ހަމަލާތަކުގައި ޒަޚަމްވި މީހުން ފަރުވާނުދެވި ހޮސްޕިޓަލްގައި ނިޔާވަމުންދަނީ

އިޒްރާއިލުން އިންޒާރު ދިނުމެއްނެތި ޣައްޒާއަަށް ދިން ކުއްލި ހަމަލާތަކުގައި ޒަޚަމްވި މީހުން ފަރުވާނުދެވި ހޮސްޕިޓަލްގައި ނިޔާވަމުންދާކަމަށް ޣައްޒާގެ އަލް ޝިފާ ހޮސްޕިޓަލުން ބުނެފިއެވެ. 

އަލް ޝިފާ ހޮސްޕިޓަލްގެ ޑިރެކްޓަރ މުޙައްމަދް އަލް ސަލްމިއްޔާ ވިދާޅުވެފައިވަނީ އިޒްރާއިލުން ދިން ކުއްލި ހަމަލާގެ ސަބަބުން ޒަޚަމްވެ ހޮސްޕިޓަލަށް ފަރުވާއަށް ގެނެވުނު މީހުންނަށް ފަރުވާދޭން ހޮސްޕިޓަލަށް އޮތީ ތައްޔާރު ނުވެވި ކަމަށެވެ. 

މެޑިކަލް ރިސޯސަސް ނެތުމުން ފަރުވާދެވެން ނެތްއިރު ކޮންމެ މިނެޓަކު އެތަނަށް ގެންދެވިފައިވާ މީހުންގެ ތެރެއިން މީހަކު ނިޔާވަމުންދާކަމަށް ޑިރެކްޓަރ މުޙައްމަދު ވިދާޅުވެފައިވެއެވެ.

އޭނާ އިތުރަށް ވިދާޅުވެފައިވަނީ މުޅި ޣައްޒާގައިވެސް އިންޓެންސިވް ކެޔަރ ޔުނިޓްގައި ބޭނުން ކުރެވޭ ޙާލަތުގައި ހުރީ ހަތަރު އެނދުކަމަށެވެ.

މީގެއިތުރުންވެސް ފަރުވާދިނުމަށް ބޭނުންވާ އެންމެ އަސާސީ ތަކެތިވެސް ނެތް ކަމަށް އޭނާ ވަނީ ވިދާޅުވެފައެވެ. ހަމަމިއާއިއެކު އަނިޔާލިބި އިމާރާތްތަކުގެ ދަށުގައި ތާށިވެފައި ތިބި މީހުން އެ ތަންތަނުން ނެރުމަށް އެ ތަންތަނަށް ވާސިލްވުން ވެސް ނާދިރު ކަމަކަށް ވެފައިވާ ކަމަށް ޑިރެކްޓަރ މުޙައްމަދު ފާހަގަ ކުރެއްވެވިއެވެ. 

ފަލަސްޠީނުގެ ޞިއްޙީ ވުޒާރާއިން މިހާރު ވަނީ ލޭހަދިޔާ ކޮށްދިނުމަށް އެދި އެކަމަށް ޚާއްސަ އިންތިޒާމްތަކެއް ހަމަޖެއްސުމަށް މަސައްކަތް ކުރަމުންނެވެ. ހޮސްޕިޓަލްތަކުގައި ސްޓޮކް ކޮށްފައިހުރި ލޭވެސް ހުސްވެފައިވާ ކަމަށް އަލްޖަޒީރާގައި ވަނީ ރިޕޯޓު ކޮށްފައެވެ.

ޣައްޒާގެ ޞިއްޙީ ޚިދުމަތްދޭ މަރުކަޒުތަކުގެ ޙާލަތު މިހެން ހުރި އިރު އަވައްޓެރި މިޞްރަށް އިތުރު ފަރުވާއަށް މީހުން ގެންދިޔުމަށް ހުޅުވާލި ދޮރޯށި ބަންދުކޮށް އިތުރު މީހަކަށް ބޭރު ނުވެވޭނެކަމަށް މިހާރު އިޒްރާއިލުން ވަނީ އަންގައިފައެވެ.

ރޭގެ ހަމަލާތަކުގައި ޝަހީދުވި މީހުންގެ ޢަދަދު މިހާރުވަނީ 400 އަށް އަރައިފައެވެ. ލަފާކުރެވޭ ގޮތުގައި މިޢަދަދު އަދިވެސް ދާނީ މަތިވަމުންނެވެ. ހަލާކުވެފައިވާ ޢިމާރާތްތަކުގެ ދަށުން ނެގެމުންދާ ހަށިތަކާއި މީހުންގެ ޢަދަދު އަންނަނީ ގިނަވަމުންނެވެ.