ކޮންމެ މީހަކާ ހަވާލުކުރެވުނު މަސްޢޫލިއްޔަތު އަދާކުރެވުނު ގޮތާ މެދު ޤިޔާމަތްދުވަހު ސުވާލުކުރެވޭނެ!

ކޮންމެ މީހަކާ ހަވާލުވެފައިވާ މަސްޢޫލިއްޔަތު އަދާކުރީ ކިހިނެއްތޯ ޤިޔާމަތް ދުވަހުން ސުވާލުކުރެވޭނެ ކަމަށް މިއަދުގެ ހުކުރު ޚުޠުބާގައި ބުނެފިއެވެ. 

“ޒިއްމާދާރުވުމާއި މަސްއޫލިއްޔަތު އުފުލުން” މި މައުޟޫއަށް އިއްވި މިއަދުގެ ހުކުުރު ޚުޠުބާގައި ބުނެފައިވަނީ އިސްލާމީ މުޖްތަމަޢުގެ ކޮންމެ ފަރުދަކީ މަސްޢޫލިއްޔަތެއް އޮތް މީހެއް ކަމަށާއި، އޭނާގެ މައްޗަށް ވާޖިބުތަކެއް ހުރި މީހެއް ކަމަށެވެ.

މީގެއިތުރުން ކޮންމެ އިންސާނަކީ، އެމީހަކު މި ދުނިޔޭގައި ކުޅަ ކޮންމެ ޢަމަލަކާ މެދު، ބުނި ކޮންމެ ބަހަކާ މެދު، މާތް اللهގެ ޙަޟްރަތުގައި ޖަވާބުދާރީވާން ޖެހޭނެ މީހެއް ކަމަށް ޚުޠުބާގައި ބުނެފައިވެއެވެ. އަދި ހަމަ އެ ފަދައިން ކޮންމެ މީހަކީ ތިމާ ދިރިއުޅެމުންދާ މުޖުތަމަޢުގައި، އޭނާ ހިމެނޭ ހައިސިއްޔަތަކުން އެހެން މީހުންގެ ކުރިމަތީގައި ޖަވާބުދާރީވާން ޖެހޭނޭ މީހެއް ކަމަށްވެސް ބުނެފައިވެއެވެ.

އަދި މައިންބަފައިން، މުދައްރިސުން، އެކިއެކި އޮފީސްތަކުގެ ވެރީންނާއި މުވައްޒަފުން އެމީހުންނާ ޙަވާލުވެފައިވާ މަސްއޫލިއްޔަތާ މެދު ދުނިޔެއާއި އާޚިރަތުގައި ވެސް ޖަވާބުދާރީވާން ޖެހޭނެ ކަމަށް ޚުޠުބާގައި ބުނެފައިވެއެވެ.

“ޒިއްމާދާރުވުމާއި، މަސްޢޫލިއްޔަތު އަދާކުރުމުގައި ޤައުމުގެ އިސް ވެރީންނާއި، ޤާނޫނު ހަދާ މުއައްސަސާތަކާއި، ޢަދުލުއިންޞާފު ޤާއިމުކުރާ މުއައްސަސާތަކާއި، ޤާނޫނު ނަގަހައްޓާ މުއައްސަސާތަކާއި، ޤައުމުގެ ސިޔާދަތާއި އަމްނު އަމާންކަން ބަލަހައްޓާ މުއައްސަސާތަކާއި، އިޤްތިޞާދާއި ބައިތުލްމާލު ބަލަހައްޓާ މުއައްސަސާތަކުގެ ޒިންމާއާއި މަސްއޫލިއްޔަތު ވަކީން ބޮޑު، މީގެ އިތުރަށް ވިޔަފާރިވެރީންނަކީ ވެސް އެ މީހުން ޚިދުމަތް ފޯރުކޮށްދޭ ރައްޔިތުންގެ މައްޗަށް މަސްއޫލިއްޔަތު އުފުލައި ޒިންމާ އަދާކުރާން ޖެހޭނެ ބައެއް، އަހުރެމެން ކުރެ ބައެއް މީހުންނަކީ އަދާކުރާ މަސްއޫލިއްޔަތުގެ ބާވަތުން އިޚްލާޞްތެރިކަމާއެކު އެ މަސްއޫލިއްޔަތު އަދާކުރުމަށް މާތް ﷲ ގަންދީ ހުވައިކޮށްގެން ތިބި ބައެއް، އެ ފަދަ ފަރާތްތަކުން ވެފައިވާ ޢަހުދާއި ހުވަޔަށް ޙުރުމަތްތެރިކޮށްހިތާންވާނެ، އަހުރެމެން ކުރެ ކޮންމެ މީހަކާ ޙަވާލުވެފައިވާ މަސްޢޫލިއްޔަތު އަދާކުރީ ކިހިނެއްތޯ ޤިޔާމަތް ދުވަހުން ސުވާލުކުރެވޭނެ” ހުކުރު ޚުޠުބާގައި ބުނެފައިވެއެވެ.

 ޙަޤީޤަތުގައި ކޮންމެ މަސްއޫލިއްޔަތަކީ، މާތް ﷲ އެ ފަރާތަކާ ޙަވާލުކުރައްވާފައިވާ ވަރަށް ބޮޑު އަމާނާތެއް ކަމަށް ޚުޠުބާގައި ބުނެފައިވެއެވެ. އަދި އެހެންކަމުން އެ މަސްޢޫލިއްޔަތު އަދާކުރުމުގައި އިހުމާލުނުވުމަށް ޚުޠުބާގައި ގޮވާލިއެެވެ. އަދި އެއީ ޤިޔާމަތް ދުވަހުން އެ ކަމުގެ ޒިންމާ އެ ފަރާތަކުން އުފުލަންޖެހޭނެތީ އާއި އެދުވަހަކީ ތިމާ މި ދުނިޔެމަތީގައި ކުޅަ އެއްވެސް ކަމަކުން ރެކެވޭނެ ދުވަހެއް ނޫން ކަމަށާއި، ބަހަނާއެއް ދެއްކޭނެ ދުވަހެއް ނޫން ކަމަށް ޚުޠުބާގައި ބުނެފައިވެއެވެ.