މޯލްޑިވްސް ގޭހުގެ ފަރާތުން އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާގެ ދަށުން ހިންގާ މަރުކަޒުތަކަށް ހިލޭ ކައްކާ ގޭސް ދެނީ

މޯލްޑިވްސް ގޭހުގެ ފަރާތުން އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާގެ ދަށުން ހިންގާ މަރުކަޒުތަކަށް ހިލޭ ކައްކާ ގޭސް ދޭން ފަށައިފިއެވެ.

މޯލްޑިވްސް ގޭހުން ވަނީ، އެ ކުންފުނީގެ އިޖުތިމާޢީ ޒިންމާގެ ދަށުން ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒާއި، ގދ.ތިނަދޫ ސިޓީގައި ހުންނަ އަމާން ހިޔާ، އަދި ހުޅުމާލޭ ފިޔަވައްސަށްވެސް ހިލޭ ގޭސް ފޯރުކޮށްދީފައެވެ. މި ކުންފުންޏަކީ، 2016 ވަނަ އަހަރުން ފެށިގެން ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒަށް ކެއްކުމަށް ބޭނުންކުރާ ގޭހާއި މެޑިކަލް އޮކްސިޖަން ފޯރުކޮށްދެމުން އަންނަ ކުންފުންޏެކެވެ. މީގެ އިތުރުން، ގދ. ތިނަދޫ ސިޓީގައި ހުންނަ އަމާން ހިޔާއަށް އެއް އަހަރު ދުވަހުގެ ކޮންޓްރެކްޓެއްގެ ދަށުން ހިލޭ ކައްކާ ގޭސް ފޯރުކޮށްދެމުން އަންނަ ކަމަށްވެސް އެ ކުންފުނީގެ  އޮފިޝަލަކު ވިދާޅުވިއެވެ.

މޯލްޑިވްސް ގޭހުން މަޢުލޫމާތުދޭ ގޮތުގައި އިޖުތިމާޢީ އަދި އާއިލީ ތަރައްޤީއާ ބެހޭ ވުޒާރާއާއި ގުޅިގެން އެ ކުންފުނީގެ އިޖުތިމާޢީ ޒިންމާގެ ތެރެއިން އެ ވުޒާރާގެ ދަށުން ހިންގާ މަރުކަޒުތަކަށް ދާއިމީކޮށް ކައްކާ ގޭސް ފޯރުކޮށްދިނުމަކީ އެ ކުންފުނީގެ އަމާޒެކެވެ. އަދި އެ ވުޒާރާއާއެކު އެކުލަވާލާފައިވާ އެއްބަސްވުމުގެ ދަށުން ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒާއި ހުޅުމާލެ ފިޔަވައްޗަށް ދާއިމީކޮށް ހިލޭ ފޭސް ފޯރުކޮށްދިނުމުގެ ޚިދުމަތް ކުރިއަށްދާނެ ކަމަށް އެ ކުންފުނިން ބުނެއެވެ. 

މޯލްޑިވްސް ގޭހަކީ، 1999 ވަނަ އަހަރު އުފެދުނު ކުންފުންޏެކެވެ. މި ކުންފުނި އަބަދުވެސް ދަނީ ރާއްޖޭގައި މީހުން ދިރިއުޅޭ ރަށްތަކާއި ރިސޯޓުތަކަށް ކައްކާ ގޭހާއި، ގޭހާ ގުޅުންހުރި އެހެނިހެން ޚިދުމަތްތައް ފޯރުކޮށްދެމުންނެވެ. ހަމަ އެހެންމެ، އެ ކުންފުންޏަކީ އިޖުތިމާޢީ  ގޮތުން ރައްޔިތުންނަށް ފޯރުކޮށްދޭންޖެހޭ އެކި ޚިދުމަތްތައް ފޯރުކޮށްދިނުމުގައި ނަމޫނާ ދައްކަމުން އަންނަ ކުންފުންޏެކެވެ.