ ވާހަކަތަކުގައި ހަނގުރާމަ އެއްކޮށް ހުއްޓާލުމުގެ ވާހަކަތައް ދެއްކޭނެކަމަށް ބުނެވިފައިއޮތެވެ.

އަދިވެސް ހަމާސްގެ ބެލުމުގެ ދަށުގައި އިޒްރާއިލްގެ 59 މީހަކު އެބަތިއްބެވެ.