ރާއްޖޭގެ ޚާރިޖީ ވަޒީރު އިންޑިއާގެ ޚާރިޖީ ވަޒީރާއި ބައްދަލުކުރައްވައި މުހިންމު މަޝްވަރާތަކެއް ކުރައްވައިފި

ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް، އިންޑިއާގެ ޚާރިޖީ ވަޒީރު  ޑރ. އެސް ޖައިޝަންކަރުއާއި ބައްދަލުކުރައްވައި މުހިންމު މަޝްވަރާތަކެއް ކުރައްވައިފިއެވެ.

މި މަޝްވަރާތައް ކުރައްވާފައިވަނީ، އިންޑިއާގެ ވެރިރަށް ނިއުދިއްލީގައި މިހާރު ކުރިއަށްދާ ރައިސީނާ ޑައިލޮގުގެ 10 ވަނަ ބައްދަލުވުމުގައި ބައިވެރިވެވަޑައިގަތުމަށް ވަޒީރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

މި ބައްދަލުވުމުގައި، ދެ ޤައުމުގެ ގުޅުން އިތުރަށް ބަދަހިކުރެވޭނެ ދާއިރާތަކާއި ގުޅޭގޮތުން މަޝްވަރާ ކުރައްވާފައިވާ ކަމަށް ޚާރިޖީ ވުޒާރާއިން ވަނީ ވިދާޅުވެފައެވެ. ހަމަ އެހެންމެ، ދެ ޤައުމުގެ މަސްލަޙަތު ހިމެނޭ ކަންކަމުގައި ގުޅިގެން މަސައްކަތްކުރެވިދާނެ ގޮތްތަކާއި ގުޅޭގޮތުން ވަނީ މަޝްވަރާކުރައްވާފައެވެ. މީގެ އިތުރުން، އިންޑިއާގެ އެހީގައި ރާއްޖޭގައި މިވަގުތު ކުރިއަށްދާ މަސައްކަތްތަކުގެ މައްޗަށް މި ބައްދަލުވުމުގައި އަލިއަޅުއްވާލާފައިވާކަމަށް އެ ވުޒާރާއިން ވަނީ ވިދާޅުވެފައެވެ. އަދި ތަރައްޤީގެ ރޮނގުން އިތުރަށް ކުރެވިދާނެ ކަންކަމާގުޅޭ ގޮތުންވެސް ދެބޭފުޅުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.

މިއީ ޚާރިޖީ ވަޒީރު ޑރ. އަބްދުﷲ ޚަލީލް ޚާރިޖީ ވަޒީރުކަމުގެ މަޤާމާއި ހަވާލުވެވަޑައިގަތުމަށްފަހު، އިންޑިއާއަށް ކުރެއްވި ފުރަތަމަ ރަސްމީ ދަތުރުފުޅެވެ. މި ދަތުރުފުޅުގައި ވަޒީރު އިންޑިއާއަށް ފުރާވަޑައިގެންނެވީ މި މަހުގެ 17 ވަނަ ދުވަހުއެވެ. މި ފޯރަމް ކުރިއަށްދާނީ މި މަހުގެ 19 ވަނަ ދުވަހުގެ ނިޔަލަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޑރ. އަބްދުﷲ ޚަލީލް ޚާރިޖީ ވަޒީރަކަށް އައްޔަނުކުރައްވާފައިވަނީ، ނިމިދިޔަ އަހަރުގެ ސެޕްޓެމްބަރު މަހުގެ 30 ވަނަ ދުވަހުގައެވެ. މި މަޤާމާއި ހަވާލުވެވަޑައިގަތުމަށްފަހު ވަޒީރު އެންމެ ފުރަތަމަ ބައްދަލުކުރައްވާފައިވަނީ ވެސް އިންޑިއާ ސަފީރާއެވެ. 

Very pleased to meet my dear friend, Minister @DrSJaishankar, today in Delhi.

We discussed development cooperation between #Maldives and #India and explored ways to further expand our collaboration in areas of mutual interest. 🇲🇻-🇮🇳 @MEAIndia https://t.co/VuFDQywBpv

— Abdulla Khaleel (@abkhaleel) March 18, 2025