Ads by Exprox

ޚަބަރު

ވިލިމާލެ ފުލުހުން އިންތިޒާމްކޮށްގެން ކުރިއަށް ގެންދާ "ވިލިތަރި ޤުރުއާން" މުބާރާތް ފަށައިފި

ވިލިމާލެ ފުލުހުން އިންތިޒާމްކޮށްގެން ކުރިއަށް ގެންދާ "ވިލިތަރި ޤުރުއާން" މުބާރާތް ފަށައިފި

"ވިލިތަރި ޤުރުއާން" މުބާރާތް ފެށުމުގެ ރަސްމިއްޔާތުގެ ތެރެއިން/ފޮޓޯ: ދިވެހި ފުލުހުންގެ ޚިދުމަތް

18 މާރިޗު 2025، 03:22

ރަމަޟާން މަހަށް ޚާއްޞަކޮށްގެން ވިލިމާލެ ފުލުހުން އިންތިޒާމްކޮށްގެން ކުރިއަށް ގެންދާ "ވިލިތަރި ޤުރުއާން" މުބާރާތް ވިލިމާލޭގައި ފަށައިފިއެވެ.

މި މުބާރާތް ފެށުމަށް މިއަދު ވަނީ ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތު ޝަރަފުވެރިކޮށްދެއްވީ އައްޝެއިޚް އަޙްމަދު ފަހުމީ ދީދީއެވެ. މި ރަސްމިއްޔާތުގައި މާލެ ޕޮލިސް ހެޑް، އެސިސްޓެންޓް ކޮމިޝަނަރ އޮފް ޕޮލިސް އާސިމް ޢަބްދުﷲ އާއި، ތިލަމާލެ ޕޮލިސް ހެޑް، ސުޕްރިންޓެންޑެންޓް އޮފް ޕޮލިސް ޢަބްދުﷲ ރަޝީދުއާއި، ވިލިމާލެ ޕޮލިސް ހެޑް، ޗީފް އިންސްޕެކްޓަރ އޮފް ޕޮލިސް ޒިޔާދު އަލީ ވަނީ ބައިވެރިވެވަޑައިގެންފައެވެ.

މި ރަސްމިއްޔާތުގައި ވާހަކަފުޅު ދައްކަވަމުން އައްޝެއިޚް އަޙްމަދު ފަހުމީ ދީދީ ވަނީ، މީސްތަކުންނަށް ހެޔޮކަމާއި، ޞުލްޙަވެރިކަމާއި، ރޫޙާނީ ކުރިއެރުމަށް މަގުފަހިކޮށްދިނުމުގައި ކީރިތި ޤުރުޢާނުގެ މުހިންމު ދައުރާއި ބެހޭ ގޮތުން އަލިއަޅުއްވާލާފައެވެ. ހަމަ އެހެންމެ، ކީރިތި ޤުރުޢާނާ އޮންނަ ގުޅުން އިތުރަށް ރަނގަޅު ކުރުމަށާއި، ދިރިއުޅުން ބައްޓަންކުރުމުގައި ޤުރުޢާން ކިޔެވުމުގެ މުހިންމުކަމާއި، ކުދިންގެ ހިތްތަކުގައި ޤުރުޢާނުގެ މައްޗަށް ލޯބި ޖެއްސުމަކީ މުހިންމު ކަމެއްކަން ފަހުމީގެ ވާހަކާގައި ވަނީ ފާހަގަކުރައްވާފައެވެ. މީގެ އިތުރުން، ރަމަޟާން މަސް ފަދަ މާތް މައްސަރެއްގައި ޤުރުޢާން ކިޔަވައި އެއާމެދު ވިސްނައި ފިކުރުކުރުމާއި ޤުރުޢާނަކީ ރޫޙާނީގޮތުން އެތައް ފައިދާއެއް ކުރާނެކަމެއް ކަމުގައި އޭނާ ވަނީ ބުނެފައެވެ.

ވިލިމާލެ ފުލުހުން އިންތިޒާމުކޮށްގެން ކުރިއަށް ގެންދާ މި މުބާރާތް އޮންނާނީ މި މަހުގެ 18 ވަނަ ދުވަހުން ފެށިގެން 19 ވަނަ ދުވަހަށް ކަމަށް ދިވެހި ފުލުހުންގެ ޚިދުމަތުން މަޢުލޫމާތުދެއެވެ. އަދި މުބާރާތުގައި ޖުމްލަ 95 ދަރިވަރުން ބައިވެރިވެ ކިޔަވާނެކަމަށް މަޢުލޫމާތުލިބެއެވެ. މީގެ ތެރޭގައި ހިމެނެނީ، 3 އަހަރާއި 5 އަހަރާއި ދެމެދުގެ އުމުރު ފުރާގެ 24 ކުދިންނާއި، 6 އަހަރާއި 9 އަހަރާއި ދެމެދުގެ އުމުރުފުރާގެ 36 ކުދިންނާއި، 10 އަހަރާއި 13 އަހަރާއި ދެމެދުގެ އުމުރުފުރާގެ 24 ކުދިންގެ އިތުރުން 14އަހަރާއި 17 އަހަރާ ދެމެދުގެ އުމުރުފުރާގެ 11 ކުދިންކަމަށް ފުލުހުން ވަނީ ވިދާޅުވެފައެވެ.

މީގެ އިތުރުން، ދިވެހި ފުލުހުންގެ ޚިދުމަތުން ވިދާޅުވީ މިފަދަ މަސައްކަތްތަކުގެ ސަބަބުން ޢާންމުންނާއި ފުލުހުންނާ ދެމެދު އޮންނަ ގުޅުން އިތުރަށް ރަނގަޅުކޮށް، ސްކޫލު ދަރިވަރުންގެ ހިތްތަކުގައި ކީރިތި ޤުރުޢާނަށް އޮންނަ ލޯބި އިތުރުކުރުމާއި، ރަށުތެރޭގައި އެއްބައިވަންތަކަމާއި ސުލްހަ މަސަލަސްކަން ޤާއިމުކުރުމަށް ފަސޭހަވެގެންދާން ކަމަށެވެ. 

މި ލިޔުން ކިޔާލުމުން

Ads by MSS