Ads by Exprox

ޚަބަރު

ޣައްޒާއަށް ދެމުންގެންދާ ޙަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި

ޣައްޒާއަށް ދެމުންގެންދާ ޙަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި

ޣައްޒާގެ ގެތަކެއް ސުންނާފަތިކޮށްލާފައި/ފޮޓޯ: ދަ ގާޑިއަން

19 މާރިޗު 2025، 12:04

އިސްރާއީލުގެ ޖައްބާރު އަސްކަރިއްޔާއިން ފަލަސްޠީނުގެ ޣައްޒާއަށް ދެމުންގެންދާ ޙަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.

މިކަމާއި ގުޅިގެން ދިވެހިރާއްޖޭގެ ޚާރިޖީ ވުޒާރާއިން ވަނީ ބަޔާނެއް ނެރުއްވާފައެވެ. މި ބަޔާނުގައި، ދިވެހި ސަރުކާރުން ވަނީ ނިރުބަވެރި އިސްރާއީލާއި މެދު އަވަސް ފިޔަވަޅުތަކެއް އެޅުއްވުމަށް ބައިނަލްއަޤްވާމީ މުޖްތަމަޢަށް ގޮވާލައްވާފައެވެ.

 މީގެ އިތުރުން ޚާރިޖީ ވުޒާރާއިން ނެރުއްވެވި ބަޔާނުގައި ވިދާޅުވީ، މިއީ ދުނިޔޭގެ ޤާނޫނުތަކާއި ބައިނަލްއަޤްވާމީ އިންސާނީ ހައްޤުތަކަށް ބަލާއިރުވެސް ބަލައިގަނެވޭނެކަމެއް ނޫންކަމަށެވެ. އަދި އިސްރާއީލުން ޣައްޒާގެ އެކި ސަރަހައްދުތަކަށް ދިން ވަރުގަދަ ވައިގެ ހަމަލާތަކުގައި ފަލަސްތީނުގެ ކުށެއްނެތް ތުއްތު ކުދިން ހިމެނޭހެން 400 އަށްވުރެ ގިނަ މީހުން ޝަހީދުކޮށްލުން ހަރުކަށި އިބާރާތުން ކުށްވެރި ކުރާ ކަމަށް ވެސް މި ބަޔާނުގައި ފާހަގަކޮށްފައިވެއެވެ. ހަމަ އެހެންމެ މާތް ވެގެންވާ ރަމަޟާން މަހު މި ޙަމަލާތައް ދެމުންދާތީ، ޚާރިޖީ ވުޒާރާއިން ވަނީ އެކަން ވެސް ކުށްވެރިކޮށްފައެވެ.

އިސްރާއީލުން ފަލަސްޠީނާއި މެދު ބޮޑު ޤަތުލު ޢާންމެއް ނުހިންގާ، ޙަމަލާ މެދުކަނޑާލާފައި ތިބުމަށްފަހު، ރޭ އިސްރާއީލުގެ އަސްކަރިއްޔާއިން ވަނީ ޣައްޒާއަށް ވަރުގަދަ ހަމަލާތަކެއްދީ ގިނަ ބަޔަކު ޝަހީދުކޮށްލާފައެވެ. އަދި މި ޙަމަލާތަކުގައި ޝަހީދުވެފައިވާ މިހުންގެ އަދަދު 500 އިން މައްޗަށް އަރާ ކަމަށް އެ ސަރަޙައްދުގެ ނޫސްތަކުން ވަނީ ރިޕޯޓުކޮށްފައެވެ. ނިރުބަވެރި އިސްރާއީލުން ރޭ ދޭން ފެށި ހަމަލާތަކުގައި ޣައްޒާގެ ޢާންމުން ދިރިއުޅޭ ޓެންޓުތަކުގައި ވެސް އަލިފާން ރޯކޮށްލާފައިވާ ކަމަށް އެ ޤައުމުގެ ނޫސްތަކުން މަޢުލޫމާތުދެއެވެ.

ނިރުބަވެރި އިސްރާއީލުގެ ހަމަލާތައް ރޭގައި ފެށުމާއި އެކު، ޙަމަލާ ބަދަލު ކުރުން މެދުކަނޑައިލުމަށް އަމަލު ކުރަމުން ދިޔަ އެއްބަސްވުން މި ވަނީ ނިމުމަކަށް އައިސްފައެވެ. އަދި މި އެއްބަސްވުމާއި އެއްގޮތަށް ކުރިއަށް އޮތް ދުވަސްތަކުގައި ޢަމަލުނުކުރާނެ ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ރަސްމީކޮށް އަންގާފައެވެ. ހަމަ އެހެންމެ، ކުރިއަށް އޮތް ދުވަސްތަކުގައި ޣައްޒާއަށް ވަރުގަދަ ހަމަލާތަކެއް ދިނުމަށް އަމުރުކޮށްފައިވާކަމަށް ވެސް ޖައްބާރު ނަތަންޔާހޫ ވަނީ ބުނެފައެވެ. ނަތަންޔާހޫ ގެ މި ޢަމަލުތަކާއި ގުޅިގެން އދ. އާއި ބައިނަލްއަޤްވާމީ އިންސާނީ ޙައްޤުތަކުގެ ޖަމިއްޔާތަކުން ވަނީ އިސްރާއީލުގެ މި ޢަމަލުތައް ކުށްވެރިކޮށް، ހަނގުރާމައިގެ ޤާނޫނުތަކާ ޚިލާފު ޤަމަލުތައް ހުއްޓުވުމަށް ގޮވާލައިފައެވެ.

މީގެ އިތުރުން ދިވެހި ސަރުކާރުން ނެރުއްވެވި ބަޔާނުގައި 1967 ގެ ބޯޑަރުތަކުގެ މައްޗަށް ބިނާކޮށް، އިރުމަތީ ޤުދުސް އޭގެ ވެރިރަށް ކަމުގައި ބަލައިގަނެ، މިނިވަން ފަލަސްޠީނު ދައުލަތެއް ޤާއިމުކުރުމަށް ފަލަސްޠީނު ރައްޔިތުންނަށް ލިބިދޭ ޙައްޤުތަކަށް ފުރިހަމައަށް ތާއީދުކުރާކަމަށް ވަނީ ވިދާޅުވެފައެވެ. އަދި މި ކަމުގައި ބައިނަލްއަޤްވާމީ މުޖުތަމަޢުއިން ހަރުދަނާ ފިޔަވަޅުތަކެއް އެޅުމަށް ރާއްޖެއިން ވަނީ ގޮވާލާފައެވެ.

މި ލިޔުން ކިޔާލުމުން

Ads by MSS