ސެމިނާރ ދަތުރެއްގައި މޯލްޑިވްސް މީޑިއާ ކައުންސިލްގެ ވަފުދެއް ޗައިނާއަށް ފުރައިފި

ސެމިނާރ ދަތުރެއްގައި މޯލްޑިވްސް މީޑިއާ ކައުންސިލް، އެމްއެމްސީ ގެ ވަފުދެއް ޗައިނާގެ ބެއިޖިންގއަށް ފުރައިފިއެވެ.

މޯލްޑިވްސް މީޑިއާ ކައުންސިލުން ބުނީ، މި ސެމިނާރ ކުރިއަށްދާނީ މި މަހުގެ 20 ވަނަ ދުވަހުން ފެށިގެން އަންނަ އޭޕްރީލް މަހުގެ 2 ވަނަ ދުވަހުގެ ނިޔަލަށް ކަމަށެވެ. 

މި ދަތުރަކީ، "ސެމިނާރ އޮން ހެޑްސް އޮފް ޖާނަލިސްޓް އޯރގަނައިޒޭޝަން ފޯރ ބެލްޓް އެންޑް ރޯޑް އިނިޝިއޭޓިވް (ބީ.އާރް.އައި) ޕާރޓްނާރ ކަންޓްރީސް" ގެ ނަމުގައި ޗައިނާ ސަރުކާރުން އިންތިޒާމުކުރައްވައިގެން ކުރިއަށް ގެންދަވާ ސެމިނާއެއް ކަމަށް މޯލްޑިވްސް މީޑިއާ ކައުންސިލުން ވަނީ ބުނެފައެވެ. އަދި މި ފުރުޞަތު އެކައުންސިލަށް ފަހިކޮށްދެއްވާފައިވަނީ، ޚާރިޖީ ވުޒާރައިން ކަމަށް މޯލްޑިވްސް މީޑިއާ ކައުންސިލުން މަޢުލޫމާތުދެއެވެ.

މީގެ އިތުރުން، މޯލްޑިވްސް މީޑިއާ ކައުންސިލުން ބުނީ، މި ޕްރޮގްރާމުގެ މައިގަނޑު މަޤްސަދަކީ ޗައިނާގެ ޚަބަރާއި މީޑިއާގެ އާދަތައް ދެނެގަތުމާއި، މީޑިއާގެ ދާއިރާއިން ޗައިނާއާއި ބީ.އާރް.އައި ގެ އެހެނިހެން ޤައުމުތަކުގެ މެދުގައި ގުޅުން ބަދަހި ކުރުން ކަމަށެވެ. އަދި މި ސެމިނާރގައި މޯލްޑިވްސް މީޑިއާ ކައުންސިލްގެ ފަރާތުން ބައިވެރިވާނީ މީޑިއާ ކައުންސިލްގެ މެންބަރު އަލީ އާދަމާއި، ކައުންސިލްގެ އެޑްމިނިސްޓްރޭޓިވް އޮފިސަރ އައިޝަތު މަލްސާ މާހިރު، އޭއޯ ނިއުސްގެ ނޫސްވެރިޔާ ޝިމްލާ އަޙްމަދު، އަދި މިހާރު އޮންލައިންގެ ނޫސްވެރިޔާ އިފްރާޒް ޢަލީ ކަމަށް އެ ކައުންސިލުން ބުނެއެވެ.