އަރިޔަދޫގައި "ކޮކްނަޓް ޑިވެލޮޕްމަންޓް ސެންޓަރ" ޤާއިމްކުރުމުގެ މަޝްވަރާގައި ބައިވެރިވުމަށް ފުރުސަތު ހުޅުވާލައިފި

އަރިޔަދޫގައި "ކޮކްނަޓް ޑިވެލޮޕްމަންޓް ސެންޓަރ" ޤާއިމްކުރުމުގެ މަޝްވަރާގައި ބައިވެރިވުމުގެ ފުރުސަތު، ދަނޑުވެރިކަމާބެހޭ ވުޒާރާއިން ހުޅުވާލައިފިއެވެ.

އދ. އަރިޔަދޫ އަކީ ދަނޑުވެރިކަމާ ދިރޭތަކެއްޗާ ބެހޭ ވުޒާރާގެ ރަށެއްގެ ގޮތުގައި 2025 މާރިޗް 9 ވީ އާދީއްތަ ދުވަހު ބޭއްވުނު ވަޒީރުންގެ މަޖިލީހުގެ ޖަލްސާއިން ވަނީ ނިންމަވާފައެވެ. އެއާއިއެކު ދިވެހިރާއްޖޭގައި ރުއް އާލާ ކުރުމުގެ ޤައުމީ ޕްރޮގްރާމުގެ ދަށުން އަރިޔަދޫގައި "ކޮކޮނަޓް ޑިވެލޮޕްމަންޓް ސެންޓަރ" އެއް ޤާއިމުކޮށް ދިވެހިރާއްޖޭގައި ހެދޭ، އަދި ހައްދަން ބޭނުންވާ މަތިވަރާއި، ފެންވަރު ރަނގަޅު (ޖެނެޓިކަލީ އިމްޕްރޫވްޑް) ރުކުގެ ނާސަރީތަކެއް ގާއިމުކޮށް ރުކުގެ ސެޓިފައިޑް ތަފާތު މުޑުވައްތައް ދެމެހެއްޓެނިވި ގޮތެއްގައި ރަށްތަކަށް ފޯރު ކޮށްދިނުމުގެ މަސައްކަތް ކުރުމަށް ވަނީ ނިންމާފައެވެ. އެހެންކަމުން މި މަސައްކަތް ކުރިޔަށް ގެންދާނެ ގޮތްތަކާއިގުޅޭގޮތުން ޚިޔާލާއި މަޝްވަރާ ދެއްވަން ބޭނުންފުޅުވާ ފަރާތްތަކަށް ނަން ނޯޓް ކުރުމުގެ ފުރުޞަތު އެ ވުޒާރާއިން ވަނީ ހުޅުވާލާފައެވެ.

އެގޮތުން މިހާރު މިވުޒާރާއިން ވާނީ ގޫގުލް ފޯމެއް ތައްޔާރުކޮށްފައެވެ. މި ފޯމް މެދުވެރިކޮށް ނަންނޯޓް ކުރުމުގެ ފުރުސަތު ހުރިހާ ފަރާތްތަކަކަށްވެސް ވަނީ ހުޅުވާލެވިފައެވެ.

ދަނޑުވެރިކަމާބެހޭ ވުޒާރާއިން އަރިޔަދޫގައި ހިންގުމަށް ހަމަޖެހިފައިވާ ޕްރޮޖެކްޓްގައި ހޭޅިފަށުގައި ހެދޭ ގަސްގަހާއިގެހި އާލާ ކުރުމަށާއި، ކާނާގެ ޔަގީންކަން ގާއިމުކުރުމަށްޓަކައި، ޕްރޮގްރާމްތައް ހިންގުމަށް ބޭނުންވާ ތަފާތު މުޑުވައްތައް ވެސް އެ ރަށުގައި އުފެއްދުމަށް ވަނީ ނިންމަވާފައެވެ.

ޤައުމީ ފެންވަރުގައި ކުރާ މިފަދަ ބޮޑެތި މަޝްރޫޢުތަކަށް އާންމުންގެ ޙިޔާލާއި މަޝްވަރާއަކީ ނުހަނު ބޭނުންތެރި އެއްޗެކެވެ.