ދީން
ސުވަރުގެއަށް ވަދެވޭނެ ދޮރުކޮޅު ކަނޑައަޅަނީ އެމީހެއްގެ ހެޔޮ ޢަމަލެއްގެ ބާވަތުން

ސުވަރުގެއަށް ވެއްދޭނެ ދޮރުކޮޅެއް ބިނާވެގެން ވަނީ، އެމީހެއްގެ ހެޔޮ ޢަމަލުތަކުގެ މައްޗަށް ---

ފަރުދުން
18 މާރިޗު 2025، 03:23
18 މާރިޗު 2025، 03:23
މީހަކު ސުވަރުގެއަށް ވެއްދޭނެ ދޮރުކޮޅެއް ބިނާވެގެން ވަނީ، އެމީހެއްގެ ހެޔޮ ޢަމަލުތަކުގެ މައްޗަށެވެ. އެގޮތުން ތަފާތު ހެޔޮކަންތަކަށް ވަނީ ތަފާތު ދޮރުކޮޅުތަކެވެ.
ސުވަރުގޭގެ ދޮރުކޮޅުތަކުގެ ތެރޭގައި ނަމާދުގެ އަޙުލުވެރިންނަށް ޙާއްސަކޮށްފައިވާ ދޮރުކޮޅަކާއި، ރޯދައިގެ އަޙުލުވެރިންނަށް ޙާއްސަކޮށްފައިވާ ދޮރުކޮޅަކާއި، ގިނަގިނައިން ޞަދަޤާތްކުރާ އަޙުލުވެރިންނަށް ޙާއްސަކޮށްފައިވާ ދޮރުކޮޅަކާއި، ތަޢުބާގެ އަޙުލުވެރިންނަށް ޙާއްސަކޮށްފައިވާ ދޮރުކޮޅަކާއި، ﷲގެ މަޤަށް ރުޖޫޢަވި މީހުންނަށް ޙާއްސަކޮށްފައިވާ ދޮރުކޮޅެއް އަދި ﷲގެ މަގުގައި ޖިހާދުކޮށް ޝަހީދުވި މީހުންނަށް ޙާއްސަކޮށްފައިވާ ދޮރުކޮޅެއް ވެސް ހިމެނެއެވެ.
ބުޙާރީ އާއި މުސްލިމް ރިވާކުރައްވާފައިވާ ގޮތުގައި، ސުވަރުގޭގެ އަށް ދޮރުކޮޅު ވެއެވެ. އޭގެ ތެރެއިން އެއް ދޮރުކޮޅަކީ ރައްޔާން ދޮރުކޮޅެވެ. އަދި ރޯދަ ވެރިން ސުވަރުގެ ވަންނާނީ އެ ދޮރުކޮޅުން ކަމުގައި ވެއެވެ.
އަދި ރިވާވެފައިވާ އެހެން ހަދީޘްފުޅެއްގެ މާނައިގައި ވެއެވެ.
ﷲގެ މަގުގައި އެމީހެއްގެ މުދަލުން ދެ ގުނައަށް ހޭދަކޮށްފި މީހާއަށް، ސުވަރުގޭގެ ދޮރުކޮޅުތަކުން ގޮވާލެވޭނެއެވެ. ފަހެ އޭނާއަކީ ނަމާދުކުރުމަށް އަރާހުރި މީހެއްނަމަ، އޭނާއަށް ގޮވާލެވޭނީ ނަމާދުގެ ދޮރުކޮޅުންނެވެ. އަދި އޭނާއަކީ ރޯދަ ހިފުމަށް އަރާހުރި މީހެއްނަމަ، އޭނާއަށް ގޮވާލެވޭނީ ރައްޔާން ދޮރުކޮޅުންނެވެ. އަދި އޭނާއަކީ ޞަދަޤާތް ދިނުމަށް އަރާހުރި މީހެއްނަމަ، އޭނާއަށް ގޮވާލެވޭނީ ޞަދަޤާތުގެ ދޮރުކޮޅުންނެވެ. އަދި އޭނާއަކީ ޖިހާދުކުރުމަށް އަރާހުރި މީހެއްނަމަ، އޭނާއަށް ގޮވާލެވޭނީ ޖިހާދުގެ ދޮރުކޮޅުންނެވެ.
އެހެންކަމުން، އަޅުގަނޑުމެން ކޮންމެ މީހަކު ވެސް ބަލަންވީ، މީގެން ކޮންމެވެސް އެއް ދޮރުކަޅަކުން ވަދެ ސުވަރުގޭގެ އަޙުލުވެރިއަކަށް ވެވޭތޯއެވެ. އެކަމަށް މަސައްކަތްކުރަން އަޅުގަނޑުމެނަށް އޮތީ މި ދުވަހެވެ.
މަސްދަރު:
1446 ވަނަ އަހަރުގެ ރަމަޟާން މަހަށް ޙާއްސަކޮށް ފަރުދުން މީޑިއާއިން ގެނަސްދިން "ބަރަކާތް" ޕްރޮގްރާމް.
އެޕިސޯޑުގެ ޕްރެޒެންޓަރ: އައްޝައިޙާ އަރޫޝާ މާޙިރު